Read Sangir YESAYA 16 Bible Online

YESAYA 16 - Sangir bible

YESAYA 16

¹Bọu soan Sela su wanua l᷊inggi e, tau Moab něndingọ u anạ u domba mědeạu iporoseěng su měngangawasa su Yerusalem.

²Tau Moab měmpěngẹ̌ngampal᷊ẹ̌ su wiwihu Sal᷊ụ u Arnon apidu mẹ̌dẹ̌daral᷊eng tẹ̌tal᷊ạbingọe kere manga manụ u kinoang kụ lẹ̌liwuaheng bọu sal᷊ehe.

³I sire nẹ̌bera su tau Yehuda, ”Pẹ̌berako kai apạe hinong koateng i kami. Kariadiko waugi kami pẹ̌sasirungang mal᷊uẹ̌ bọu l᷊uwahang u tětịu ěllo rangẹ, dingangu walạekere i kami katanạe su ral᷊ungu ěllungu. I kami e kai měnganguntang; kụ buniko i kami ringangu abe pẹ̌karal᷊ikụ si kami.

⁴Balako i kami e reng měnumpang su wanuanu. Kakěllaị wue i kami wọu taumata kụ mapulu měminasa si kami.” (Pěnanahida ringangu pěnanilakạ e sarung mapaghohẹ̌, dingangu taumata kụ sarung měnilakạ dingangu měndaral᷊inda wanuang Israelẹ̌ e sarung matadise.

⁵Bọu e sěngkatau wọu hěnton Daud sarung makoạ datu, kụ i sie sarung mẹ̌parenta bansane ringangu kakěndagẹ̌ ore lai kasasaria. I sie sarung mapakateing kạadilẹ̌ dingangu masahawụ mẹ̌karadiahang baugu měkoạ apang kụ su katul᷊ide.)

⁶Tau Yehuda e nẹ̌bera, ”I kami e seng nakaringihẹ̌ hal᷊ẹ̌ u kal᷊aobotu tau Moab. I kami e masingkạ u i sire kai maobotẹ̌ dingangu marangẹ naung i sire. Bisaran sire tumbạewen taghunalangu mohong tawẹ lohone.”

⁷Ual᷊ingu ene niwala kerene tau Moab lawọ dụdal᷊umpasiang u sěmbaụ su wal᷊ine. Balạete kakiạ e i sire kamageng u makatahěndung kaěng masasědapẹ̌ kụ tiasa nạung kẹ̌kanengang i sire su soang Kir-Hareset. Balạete i sire rụdal᷊airọ dingangu mẹ̌pẹ̌pasěndigẹ̌.

⁸Manga rahami su rěduhu Hesybon dingangu manga ansedu anggoru Sibma e seng nipakaupu, manga ansedẹ̌ nạung deng makạual᷊i anggorẹ̌ karal᷊ěnggihange waugu apang mangangawasa bansa e ringangu makạbukang si sire e. Nạung kal᷊imona manga ansedu anggorẹ̌ ene e naměnahẹ̌ sol᷊ong soang Yaezer; dingangu sarang sěmběkan daki e sarang banua l᷊inggi, ringangu su sěmběkam bahẹ e sarang sěmběkang Laudẹ̌ Nate e.

⁹Kụ ini e iạ rụdal᷊umpasiang u kalung anggoru Sibma kere rụdal᷊umpasiangu Yaezer. Iạ e tẹ̌tẹ̌dokangu ěllom mata waugu Hesybon dingangu Eleale, ual᷊ingu gẹ̌sing ěntana e nasueng kaěnge su sekẹ.

¹⁰Tawẹu sarang sěngkatau kụ deng lụl᷊uasẹ̌ su manga rahami kụ matuwo ene. Tawẹ u rumal᷊iagẹ̌ arau měmpẹ̌kẹ̌kantarị su rahaming anggorẹ̌ e. Tawẹu měmamaměha anggorẹ̌ e mědeạu makakoạ akẹ u anggorẹ̌ e. Iạ e seng napěngědong pẹ̌daral᷊uasʼi sire.[27]

¹¹Naungku e mẹ̌kẹ̌kiaratagẹ̌ dingangu nararul᷊ẹ nakasilo kakakoạ u Moab dingangu Kir-Heres.

¹²Tau Moab mẹ̌tẹ̌tawakal᷊i sěngapam botonge su saka wěntihu gaghaghěllị baugu tampạ u pẹ̌kakal᷊iomanengang i sire e waugu měmpẹ̌kal᷊iomaneng, kaiso tawẹ apa ual᷊ine.

¹³Seng ene e tatanata nạung kal᷊imona e nionggọu MAWU e mạanuẹng Moab e.

¹⁴Kụ orasẹ̌ ini e MAWU něhengetang, ”Někẹ̌tạ u kate těllu taung lai, kal᷊awọu kakakalạ kụ ilẹ̌lesạ u Moab e sarung matadise. Kawanuane kụ mal᷊awọ e sarung kate mal᷊ěmbe kạdodọ dingangu lome.”