Read Sangir YESAYA 28 Bible Online

YESAYA 28 - Sangir bible

YESAYA 28

¹Kaěngkěhang soa kụ nakoạ dal᷊esạ u apan tahawukang u Israelẹ̌ e! Kal᷊aholẹ e seng kakạilange kere hundugu wungang kụ nalolang su wowon těmbọ i sire. Kaěngkěhang soa kụ něnumbụ marangẹ su tal᷊oarang bal᷊ane matawa, ilẹ̌lesạu tahawukaneng e marasai.

²MAWU e sarung měndolohu taumata matoghasẹ̌ dingangu mahasa. Darěntane kere rělang tẹ̌tapengang u tahiti watu, kere tahiti mahěbung dingangu lěba makaelọ. Kụ dingangu mahasa i sie měngěnsạ i sire su ěntana.

³Dal᷊esạ u těmbonange mawawukang ene e sarung tatahidaěng.

⁴Tateleng u soan sire kụ seng mạnětạ kakạěndọe ene e sarung maparung. Mẹ̌sul᷊ungu wuang kalu ara kụ pěbawiahe mạsasạ dem bědang bal᷊ine tempone; sarětạeng kinasilo e, pěbawiahu měngkate apidu nitipo ringangu nikaěng.

⁵MAWU Limembong Kawasa e sarung makoạ hundugu bungang maholẹ baugu lembong umatʼE.

⁶MAWU e sarung měngonggọu pěndangu kaadilẹ̌ su manga mělahukung e, ringangu kawawahani su apan taumata kụ piạ munarane mělukadẹ̌ soa wọu mělahěso.

⁷Kerene lai manga nabi ringangu manga imang niwukang ual᷊ingu tumanịu mal᷊awọ měnginung anggorẹ̌ dingangu manga tikusẹ̌. I sire rụdal᷊eng měngkate sal᷊a mạpongge ringangu toghasẹ̌ mạsangkong ual᷊ingu tiněnnan sire e měngkate hanesẹ̌ kal᷊emboghang. Manga nabi e sen tawe lai makaěnna manga papasilo kụ nionggọ u Ruata e si sire. Manga imang sen tawe lai makaputusẹ̌ manga pěrkara kụ mihino si sire.

⁸Medan sire e napenẹ u muta, hakịu semben tawẹ apa l᷊ai tampạ burěsi.

⁹I sire kai makịkasiangu iạ, angkuěnge, ”Katihọ e i sie kai mạněntiro si sai? I sai lai mẹ̌gẹ̌gausẹ̌ tatualage? Katihọ e i kitẹ ini e kai manga rariọ darodọ kụ buhu niědo wọu susu?

¹⁰Hal᷊ẹ̌be kereapa kụ i sie naněntiro si kitẹ bọu hurupẹ̌ sěmbaụ sarang hurupẹ̌ bal᷊ine, bawera sěmbaụ sarang bawera wal᷊ine, arau kalimatẹ̌ sarang kalimatẹ̌.”

¹¹ Kereu i kamene mạdiri rumaringihẹ̌ si siạ, tangu MAWU e sarung měndolohu tau raghị baugu měněntiro si kamene ringangu logate mạhae ringangu weran tau raghị.

¹²MAWU e mělẹ̌loahu tampạ u pěngangirul᷊eěng si kamene kěbị, kaiso i kamene madiri rumaringihẹ̌ si Sie.

¹³Ual᷊ingu ene MAWU e maněntiro si kamene hurupẹ̌ sarang hurupẹ̌, bawera sarang bawera, ringangu kalimatẹ̌ sarang kalimatẹ̌. Kụ su tempong i kamene rụdal᷊eng, i kamene kumbahang manawo rụdal᷊angị hakịu mal᷊esẹ kụ masedẹ dingangu ikataweng.

¹⁴Daringihẹ̌ko apang kụ niwerang MAWU, ei apang mẹ̌bawaehu manga těmbonang u kawanua su Yerusalem!

¹⁵I kamene nẹ̌bera u i kamene seng nẹ̌kakědo ringangu papate ringangu nẹ̌kakireng banuan tau nate. I kamene mambeng makạpěndang u hombang sarung duměnta ene e tawe mihino su watangengu, watụ u i kamene kawe nẹ̌pakẹ u akal᷊ẹ̌ mědeạu mangělung batangengu.

