Read Sangir YESAYA 29 Bible Online

YESAYA 29 - Sangir bible

YESAYA 29

¹Kạěngkěhang soan Yerusalem kụ isẹ̌sěbạ pananěmbaěng Duata. Kaěngkěhang soa tampạ i Daud mẹ̌dẹ̌daseng! Balạete apan taung mẹ̌gẹ̌gaghanti e ringangkeweng apam pěmamantuge.

²Kaiso Ruata e sarung maparěntang hombang baugu soa ene, hakịu taumata e mẹ̌kẹ̌kiaratagẹ̌ dingangu mẹ̌moghọ. Kasěllahu soa e mẹ̌pẹ̌papangawẹ u pananěmbaěng kụ nělapusu raha.

³Duata e sarung měnekẹ soa ene ringangu měliwung bọu kěbị bukune.

⁴Yerusalem e kai mẹ̌sul᷊ungu kabanasa kụ mẹ̌tẹ̌tawakal᷊i mědeạu tingihe ikaringihẹ̌ bọu ral᷊ungu ěntana, tingihe kụkěngkunawadẹ̌ bọu ral᷊ungu awul᷊ẹ̌.

⁵Arawe kěbị tau raghị kụ matatingkaị e sarung mailang kere awul᷊ẹ̌ arau wal᷊ẹ̌ka tẹ̌tiukang u anging. Kụ sěngkianu ringangu tawẹ apa harape.

⁶MAWU Limembong Kawasa e sarung měliwiru soa ene ringangi rěllang dingangu linuhẹ̌ maihạ. I Sie sarung maparěntang suwu-suwu ringangu putung dumělau.

⁷Mase kěbị apang buntuangu tau raghị kụ měnekẹ Yerusalem soam pananěmbaěng Duata, kěbị apang tumal᷊iwung dingangu měhěbagẹ̌ soa ene, sarung maghěngging kere ipi su tempong hěbi.

⁸Apam bansa kụ mẹ̌tẹ̌tampung baugu měnekẹ Yerusalem sarung kere kinal᷊unusang kụ lụiping i sie kạkaěnge, kụ bọu ene nẹ̌bangung tiange tawẹ lohone, arau mẹ̌sul᷊ungu tau nahanga kụ nipi i sie kạinunge, mase nẹ̌bangung kụ tinggol᷊ange namara.

⁹Měngkate turusẹ̌ dimal᷊inaụ dingangu něnakạ mata kere tau wuta! Balạete kawawukange kaiso wal᷊inewe kere něnginung anggorẹ̌. Měngkate ral᷊eng mạpongge, kai asal᷊u wal᷊inewe ual᷊ingu něnginung tikusẹ̌.

¹⁰ MAWU e napakal᷊otahʼi kamene ringangu nẹ̌tikị mal᷊ěnabẹ̌. I Sie něhěping matam manga nabi ringangu něnimbuhung gatim manga měmamandane.

¹¹Mangal᷊eng manga papasilo e sarung mawuni si kau, kere bukẹ̌ nisegelẹ̌. Kereu bukẹ̌ ene iwawa sol᷊ong anung sěngkatau kụ makawasa tadeạu i sie mẹ̌basa waugi kau, i sie sarung mẹ̌bera u i sie tawe wotonge, ual᷊ingu bukẹ̌ ene nisegelẹ̌.

¹²Kereu iwawa sol᷊ong anung taumata wěgang hurupẹ̌, i sie sarung sumimbang u i sie tawe makawasa.

¹³ MAWU e něhengetang, ”I sire ene e tumbạeng mạněmba si Siạ dingangu wawera, kaiso naung i sire e kawe marau wọu Iạ. Agaman sire e kětạeng pělatorang u taumata lẹ̌hapaleng.

¹⁴ Ual᷊ingu ene i sire e sarung Takụ hěkosang u ghagheserẹ̌ mẹ̌tatiwalesẹ̌. Taumata pelesa e sarung mawodo, ringangu patikụ kapanden sire e sarung tawẹ gunane.”

¹⁵Kaěngkěhang taumata kụ mẹ̌tẹ̌tawakal᷊ing měmuni hingide wọu MAWU! I sire e mẹ̌kẹ̌karadiahang marěmasẹ̌ dingangu mạngumbahasu tawẹu sarang sěngkatau makasilo arau masingkạ u kai apa hinong koateng i sire e.

¹⁶ Kěbị-kěbị e nipẹ̌kakal᷊iun sire. Sudẹ e limembong kapiange, měkakoạ kuring arau ěntana masipul᷊ụ? Aramanung apang kẹ̌koatenge mẹ̌bera su mẹ̌kakoạ e, ”Bal᷊inewe i kau nẹ̌koạ si siạ”? Arau wotonge barang ene mẹ̌bera si sie, ”I kau tawe makakoạ manga apa”?

¹⁷Piạ pěpěding bawera kụ bawal᷊one, ”Tawẹ kararěnane lai kěhu e makoạbe ěntana pẹ̌sasuangeng, dingangu ěntanang pẹ̌sasuangeng e kapia saụ makoạ kěhu.”

¹⁸Su tempo ene tau wengelẹ̌ e sarung makaringihẹ̌ kal᷊awọu waweram bukẹ̌ sěmbaụ kụ bẹ̌basaěng, dingangu tau wuta nạung kanini e mẹ̌bẹ̌biahẹ̌ su ral᷊ungu kararěndung e sarung makasilo.

¹⁹Apang kasiang dingangu hina e sarung kapia makapěndang karal᷊unsemahẹ̌ kụ nionggọ u Ruatang Israel susi e.

²⁰Ene e pěngěnsueěngu taumata kụ měnẹ̌nědạ taumata wal᷊ine ringangu měhinakang Duata. Duata e sarung mapakawinasang kěbị taumata waradosa,

²¹taumata kụ puluang měhinakang bal᷊ine, taumata měnẹ̌nahaghe ral᷊akịe ihukung dingangu taumata kụ měngekeng kal᷊awọu wẹ̌ke tạ katěngadẹ̌ tadeạu taumata matul᷊idẹ̌ e kumbahang makaěbạ kạadilẹ̌.

²²Ual᷊ingu ene MAWU, Ruatang Israelẹ̌ kụ něliwiri Abraham, orasẹ̌ ini e něhengetang, ”Bansa-Ku, i kamene e tawe sarung lai hinakaneng dingangu ghatinu e selain tawe lai mawilosẹ̌ kahian mea e.

²³U kereu i kamene makasilo manga anạ i kamene e kụ Takụ nighěllị si kamene e, tangu i kamene sarung měngaku u kai Iạ e Ruatang Israel, susi e. I kamene sarung měngadatẹ̌ Siạ dingangu matakụ si Siạ.

²⁴Taumata wodo e sarung měngěndung makaěnna ringangu taumata kụ hanesẹ̌ měngkai mẹ̌sẹ̌sungutẹ̌ e sarung mal᷊uasẹ̌ kereu těntiroěng.”