Read Sangir YESAYA 19 Bible Online

YESAYA 19 - Sangir bible

YESAYA 19

¹ Seng ini tatanata waugu Misirẹ̌ e. MAWU e riměnta su Misirẹ̌ su sake winawa masahawụ. Manga mahan duatam Misirẹ̌ e němpẹ̌kende su těngonʼE, ringangu tau Misirẹ̌ e nakadodọ naung i sire.

²MAWU e nẹ̌bera, ”Iạ e sarung mapasongkang u sekẹ su tal᷊oarang anạu sěngkatau su Misirẹ̌ e: I akang dumokạ tuari, lampung mẹ̌dokạ l᷊ampung, soa mẹ̌dokạ soa, kararatuang mẹ̌dokạ kararatuang.

³Iạ e sarung mapẹ̌kutal᷊eng manga karaking Misirẹ̌ e ringangu mamědi manga igasi sire. I sire sarung mẹ̌dorong tul᷊ung su manga mahan duata, mẹ̌dorong sasasa ringangu laahạ su manga tahahopa ringangu manga rohkẹ̌ u haghi.

⁴Misirẹ̌ e sarung Takụ isarakang su l᷊imang sěngkatau ratu matingkaị kụ mẹ̌pẹ̌parenta si sire ringangu karangěngisẹ̌. Iạ, e MAWU Limembong Kawasa, sen nẹ̌bisara.”

⁵Akẹ u Sal᷊ụ u Nil sarung mohọ kụ kakaděngụ e maral᷊e mamara.

⁶Apang lawesange sarung mawuhụ dal᷊urune su tempong akene kakạsuene. Lěntuwu ringangu manga rěmpugẹ̌ e sarung malolang.

⁷Kal᷊awọu pěngangalokoěng kanandum biwihu Sal᷊ụ u Nil sarung mamara kụ itěllạu anging.

⁸Apan tahareạ kinạ kụ tiasa měnẹ̌namẹ kinạ su sal᷊ụ ene sarung mẹ̌kurate ringangu gụgahiorọ ual᷊ingu wawaẹ dingangu soman sire selain tawẹ gunane. Apang mẹ̌kakahiwuange sarung měmpẹ̌kěndung;

⁹u i sire ringangu apang mantorosẹ̌ sẹ̌sewaěng e sarung měngkasusa naung i sire ringangu kumoho igasi sire.

¹¹Apạe mawawodo manga těmbonangu soang Zoan! Tau Misirẹ̌ kụ apang kapelesaěnge mẹ̌gẹ̌gěllịu sasasa wodo! Bahani kahěngang i sire mẹ̌bera su ratu u i sire kawe hiten taumata apam pelesa ringangu mararatu su tempo nạung kal᷊imona.

¹²Kạěngkěhang, datum Misirẹ̌, kai suapa i sire apam měnanasa si tuang kụ mapapande ene? Aramanung i sire masingkạ u apang nạung kẹ̌karakiang u MAWU Limembong Kawasa e su Misirẹ̌.

¹³Apang manga tembonange su Zoan dingangu Memfis ute kai taumata l᷊ongong. I sire wal᷊inewe těmbonange, katewe lai makapal᷊idẹ̌ bansane.

¹⁴Seng MAWU e nakariadi si sire nakoạ měnanasa makạbingọ. Kasueěnge ute, Misirẹ̌ e enẹ e mahunsal᷊a ringangu apạe ipẹ̌tẹ̌tatanggone kere tau wukang nakal᷊iondohẹ̌ su wowom mutane hala.

¹⁵Su Misirẹ̌ e tawẹ taumata kụ dem bědang piạ toghase, baebe měngangawasa arau waẹbe lai kawanua, baẹ taumata matatebone arau lai taumata wiasa.

¹⁶Sarung duměnta tempone tau Misirẹ̌ e makoạ kere wawine tahalěladeng dingangu tal᷊oěng. I sire mạhungkenden takụ kereu makasilo MAWU Limembong Kawasa mạnědeng lima-Ne waugu měhukung si sire.

¹⁷Ěntanang Yehuda e nakapẹ̌gẹ̌gahẹ̌ tau Misirẹ̌ e walạewe i sire ipẹ̌tẹ̌tahěndung putusangu MAWU Limembong Kawasa e maanụeng sire.

¹⁸Su tempo ene werang Ibrani e sarung ipakẹ su soa l᷊ima su Misirẹ̌. Taumata piạ sene mẹ̌salu su arengu MAWU Limembong Kawasa. Sěmbaụ bọu manga soa ene e sarung isěbạ, ”Soam Matangěllo”.

¹⁹Su tempo ene su puidu wanuam Misirẹ̌ e sarung piạ pananěmbaěng sěmbaụ baugu MAWU, ringangu su pẹ̌saraěnge piạ batu rihi sěmbua nitani waugu MAWU.

²⁰Pananěmbaěng dingangu rihi ene nakoạ kere tatialan darěntan MAWU Limembong Kawasa su Misirẹ̌. Kereu wansa ene e sědakeng, kụ i sire gụgahiorọ u makitul᷊ung su MAWU, i Sie sarung měndingọ u pẹ̌sěngkatau waugu pěngambang si sire.

²¹MAWU e sarung mělahẹ u watangenge su tau Misirẹ̌ e ringangu i sire sarung makakiral᷊a ringangu měněmba si Sie, ore lai mẹ̌bawa ghaghěllị dingangu sasěmba si Sie. I sire sarung maul᷊ị u pẹ̌kakědo si Sie ringangu pẹ̌sasalu mase kakanoạe.

²²MAWU e sarung maněntiro tau Misirẹ̌, kaiso wọu ene i sire sarung mapakaul᷊en Sie. I sire sarung mẹ̌sul᷊e su anung MAWU, dingangu i Sie sarung dumaringihẹ̌ kakal᷊iomaneng i sire kụ mapakaul᷊en sire.

²³Su tempo ene sarung piạ dal᷊eng gẹ̌guwạ su wěllạu Misirẹ̌ dingangu Asyur. Tumanạu soa rarua ene e sarung mapul᷊ẹ lumiu ral᷊eng ene, ringangu i sire sarung mẹ̌kal᷊iomaneng sěngkapẹ̌kal᷊iomaneng.

²⁴Su tempo ene Israel sarung mẹ̌salung kal᷊aianenge ringangu Misirẹ̌ dingangu Asyur, kụ bansa tatěllu ene sarung makoạ al᷊amatẹ̌ baugu patikụ dunia.

²⁵MAWU Limembong Kawasa e sarung měngal᷊amatẹ̌ si sire ringangu mẹ̌bera, ”Takụ al᷊amateng i kamene, ei Misirẹ̌ umatẹ̌-Ku, Asyur kinoạ-Ku, ringangu Israel umatẹ̌ pinile-Ku e.”