¹⁶ Ual᷊ingu ene MAWU Limembong Karangetange něhengetang kere ini, ”Iạ e sarung měměllọu wawěntane matoghasẹ̌ dingangu makuatẹ̌ su Sion; batu sěmbaụ lensorange maarěga ringangu wohẹ e: ’I saing mangimang matoghasẹ̌ e tawe sarung měngaku mawaụ.’

¹⁷Kạadilẹ̌ e Takụ koateng tal᷊i kakěting, dingangu katul᷊idẹ̌ e Takụ koateng tal᷊i pẹ̌saraěng.” Tahiti watu e sarung ipěnapu pakawurěsi patikụ konti kụ ilẹ̌umbalang kamene. Lěba e sarung makaonodẹ̌ tampạ pẹ̌kakěmbuniangu.

¹⁸Pẹ̌kakědonu ringangu papate ringangu kirenu su runiang taumata nate e sarung tawe pakasěhụ, hakịu kereu hombang e ruměnta, i kamene makakusu tatahidaěng.

¹⁹I kamene sarung kahombangengu silakạ turusẹ̌-turusẹ̌ kụ harusẹ̌ měnal᷊udẹ̌ ene apang kal᷊aěllo, mal᷊ukadẹ̌, ěllo rangẹ dingangu hěbi. I kamene sarung kumenden takụ kereu i kamene nakaěnna paraul᷊ị u Mawu Ruata.

²⁰I kamene mẹ̌sul᷊ungu taumata mapulu mẹ̌tikị su raral᷊okaěng tawe tumanịu manandụ pantuhụ nandụ e. Kahiwune tawe tumanịu mawěnahẹ̌ baugu pẹ̌timbuhungu wadangu e.

²¹ MAWU e sarung mẹ̌bangung kere su Wul᷊udu Perazim. I Sie sarung mẹ̌tawakal᷊i kere su Wal᷊ang Gibeon baugu měndal᷊engu kapulu-Ne, timonane kụ makạdal᷊inaụ baugu taumata! I Sie sarung mẹ̌koạ karadiahangʼE kụ makạl᷊aherang.

²²Iạ seng nakaringihẹ̌ putusang u Ruata Limembong Karangetange ringangu Limembong Kawasa e waugu mapakawinasang kal᷊awọu wanua. Kumbahang měheghesẹ̌ kal᷊awọu waweran tatahěndung takụ ilẹ̌habarẹ̌ ini e. Sarung limembong kawěhạ e si kamene waugu mapakal᷊iwiru watangeng!

²³Daringihẹ̌ko kal᷊awọu waweraku, kụ naungeko tatanataku.

²⁴Sěngkatau mělahěnsinuang e tawe měngkai hanesẹ̌ mẹ̌mangka ěntana, měmacolẹ̌ dingangu měngẹ̌ngěnna ěntanane mědeạu pětanakeng.

²⁵Mạeng u ěntanane ene seng natạgapi, i sie měnawuhu wine, kere manga jintan mitung dingangu jintan mawira. I sie nẹ̌suangu gandung haghine rarua, mẹ̌tẹ̌tantehẹ̌ kụ su wiwihe sasuam bal᷊ine.[42]

²⁶I sie masingkạ u hundugu munarane, u kawe seng nitěntiron Duatane.

²⁷I sie tawe nẹ̌pakẹ u wawol᷊eng dal᷊inda waugu ipělinda jintan mitung arau gěrobaku apal᷊iwụ baugu ipěnggiling jintan mawira. Baugu ene i sie nẹ̌pakẹ u kakoẹ mahaěng.

²⁸Piạ e i sie kapělẹ̌lindane gandunge, i sie tawe měmamahesẹ̌ turusẹ̌-turusẹ̌ sarang maal᷊usẹ̌. Tala wue! I sie masingkạ u kakakoạ u mělinda kahěngang dingangu sumake gěrobakẹ̌ su wowone kụ tawe makaal᷊usẹ̌be manga wakị u gandung ene.

²⁹Kapelesa ene e rarěntane kai wọu anung MAWU Limembong Kawasa e. Kal᷊awọu karakin MAWU e kụ pelesa ringangu měngkai hanesẹ̌ makạual᷊i.