Read Sangir YESAYA 24 Bible Online

YESAYA 24 - Sangir bible

YESAYA 24

¹MAWU e sarung mapakawinasan dunia, hakịu mal᷊inggi ringangu mal᷊ingungu. I Sie sarung měngal᷊iu wowone ringangu mapẹ̌kal᷊iaesu tumanạ e.

²Kěbị taumata e sarung kaẹ̌bakengu hombange mẹ̌sul᷊ung: manga imang dingangu kawanua, ěllang niwělliang dingangu mawune, mẹ̌bawal᷊ụ e ringangu měmamělline, měngangědange ringangu mẹ̌gaghěllị e apạngědang, kalạ dingangu kasiang.

³Banua e sarung mẹ̌kal᷊iaesẹ̌ dingangu ipakagholọ. MAWU e seng nẹ̌bisara ringangu hal᷊ẹ̌ ene e mamben těngadẹ̌ mariadi.

⁴Banua e mamara ringangu malolang kasěllahu dunia e lụhumpinausang. Langị dingangu dunia e lawọ lụhumpinausang.

⁵Dunia e nal᷊amuhụ ual᷊ingu tumanạ e kawe limampa kal᷊awọu titam Mawu Ruata, němal᷊ui kal᷊awọu apan seng nitantunʼE ringangu nělandang kire diandi nikoạʼE ringang i sire sarang marěngụ-děngụ.

⁶Ual᷊ingu ene MAWU e seng něngane dunia ringangu něhukung tumanạ e ual᷊ingu kakanoạ i sire. I sire nịlahěngisẹ̌ dingangu kate mahal᷊i woʼi sire e nasal᷊amatẹ̌.

⁷Kalung anggorẹ̌ e lụhumpinausang tạ kěndị e ringangu akẹ u anggorẹ̌ e masigěsạ kahěngang kaẹ̌bakeng. Taumata nạung kal᷊imona e mal᷊uasẹ̌, orasẹ̌ ini e lụl᷊ahunsusa.

⁸Sen tawe ikararingihẹ̌ kobị u kěcapi makal᷊uasẹ̌ e ringangu tengkelu arabanạ marame. Karamen taumata měmpạhul᷊uasẹ̌ e seng něngědo.

⁹Sen tawẹ u l᷊ai měmpěnginung anggorẹ̌ e ringangu mẹ̌kakantarị, sen tawẹ lai makatateěng sědapẹ̌ u inumang makakětị.

¹⁰Su kasěllahu soa e maghanohạ, kěbị apan tukadu wal᷊e e kạpapal᷊e ual᷊ingu taune měngkạtakụ.

¹¹Taumata e měmpěmẹ̌mansagẹ̌ su manga ral᷊eng ual᷊ingu kinasueěngu akẹ u anggorẹ̌. Sen tawẹ apa l᷊ai ral᷊uasẹ̌ su wanua ene sarang marěngụ-děngụ.

¹²Soa kụ seng naghaghoghahẹ̌ e, ringangu manga pasěllangenge nal᷊aěnsạ nakakorọ.

¹³Kụ seng enẹ e sarung mariadi su kasěllahu dunia e, su apạewen bansa e. Mẹ̌sul᷊ungu kere su musungu pamaměnsạ, su tempon buan zaitun nial᷊ạ sarang nasue ringangu wuang anggorẹ̌ pěngěnsueěnge nitipo wọu kalune.

¹⁴Taumata apang masal᷊amatẹ̌ e sarung mẹ̌kantarị mal᷊uasẹ̌. Taumata apan sěmběkam bahẹ e sarung měhabaru kawawantugu MAWU e,

¹⁵ringangu taumata su sěmběkan daki e sarung mẹ̌dalo si Sie. Taumata apan suraruruhange sarung měmantugẹ̌ MAWU, Ruatang Israel.

¹⁶Bọu pondol᷊u dunia e kẹ̌karingihẹ̌ kakantarị daralo waugu Israel, bansa kụ mararingihẹ̌. Kaiso kạěngkěhang bue iạ e! lụhumpinausang! E měngkate wědang těbe mẹ̌tẹ̌tul᷊a, katewe lai mangkeng kạpahuntinambane mẹ̌tul᷊a e.

¹⁷Daringihẹ̌ko ei kal᷊awọu tumanạu dunia e! Pẹ̌gaghěgahẹ̌, sasamẹ dingangu sedẹ e měngẹ̌ngampal᷊ẹ̌ si kamene.

¹⁸Taumata kụ tụtal᷊angu watangenge wọu pẹ̌gaghẹ̌gahẹ̌ e sarung mataho su ral᷊ungu sasamẹ, dingangu taumata kụ mal᷊iwirẹ̌ bọu sasamẹ e sarung kasedekang. Tahiti masuwenehẹ̌ e sarung mẹ̌boang bọu langị, dingangu wal᷊ahuang u dunia e sarung gumanuẹ̌.

¹⁹Dunia e mahěngẹ, mahěmpung, dingangu maghalonggọ.

²⁰Limembong dunia e ipẹ̌dararuhe kere tau wukang, dingangu kumiọ kere suěng su tempon děllang timiụ. Dunia e mahěba ual᷊ingu wěhạ u rosane. I sie makakodọ dingangu sembelain ta makapẹ̌pẹ̌tị kapia.

²¹Su tempo ene MAWU e sarung měhukung manga měngangawasa sarul᷊uang dingangu manga mararatun dunia e.

²²I sire sarung itampung sěngkatampung kere kạtatahungkụ su ral᷊ungu liang, dingangu niwunsal᷊ẹ̌ su ral᷊ungu tahungkụ sarang midatingu tempone ihukung.

²³Bul᷊ang sarung marěndung dingangu matangěllo e semben tawe lai suměnnang, batụu MAWU Limembong Kawasa e sarung mẹ̌parenta kere sěngkatau ratu. I Sie sarung mẹ̌kawasa su Yerusalem, su wowom Běntihu Sion, dingangu měnodẹ u kawawantugʼE su manga pangahạ u umatʼE.