Read Sangir YESAYA 22 Bible Online

YESAYA 22 - Sangir bible

YESAYA 22

¹Seng ini e papaul᷊ị u mạanung Bal᷊ang Papasilo: Ei, tumanạu Yerusalem, unụe i kamene kěbị e němpẹ̌awị sol᷊ong atụ u wal᷊e?[32]

²Tawe hinone kěbị soa e měmpẹ̌sal᷊iwang dingangu měmpahul᷊uasẹ̌ ore měmpahul᷊iagẹ̌. U manga mol᷊ensekẹ i kamene kụ apang nate su ral᷊ungu pẹ̌sekateng ini e wal᷊inewe nate ual᷊ingu nẹ̌sekẹ.

³Kal᷊awọu panglimang kamene e sen nahuntal᷊angu wadange hala ringangu nitaweng kal᷊amonang i sire reng nakapěngěnạ papitị i sire. Kal᷊awọu matatoghasʼi kamene e mal᷊aing kinataweng manilaing seng timal᷊ang marau.

⁴Abe tatingang lai siạ; balạekere iạ kakakěndunge waugu kal᷊awọu bansaku kụ apan seng něngkairị su pẹ̌seketang. Abe pěnal᷊ukạ měhiborẹ̌ si siạ.

⁵Kai těngadẹ̌, MAWU Limembong Karangetange ringangu Limembong Kawasa e sen něnantu sěhěllo ini tabidạu kere ěllong pẹ̌sasilontahẹ̌, kaghaghohahẹ̌ dingangu huru-hara su Wal᷊ang Papasilo. Kal᷊awọu meselu soa e seng něngkatope. Bansaku kakiạu makitul᷊ung e seng piạ bal᷊ěmbenge su manga wěntihe.

⁶Tau Siria riměnta ringangu kawal᷊one ringangu kěretan sekẹ, tau Elam piạ aghide naěnakeng dingangu horom papitị e, tau Kir něndiahing kěllunge.

⁷Manga wal᷊ene matatawa su Yehuda e napenẹ u karetang sekẹ. Buntuang e piạ kawal᷊one sadia su těngom manga pasěllangengu Yerusalem.

⁸Kal᷊awọu wal᷊oarị u pẹ̌tahutěndakengu Yehuda e naopehẹ̌. Su tempo ene, i kamene němarikẹ̌sa manga aghidu pẹ̌sasekẹ e su gudang u aghidẹ̌ e.

⁹I kamene nakaěbạ u mal᷊awọ kahěngang manga hětangu meselu soang Yerusalem kụ hinong ikoạ. I kamene seng němarikẹ̌sa kal᷊awọu wal᷊e su Yerusalem, něnggoghahẹ̌ piram baụ su tal᷊oarane ringangu nẹ̌pakẹ u watune waugu ipěngul᷊ị meselu soa. Baugu ipěnampung akẹ e,

¹¹i kamene nẹ̌koạ talagạ su ral᷊ungu soa ringangu něnampung akẹ bọu talagạ tebe. Kaiso i kamene tawe timatingang Duata kụ seng marěngụ mělẹ̌hingidu kěbị tamai ene, ringangu makạdiading ene.

¹²Su tempo ene MAWU Limembong Karangetange ringangu Limembong Kawasa něngoro si kamene pạhunsangị dingangu apạkěndung, pẹ̌lẹ̌lungguhẹ̌ těmbọ dingangu pělẹ̌luhem pakeange karong.

¹³ Kaiso su sěmběkane, i kamene měmpạhul᷊uasẹ̌ dingangu měmpẹ̌sẹ̌sal᷊iwang. I kamene němpěmotọ manga sapi ringangu domba, mạhungkinạ gẹ̌sim binatang dingangu měmpạnginung anggorẹ̌ kapẹ̌kẹ̌kuine, ”Bọete i kitẹ kumaěng dingangu měnginung, u riěllo i kitẹ e kai mate!”

¹⁴MAWU Limembong Karangetange ringangu Limembong Kawasa e mělẹ̌lahẹ u watangengʼE si siạ dingangu měbera, ”Těngadẹ̌, karal᷊akisi sire ene e tawe Takụ ampungang sarang i sire mate. Iạ, MAWU e seng nẹ̌bisara.”

¹⁵MAWU Limembong Karangetange ringangu Limembong Kawasa e něngoro si siạ apẹ̌sẹ̌sombang i Sebna, těmbonang u ral᷊ohom bal᷊eng istana, waugu měhabaru papaul᷊ị u MAWU ini e si sie,

¹⁶”Su naungu i kau ini e i sai? Kai a hakịu i kau e měmakang kubul᷊ẹ̌ e waugʼi kau su wěntihu watu e?

¹⁷Pakateghang bue, Iạ sarung měnděmmẹ i kau e pakarau-rau. I kau e sarung Takụ kělokang dingangu rarul᷊ungang mase Takụ lunggiang kere balẹ̌ sol᷊ong banua ghẹ̌guwạ. Paị sene i kau e sarung mate su sěndihangu manga kěreta ilẹ̌lesạu. I kau e seng nakamea arengu walagʼi tuangu.

¹⁹Ual᷊ingu ene i kau sarung Takụ ilohosẹ̌ bọu pangkatu ringangu Takụ lintukang bọu kal᷊aianengu marangẹ e.

²⁰Su tempo ene Iạ sarung mẹ̌kui ěllang-Ku i Elyakim anạ i Hilkia.

²¹Pakeangu kararatuang dingangu papehẹ u e sarung Takụ paketang si sie. Kal᷊awọu kawasanu e sarung Takụ ionggọ si sie. I sie sarung makoạ i amang baugu Yerusalem dingangu Yehuda.

²² I sie sarung mẹ̌kawasa tinalung su al᷊ungu ratu hěnton Daud. I sie sarung měngumbelẹ kakunsị u kararatuang. Kereu i sie měmuka, tawẹ apa kụ deng makahěping, dingangu kereu i sie měhěping, ute tawẹ apa kụ deng makawuka.

²³I sie sarung Takụ onggotangu kal᷊aianeng matoghasẹ̌ kere pasạ mạsasuang matoghasẹ̌ su meselẹ̌. Kal᷊awọu walage sarung adateng ual᷊ingu i sie.

²⁴Arawe manga anạu sěngkatau ringangkeweng apang tẹ̌tal᷊udang e sarung makoạ bawawaěng si sie. I sire mẹ̌timbalong u watangenge si sie, kere kuring kaha masịtimbalong su pasạ.

²⁵Kereu ene e mariadi, tangu pasạ kụ nisuang pinakatoghasẹ̌ e sarung masawụ kụ maondol᷊ẹ̌. Kụ seng ene e pěngěnsueěngu ghal᷊ipohong balagẹ̌ e ringangu kěbị taumata kụ mẹ̌tẹ̌timbalongu watangenge si sie. Iạ, MAWU e seng bọu nẹ̌bisara.”