Read Sangir YESAYA 21 Bible Online

YESAYA 21 - Sangir bible

YESAYA 21

¹Seng ini tatanata mạanung Babel: Kere anging u rimpul᷊usẹ̌ limensehẹ̌ limiu wanua l᷊inggi; kerene rarěntane silakạ bọu wanua mainga.

²Iạ e nakahombang papasilo mạanung karariadi makạtatakụ; mạanung pẹ̌tatul᷊a ringangu pamaminasa. Tol᷊ọ e, wahaning Elam, seketẹ e! Wahaning Madai, hěbagẹ e! Duata sarung mangěnsue kal᷊awọu sunsara kụ pinakariadim Babel.

³Papasilo ene e nakapẹ̌bimbong si siạ hakịu iạ e tawe nakasilo arau nakaringihẹ̌ lai. Iạ e měngkai apa natakụ dingangu nasakị, kere tau wawine sěngkatau kapělẹ̌hendinge.

⁴Naungku e kal᷊inso, pěndangu ghiadẹ̌ e nakakende si siạ. Hěbi takụ ikẹ̌karalọ e tumbạ eng nakataghiawahẹ̌ si siạ e.

⁵Iạ nakasilo lai kaěngu sal᷊iwang kụ seng mạsasadia; kakaianengu apan ninotẹ̌ e seng kạdariahi. I sire nahungkaěng dingangu němpěnginung. Sěngkělěndị e nakaringihẹ̌ parenta: ”Ei kamene pěrwira! Riahiko kěllung i kamene!”

⁶Bọu e MAWU něhengetang si siạ, ”Dakọko pěměllọu lukadẹ̌ sěngakatau kụ oro i sie paul᷊ịu apang nikasilone.

⁷Mạengu i sie makasilo wuntuangu piạ kawal᷊one kụ duměnta pẹ̌tahạ dua, buntuangu mạhunsake kalide ringangu onta, i sie hinong tumingang pakapia.”

⁸Bọu ene lukadẹ̌ ene[31] nẹ̌bera u, ”Tuang, iạ e sen bọu nělukadẹ̌ ěllo-ěllo baẹ ěllo arau waẹbe hěbi.”

⁹Kakěllạe pai i sire! Buntuangu piạ kawal᷊one kụ nahunděnta pẹ̌tahạ dua. Bọu ene l᷊ukade ene něhabarẹ̌ u, ”Babelẹ̌ e seng nanawo! Manga tul᷊ada sẹ̌samolokang i sire e nal᷊ahěmpung pinẹ̌kal᷊iaesẹ̌ su ěntana.”

¹⁰Bansaku Israel! I kau seng pinẹ̌daral᷊itakeng dingangu nakoạ tatahidaěng kere manga wakị u gandung. Kụ ini e takụ ihabarẹ̌ si kamene ute habarẹ̌ mapia kụ kinaringihẹ̌ku wọu anum MAWU Limembong Kawasa, Ruatang Israelẹ̌ e.

¹¹Seng ini e tatanatang maul᷊ị u Edom. Piạ taumata nẹ̌bera si siạ bọu Edom, ”Ei, lukadẹ̌, bědang marěngụ ngae hěbi ini? Pirang kaorasẹ̌ lai wědang! buhụ e maěllo?”

¹²Sasimbangku, ”Marěnta wue mal᷊ukadẹ̌ e, kaiso hěbi e lai. Mạeng mapulu makiwal᷊o, ute hědọ e saụ děnta pakiwal᷊o.”

¹³Seng ini e papaul᷊ị u mạanung Arabẹ̌ e: Ei, tau Dedan, manga kafilanu e němpẹ̌daseng su manga gahundungu ěntanang Arabẹ̌.

¹⁴Ei tumanạ u ěntanang Tema, gělirengbeng inumange i sire apang něngkarau kụ duměnta su anung kamene, dingangu ghělireng kaěnge apang tumatal᷊ang.

¹⁵U i sire kai sen nahuntal᷊ang u watangeng i sire wọu pěnanawụ u peda, bọu horom papitị seng kạl᷊aěnạ su naěnakenge dingangu wọu paraěng seng nẹ̌kal᷊igẹ̌ e.

¹⁶Mase MAWU e něhengetang si siạ, ”Nẹ̌kětạ u sěntaung kapia katataghupiang manga hěntong Kedar seng mapaghohẹ̌.

¹⁷Manga tahapitị u Kedar ute kai taumata kahasaěnge. Kaiso tumbạeng mahal᷊i wọʼi sire masal᷊amatẹ̌ e. Iạ, MAWU Ruatang Israel seng nẹ̌bisara.”