Read Sangir YESAYA 27 Bible Online

YESAYA 27 - Sangir bible

YESAYA 27

¹ Su tempo ene MAWU e sarung mẹ̌pakẹ u pedanʼE makětị dingangu mahoro waugu ipěhukung Lewiatan,[39] těmpu kụ mẹ̌kẹ̌kahimbaụ dingangu mělẹ̌lawung ene ringangu waugu ipěmate nagạ u l᷊audẹ̌.

²Su tempo ene MAWU e sarung měhengetang, ”Pẹ̌kantarikong hal᷊ẹ̌ u waelu anggorẹ̌-Ku kụ maholẹe.

³Iạ e, MAWU, lukade; apan tempo Iạ e měnaněbohe; ěllo hěbi Iạ měndal᷊ukade, tadeạu kumbahang piạ u měnanahaghene.

⁴Iạ e sen tawẹ pěndangu lai lumangehẹ̌. Kereu manga piạ děmpugẹ̌ arau manga sumpinị ute sarung Takụ pateěng, kụ kěbị tutungang.

⁵Kai kamagengu manga sědụ u umatẹ̌-Ku e mẹ̌deạ pẹ̌kakěllungang si Siạ e, walạekere pẹ̌dame ringang-Ku, ore mẹ̌dame ringang-Ku.”

⁶Su tempo rahami, tau Israel sarung kere kalu piạ hamụ e kụ mahuntinamba kụ měmenẹ dunia ini ringangu manga wuane.

⁷MAWU e měhukungu umatʼE wal᷊inewe kere kawěhạ u i Sie měhukungu manga wansa kụ mẹ̌děndokạ si sire. I Sie tawe měmate umatʼE kere měmate sědụʼE.

⁸MAWU měhukung umatʼE kụ měnděmme i sire sol᷊ong banua raghị. I Sie měnokol᷊i sire ringangu anging dal᷊akisẹ̌ bọu sěmběkan dakị.[40]

⁹Arawe kal᷊awọu rosang Israelẹ̌ e kětạeng ikaampung kereu manga pananěmbaěng su manga mahan duata e ghilingang pakaal᷊usẹ̌ kere apụ. Kal᷊awọu pěnanutungang buwụ dingangu lambang u mahan duata wawine i Asyera e hinong goghaheng lai.

¹⁰Soa piạ pagare ene e seng lẹ̌hione ringangu nitěntang kere wanua l᷊inggi tawẹ lohone. Gapaěngu binatang piara e mạhungkaěng děmpugẹ̌ dingangu měmpạngirul᷊e sene kạpěngěnsuene manga raukalu wọu manga lelangu kalu.

¹¹Kereu manga hakondane seng nahěgu ringangu napědi, manga wawine mahunděnta kụ měngal᷊ạ koateng manga kalung putung. Bansa ene tawe makaěna apa-apa, tangu Ruata Měndariadine e sarung tawe tumal᷊ěntụ dingangu kuměndagi sire.

¹²Su tempo ene MAWU e sarung měnampung u wansa-Ne sěmbaụ-sěmbaụ bọu Sal᷊ụ u Efrat sarang pẹ̌saraěngu Misirẹ̌. I Sie sarung mapěhaen sire kere taumata měhaěng bakị u gandung bọu wal᷊ẹ̌kane.

¹³Su tempo ene napiri ghẹ̌guwạ e sarung tiukang ipẹ̌kui kěbị tau Israel apan nirěmmẹ su Asyur dingangu su Misirẹ̌. I sire sarung duměnta su Yerusalem baugu měněmba MAWU su bukidʼE susi e.[41]