Read Sangir YESAYA 17 Bible Online

YESAYA 17 - Sangir bible

YESAYA 17

¹ MAWU e něhengetang, ”Damsyik e tawe lai makoạ kere soa, kaiso kětạeng kere manga ěnnạ e.

²Manga soa su Siria e sarung iwala sarang marěngụ-děngụ[28] dingangu makoạ tampạu gapaěngu binatang lẹ̌hikinang; tawẹ u sarang sěngkatau l᷊ai sarung makal᷊iwuahẹ̌ si sire.

³Israelẹ̌ e sarung kailangengu pẹ̌kakěllungange ringangu Damsyik e kailangengu karal᷊iwire. Tau Siria kụ apam bědang lěmbene e sarung mẹ̌biahẹ̌ su ral᷊ungu kal᷊ahina kere tau Israel. Iạ e, MAWU Kụ Limembong Kawasa, seng něhengetang.”

⁴MAWU e něhengetang, ”Sarung duměnta tempone katataghupiang Israelẹ̌ e sarung mapaghohẹ̌, dingangu kal᷊ahuwekane e sarung maghěngging.

⁵Israel sarung kere rahami su Refaim kụ gandung masuem pěnsạ e, kụ kate mal᷊ěmbe kadodọ.

⁶Mẹ̌sul᷊ungu kalung zaitun kụ masuen tipone wuane, ringangu mal᷊ěmbe su manga kotọ u manga lelange, kụ kerene lai su Israel kate mahal᷊i taumatane ipakasal᷊amatẹ̌. Iạ e MAWU Ruatang Israel, kụ seng něhengetang.”

⁷Su ěllo ene taumata sarung mẹ̌bal᷊i mẹ̌dorong tul᷊ung su Měndariadine, Duatang Israel susi e.

⁸I sire sarung tawe lai mangumbala ual᷊ing koạ i sire kai manga pananěmbaěng tampạ u pěnanawungang buwụ, dingangu manga tul᷊adang mahan duata wawine i Asyera.

⁹Su ěllo ene, manga soang Israel kụ matoghasẹ̌ pẹ̌těndakenge sarung makoạ opehe ringangu lụhio marěmasẹ̌, mẹ̌sul᷊ungu manga soa nitěntangu tau Hewi ringangu Amori[29] piạ i sire nahuntal᷊ang u tau Israel.

¹⁰Israel, i kau seng niwul᷊en Duata kụ napakasal᷊amatẹ̌ dingangu nangěllung si kau kere wul᷊udu watu matoghasẹ̌. Su sěmběkane, i kau seng nẹ̌suang manga rahami waugu manga mahang duata.[30]

¹¹Kaiso manilaing sasuang ene, apidu mẹ̌tumbal᷊ẹ̌ dingangu nẹ̌bangung su ěllong i kau e nẹ̌suang, kaiso mang tawẹ ual᷊ine. Piạ kětạembeng kasasusa ringangu pěndangu masakị kụ tawe mailang.

¹²Apam bansa matatoghasẹ̌ e kai kapẹ̌gẹ̌ganohạ e; tingihe gụgal᷊ědụ kere gahegheng luạ u sasị mal᷊aihạ.

¹³I sire mạhuntol᷊ọ kere lěba mal᷊aihạ. Kaiso Mawu Ruata e měmal᷊ěndihẹ̌ si sire mase i sire nělingkạ u watangeng i sire nipakarau. I sire sẹ̌sahusuang kere wal᷊ěka su l᷊andehu wěntihe itẹ̌tẹ̌llạu anging, arau awul᷊ẹ̌ tẹ̌tiukang u suwu-suwu.

¹⁴Su tempom bawěllo i sire naparěntan takụ marasai, kaiso kẹ̌kamal᷊ukade i sire seng naghěngging. Kerene kakakoạ u pẹ̌bawiahu apan taumata kụ měhampasẹ̌ si kitẹ e.