Read Sangir YESAYA 23 Bible Online

YESAYA 23 - Sangir bible

YESAYA 23

¹ Seng ini e tatanatam mạanum Tirus: Ei apan samehu Spanyol kụ měmẹ̌motọ laudẹ̌ mal᷊oange, pěmpẹ̌kěndungke! Piạ e nạung kạsakeěnge mapul᷊e bọu Siprus, i kamene nihabareng u soan Tirusẹ̌ e seng nagholang. Pěnganguntangeng dingangu manga wal᷊eng kamene e seng kate manga ěnnạ e.

²Pẹ̌kabaratangko ei tumanạu raruruhange, mal᷊ahumbal᷊ụ u Sidon! U wiasane i kamene mẹ̌děndingọ u taumata sol᷊ong sěmběkang laudẹ̌ baugu mẹ̌bal᷊ụ arau mẹ̌bawělli gandung u Misirẹ̌ dingangu mẹ̌badola ringangu patikụ bansa.

⁴Ei soan Sidon, kawawantugu e sen nailang! Kụ maral᷊ung e sen tawe měngakung kau e lai, angkuěnge, ”Iạ e dem bědang tawẹ anạku, tawẹ běke mělẹ̌hiking anạ esẹ arau wawine.”

⁵Sarang kate tau Misirẹ̌ e mal᷊aing sarung huměkosẹ̌ dingangu mẹ̌gěgahu makaringihẹ̌ u Tirus sen nawinasa.

⁶Pěmpẹ̌kěndungke, ringangu pěmpẹ̌tal᷊angke sol᷊ong Spanyol, ei tumanạu raruruhange.

⁷Kakěllạe soanu Tirus kụ seng ene dokeng nạung kal᷊imona. Kụ seng ini e soa nạung měngkate mẹ̌dẹ̌dal᷊uasẹ̌? Seng ini e soa nạung mẹ̌děndingọ u taumata kụ sarang sěmběkang l᷊audẹ̌ mědeạu mẹ̌těngkaghea paịse?

⁸Bal᷊inewe manga mal᷊ahumbal᷊ụ gaghaghuwạ e ghal᷊ipohong mapapangkatẹ̌ lembong lẹ̌adateng su dunia ngae? Kai i sai tangu němutusu mapakanawon Tirus, soa nạung limembong kawasa ini e?

⁹MAWU Limembong Kawasa, i Sie ini e něngal᷊ạ putusang ene. I Sie němutusu mapakasueng obotu tumanạe waugu kěbị apang lětạu munaran sire, ringangu mạpakasanạ u kal᷊awọu taumata lẹ̌adateng su dunia.

¹⁰Dakọe pěhal᷊ẹ̌ dahaminu ei tumanạu Spanyol, u pěndal᷊ěngkaneng kapal᷊ẹ̌ e kai sen tawe dise.[33]

¹¹MAWU e seng něnarěpan takiahe su wowon laudẹ̌ dingangu napakal᷊ein manga kararatuang. I Sie nẹ̌parenta tadeạu manga bentengu Fenisia e nipakaupune.

¹²Angkuěngu MAWU, ”Ei soang Sidon! I kau e sen tawe měngkai mědẹ̌dal᷊uasẹ̌ bědang! Tumanạu e měngkai kẹ̌kasědạ. Manilaing i sire mahuntal᷊ang sol᷊ong Siprus, kai i sire tawẹ apa katatatapenge.” (

¹³Bal᷊ine tau Asyur, kaiso kawe tau Babel kụ napakawalan soan Tirus nipẹ̌kawasaěngu binatang dul᷊u. Mal᷊aing i sire němpěmětị kal᷊awọu měnarang pěngaloěng, měngopehẹ̌ manga benteng mase mapakariadin soa ene kate ěnnạe.)[34]

¹⁴Pěmpẹ̌kěndungko ei apan samehẹ̌ e! Soa ilẹ̌umbalang kamene e seng nakadodọ.

¹⁵Sarung duměnta tempone Tirus kawul᷊enang karěngụ u pitum pul᷊o su taunge, mẹ̌sul᷊ungu umburu ratu. Mạeng seng nal᷊iu tempone ene, Tirus sarung kere wawine tahasundal᷊ẹ̌ su ral᷊ungu kakantarị ini:

¹⁶Pěngal᷊ạko kěcapi, pělikụko soa, ei tahapẹ̌sundal᷊ẹ̌ soe nikawul᷊enang! Pěngutiko kěcapi, saụko pẹ̌kantarị, tadeạu i kau saụ katahěndungang.

¹⁷Nasue pitum pul᷊o su taunge, MAWU e sarung makatahěndung Tirus, dingangu mapakawalan sie mẹ̌koạ hal᷊ẹ̌ e nạung kal᷊amona. I sie sarung mẹ̌dagang dingangu kal᷊awọu kararatuang su wowon dunia.

¹⁸Untung dingangu tatendenge kụ ikaěbạ e sarung tawe resokange, kaiso isěmbane su MAWU. Taumata apang kụ měnẹ̌němba MAWU e sarung mẹ̌pakẹ doitẹ̌ ene waugu ipěměllị pakeang dingangu kaěng gẹ̌gausang i sire.