Read Sangir YESAYA 3 Bible Online

YESAYA 3 - Sangir bible

YESAYA 3

¹Tuhụ hinone, MAWU Lembong Kawasa e sarung měngal᷊ạ kal᷊awọu kaěng dingangu inumang dariahi e wọu Yerusalem dingangu Yehuda. Kerene lai kal᷊awọu taumata kụ pạngumbalaěng i sire e:

²manga wawahani ringangu prajuritẹ̌, mělahukung, nabi, měnanighadẹ̌ dingangu měnanasa,

³pěrwira, taumata apan těmbonange ringangu těmbonangu kawanua, tahahopa, tahapatehẹ̌.

⁴MAWU sarung měhengkẹ u manga rariọ mangudạ makoạ těmbonangu kawanua, kụ i sire sarung mẹ̌parenta tuhụ kapulu.

⁵Taumata e sarung lawọ mẹ̌sasasigěsạ. Mangangudạ e sarung ta měndarekeng u maghaghurang, dingangu manga rariọ e sarung tawe měndarekengu taumata gaghaghuwạ e.

⁶Su tempo ene taumata sarung měněbọ u sěngkatau manga anạ u sěmbaụ e ringangu mẹ̌bera si sie, ”Kětạeng i kau e piạ pakeange nẹ̌tatahino; ual᷊ingu ene, kakoạ e těmbonang si kami su tempọeng napenẹ u sigěsạ orasẹ̌ ini.”

⁷Kaiso i sie simimbang, ”Iạ e wal᷊inewe tahahopa! Iạ mal᷊aing tawẹ kaěngku ringangu pakeangku. Abe pěngoro si siạ makoạ těmbonangu wansa!”

⁸Mamben těngadẹ̌ Yerusalem seng nanawo! Yehuda seng naondol᷊ẹ̌! Batụu kal᷊awọu wawera ringangu kakanoạ i sire e rụdokạ MAWU ringangu rụl᷊ewang kawasanʼE.

⁹Lulun sire kụ maobotẹ̌ e měnẹ̌nodẹ u karal᷊akisʼi sire. Ringangu natodẹ-todẹ i sire e němpẹ̌dosa kere tau Sodom nạung kal᷊amona. Nasilakạ i sire! I sire e naparěntan silakạ baugu watangeng i sire hala e.

¹⁰MAWU e něhengetang, ”Paul᷊ịko su taumata kụ mararingihẹ̌ si Siạ u i sire sarung mal᷊unsemahẹ̌ dingangu masal᷊amatẹ̌. I sire sarung makatemang ual᷊ing liaghang gatin sire.

¹¹Kaiso nasilakạ bue taumata ral᷊akisẹ̌ e! I sire sarung koateng kerẹewe i sire niěbạ taumata wal᷊ine.

¹²Umatẹ̌-Ku sarung dal᷊indaěngu tahaakal᷊ẹ̌ e ringangu pẹ̌pěhaěng u lamatị u rul᷊unge. Umatẹ̌-Ku e sarung ipakapal᷊idu manga těmbonange hakịu seng běga l᷊ai raral᷊engang hinon dal᷊engang e.”

¹³MAWU e seng sadia waugu mẹ̌kabaratang dingangu měhukung umatʼE.[5]

¹⁴MAWU e mẹ̌karadiahang kere sěngkatau mělahukung baugu manga těmbonangu umatʼE. Seng ini e tatokem MAWU e waugʼi sire: ”Seng i kamene e něhampasẹ̌ manga ghěsim baelu anggorẹ̌; bal᷊enu e napenẹ u apal᷊iwụ nihampasʼi kamene wọu taumata kasiang.

¹⁵Kawe unụe i kamene manịgěsạ umatẹ̌-Ku dingangu měměhạ tau kasiang e? Iạ, MAWU Limembong Karangetange ringangu Limembong Kakawasane seng nẹ̌bisara.”

¹⁶MAWU e něhengetang, ”Maobotẹ̌ kahěngang manga wawineng Yerusalem! I sire e makịpanda, ringangu puluang mẹ̌kakerẹ dingangu rumal᷊eng e kai kere ral᷊empangu taumata maobotẹ̌. Lempang i sire e kẹ̌koateng, kụ lụlensehẹ̌ tingihu manga ghal᷊ang bukal᷊ạ su laede.

¹⁷Kaiso Iạ e sarung měhukung i sire; těmbọ i sire sarung mal᷊ukusu kěhe ringangu lungguhang.”

¹⁸Sarung mịdating u tempone MAWU e měngal᷊ạ kal᷊awọu ral᷊ěgahẹ̌ ilẹ̌lesạ i sire wọu manga wawineng Yerusalem kere manga laikị těmbọ, gal᷊ang su l᷊aedẹ̌, kalong,

¹⁹gal᷊angu l᷊ima, tatimbuhung, paporong, daghusẹ̌, laikị pul᷊aěng, dingangu papehẹ kal᷊uwaeng,

²¹sinsing dingangu anti-anting irung,

²²pakeangu sal᷊iwang maral᷊ěnggihẹ̌, mantelẹ̌, kawihu roitẹ̌,

²³lakụ mananipị, pakeang leneng, dal᷊aweng lehẹ dingangu tatukusẹ̌ manandụ.

²⁴Kụ ini e i sire mẹ̌pẹ̌pakẹ u wawěngi, mědeạu kumbahang i sire piạ darurune mawuhụ. Papehẹ i sire al᷊usẹ̌ e sarung awengangu papěgonge kasahẹ̌. Těmbọ i sire utạ e mal᷊ěnggihẹ̌ e sarung lungguhang. Pakeang i sire maral᷊ěnggihẹ̌ e sarung awengangu manga pedesẹ̌. Orasẹ̌ ini e i sire masasadadạ; kai hědowe sarung maral᷊akisẹ̌ ual᷊ingu nighěllirangu capẹ̌ e.

²⁵Manga esẹ e lai matatoghasẹ̌ e, sarung mairị su pẹ̌seketang.

²⁶Su manga pasěllangengu soa e taumata e sarung mělutu ringangu mahunsangị, dingangu soa ene hala e sarung mẹ̌sul᷊ungu manga wawine nipẹ̌těntol᷊e kụ mạiang su ěntana.