Read Sangir YESAYA 2 Bible Online

YESAYA 2 - Sangir bible

YESAYA 2

¹Seng ini e nitanatan Duata mạanung Yehuda ringangu Yerusalem kụ nitarimạ i Yesaya anạ i Amos:

²Su apang ěllo ramahi bongkone tampạ u Wal᷊em MAWU tụtindagẹ̌ marangẹ, dingangu rụdarisị matei su wowong manga wul᷊ude ringangu manga wěntihe. Kal᷊awọu wansa e měmpẹ̌gẹ̌giuma tamai kerene,

³i sire kěbị e mẹ̌bẹ̌bera, ”Bọete i kitẹ sumaka sol᷊ong Bukidu MAWU,[3] sol᷊ong bal᷊eng Mawung Israel. I Sie sarung měněntiro si kitẹ měnsang apa harusẹ̌ koateng i kitẹ. I kitẹ sarung tumol᷊e ral᷊engʼE, batụu těntirom MAWU e rarěntane wọu Yerusalem, i Sie nẹ̌bisara wọu Sion.”

⁴ I Sie sarung měhukung su tal᷊oarang manga wansa, ringangu měmutusẹ̌ pěrkara su tal᷊oarang manga wansa. Peda e sarung sẹ̌sal᷊eng makoạ kakal᷊i, dingangu wěngko e koateng pisọ kakumpung. Manga wansa e seng tawe lawọ mẹ̌papangalo, seng tawe lai mẹ̌darariahi mẹ̌sekẹ.

⁵Ei, pal᷊ahěnton Yakub, bọete i kitẹ dumal᷊eng su ral᷊ungu tualagu MAWU!

⁶O Ruata, i Kau e seng naněntang u umatʼU hěnton Yakub! U walạewe suapa su wanua ini e taumata mẹ̌pẹ̌pakẹ u kasingkạ u wawal᷊ikụ bọu sěmbẹ̌kan daki ringangu wọu Pilistin.[4] Taumata e mẹ̌tẹ̌těno lulun tau raghị.

⁷Banuane napenẹ u sal᷊aka ringangu wul᷊aeng, dingangu arětạ e mẹ̌dẹ̌dal᷊embo. Kawal᷊one ene e mal᷊awọ, dingangu karetane tawẹ sihinge kal᷊awọu.

⁸Suapan tampạ piạ mahang duata, ringangu i sire měmpạněmba manga tul᷊ada koạ i sire hala.

⁹Apan taumata e sarung heghesang dingangu ipakasanạ. Kumbahangbe ampungang i sire MAWU!

¹⁰ I sire sarung mahunsuẹ̌ su ral᷊ungu liang su manga wukidu watu hanibẹ̌, arau měmpěmangka lohange su ral᷊ungu ěntana tadeạu mal᷊iwirẹ̌ bọu ral᷊angehu MAWU ringangu wọu kawasa-Ne mawantugẹ̌.

¹¹Taumata maobotẹ̌ e sarung ipakasanạ dingangu taumata naunge marangẹ ipẹ̌tumpěkuhẹ̌. Kětạembeng MAWU e sẹ̌sane ipakawantugẹ̌.

¹²Su ěllo ene MAWU Limembong Kawasa e sarung mapakasanạ u kěbị apang mẹ̌tẹ̌těngkarangẹ u watangenge ringangu mělẹ̌hukungu kěbị apam mal᷊aobotẹ̌ e ringangu apam marangẹ naunge.

¹³Manga kal᷊awọu kalun cěmara apang mararangẹ su Libanon kěbị kalu gaghaghuwạ nasaria e su Basan sarung ipakagholọ.

¹⁴Manga wul᷊ude ringangu manga wěntihe matul᷊ende e sarung iapakatene.

¹⁵Manga měnara mararangẹ e ringangu manga meselẹ̌ pẹ̌kakěllungang e sarung ipakaopehẹ̌.

¹⁶Manga kapal᷊ẹ̌ kasariaěnge ringangu kal᷊ěnggihange sarung ipakawonohẹ̌.

¹⁷Taumata maobotẹ̌ e sarung ipakasanạ, dingangu taumata naunge marangẹ e ipẹ̌tumpěkuhẹ̌. Kětạembeng MAWU sẹ̌sane e ipakawantugẹ̌.

¹⁸Manga tul᷊adang mahang duata e sarung pakatadise.

¹⁹Su tempong MAWU e nẹ̌bangung kụ něngangiọ dunia e, taumata sarung mahunsuẹ̌ su ral᷊ungu manga liang su manga wěntihu himang arau měmpěmangka l᷊ohange su ral᷊ungu ěntana tadeạu mal᷊iwirẹ̌ bọu ral᷊angehu MAWU ringangu wọu kawasa-Ne mawantugẹ̌ e. Kereu ěllo ene e marěnta, manga tul᷊adang mahang duata wọu sal᷊aka ringangu wul᷊aeng kụ nikoạ i sire e mẹ̌deạu paněmbaěng si sie e, měngkate itěntang kerene waugu wal᷊awo ringangu manga paniki.

²²Kụ kumbahangbe měharapẹ̌ su taumata kụ mạpaghohẹ̌ e, u i sie e tawe arěgane.