Read Sangir YESAYA 18 Bible Online

YESAYA 18 - Sangir bible

YESAYA 18

¹ Bọu wanua sěmbaụ su sěmběkang manga sal᷊ụ u Sudan tangu kẹ̌karingihẹ̌ děhingu manga binatang darodọ.

²Němpẹ̌děntạ e wọu wanua ene manga rarolohang apạl᷊iu Sal᷊ụ u Nil su ral᷊ungu manga sakaeng bọu pondang. Ei, manga rarolohang kụ maral᷊intoị, lighạ e kěngkapul᷊ẹ sol᷊ong banuang kamene niliuangu manga sal᷊ụ ene. Paul᷊ịko tatanata sěmbaụ baugu bansanu kụ kereng katoghase dingangu pěrkasa, taumatanu mararangẹ dingangu pisine al᷊usẹ̌ mase ikẹ̌katakụ su kasěllahu dunia e.

³E, i kamene kěbị apang měmpẹ̌tẹ̌tanạ su dunia! Tatingangko kereu manga waneha witingang su pusigu manga wul᷊ude! Daringihẹ̌ko kamagengu napiri e ipahěte!

⁴MAWU e něhengetang si siạ, ”Bọu katatanakeng-Ku su wowone rasị, Iạ e hědo tumingang tanaẹ pakal᷊enehẹ̌ dingangu pakatilang, katanạe kere namuhẹ̌ piạ beonge su tempong hěbi matětị su musungu měměnsạ, dingangu katilange kere sěnnangu matangěllo su tempong ěllo.

⁵Těntal᷊ang dem bal᷊ine tempong mẹ̌buạ, piạ e bungange sen nahondosẹ̌ dingangu wuang anggorẹ̌ e wědang tawe nạsasạ su kotọ e, Sudan e tangu sarung ipakagholọ u sekẹ, kal᷊owọe kere pisọ piněhěnsị manga hakondang kalu anggorẹ̌.

⁶Maietu manga sordadone sarung itěntang makoạ kinạ u manga manụ u kinoaěng su musungu měhangu, ringangu binatang dul᷊u su musungu marasehẹ̌.”

⁷Sarung duměnta tempone manga sasěmba e ihumpạ su MAWU Limembong Kawasa wọu wanua ene kụ niliuangu manga sal᷊ụ, bọu wansane matatoghasẹ̌ dingangu pěrkasa, wọu taumatane mararangẹ dingangu pisin sire maraal᷊usẹ̌ dingangu ikẹ̌katakụ su kasěllahu dunia e. I sire sarung duměnta su Wěntihu Sion, su tampạ u MAWU Limembong Kawasa e sěmbaěng.