Read Sangir YESAYA 25 Bible Online

YESAYA 25 - Sangir bible

YESAYA 25

¹MAWU, seng i Kau e Ruataku, takụ bantugang i Kau ringangu takụ daloěng arengʼU. Batụu manga munara-Nu e apạ e makạdal᷊inaụ; i Kau e něhingidẹ̌ ene ren dokeng kal᷊imona, kụ nẹ̌koạ ene ringangu satia.

²Soa ene seng nigagholọu; soa piạ pagare ene měngkate apa nakakorọ. Istana nipětị u tau raghị e seng naupu, semben tawe niwangung sarang karěngụ e.

³I Kau e sarung daloěng u kal᷊awọu wansa matatoghasẹ̌, dingangu ikẹ̌katakụ su manga soang kal᷊awọu wansa kụ matatingkaị.

⁴Batụu i Kau e někoạ tatal᷊angeng baugu taumata kụ lome, tampạ mal᷊enehẹ̌ baugu taumata kasiang su ral᷊ungu kasasěse. I Kau e pẹ̌kakěllungang bọu anging maihạ, pẹ̌sasirungang bọu pědisẹ̌ maihạ. U taumata matingkaị e měnahěsẹ kere rěllang su tempon tahiti,[35]

⁵kere anging matětị su ěntana mamara. Kaiso i Kau e mapakạkěmming u sědụ i kami e. I Kau e mapěngẹ̌ngẹ̌dom bansagu taumata apam matatingkaị, kere su ěllungu winawa makạkailang pědisẹ̌ maihạ.

⁶Su Wěntihu Sion, MAWU Limembong Kawasa e sarung měndiahing perjamuang baugu patikụ bansa su dunia. I Sie něnadiang kaěng katemangenge dingangu anggorẹ̌ pinile.

⁷Su wowom běntihe ene, i Sie sarung mapakapurạ u winawang kasasusa e měnggěllung manga wansa e.

⁸ MAWU Limembong Kawasa e sarung mapakawinasam papate e sarung marěngụ-děngụ! I Sie sarung měngěmụ akẹ u mata wọu patikụ gati, ringangu mapakaraung kal᷊ahina kụ seng nital᷊edu umatʼE su kasěllahu dunia. MAWU e seng nẹ̌bisara kụ hal᷊ẹ̌ ene e nal᷊ahẹ u mang mariadi.

⁹Su tempo ene taumata sarung mẹ̌bera, ”Mamben těngadẹ̌ seng i Sie e Ruatang kitẹ; seng i Sie e lẹ̌ampal᷊eng i kitẹ e, tadeạu i kitẹ e ipakasal᷊amatẹ̌. Těngadẹ̌, seng ini e MAWU; seng i Sie e lẹ̌ampal᷊eng i kitẹ e. Ini e i kitẹ mahul᷊uasẹ̌ dingangu mahul᷊iagẹ̌, batụu i Sie seng napakasal᷊amatʼi kitẹ e.”

¹⁰ MAWU e sarung měngěllung Bongkon Sion, Moab sarung dal᷊indaěng kere rahami su tampạ u onasẹ̌.

¹¹Tumanạe sarung měngul᷊uhu takiahe kere taumata mapulu kumalang. Kaiso MAWU e sarung mapakasanạ u obotʼi sire hakịu i sire tawe makakoạ manga apa.

¹²Manga benteng u Moab dingangu manga mesele mararangẹ e sarung ipakal᷊einʼE ringangu hakaěnge sol᷊ong ěntana e sarang makakorọ kere awul᷊ẹ̌.