Read Sangir YESAYA 30 Bible Online

YESAYA 30 - Sangir bible

YESAYA 30

¹MAWU e něhengetang, ”Kaěngkěhang manga pangahạ u Yehuda, ual᷊ingu i sire něnggohaeng su těngo-Ku. I sire tụtol᷊e kal᷊awọu karaki su l᷊ikudu karaki-Ku. I sire němpěnekeng u areng su pẹ̌dariandi kụ nẹ̌gul᷊ewasu kapulu-Ku. Tangu apạ e nẹ̌tatimbo rosan sire.

²I sire něngkakoạ sol᷊ong Misirẹ̌ tawẹ dorongu putusang bọu Iạ e. I sire nẹ̌kěllung su Misirẹ̌ dingangu mělẹ̌harapẹ̌ tul᷊umang u ratung Misirẹ̌ e.

³Arawe ratu ene sarung makakědo naung i sire, ringangu pẹ̌kakěllungang kụ lẹ̌harapeng bọu Misirẹ̌ e sarung kumewạ.

⁴Manilaing manga rarolohang bọu Yehuda e makaratingu manga soang Zoan dingangu Hanes su Misirẹ̌ e,

⁵kěbị taumata e sarung měngkamea ual᷊ingu seng mạngumbahasẹ̌ su wansa kụ tawẹ gunane si sire. Kẹ̌kaěbakeng i sire e wal᷊inewe kal᷊auntu arau tul᷊umange, kaiso kawela hinakang.”

⁶Seng kere ini e tatanatang MAWU mạanung manga binatang kụ mẹ̌tẹ̌tumanạ su wanua su sěmběkan timuhẹ̌, ”Manga rarolohang mělẹ̌lurang kalide ringangu ontan sire ringangu manga poroseěng, mase lumiu wanua kụ napenẹ u hombang masasaria pẹ̌tatanakeng u singa, těmpu maghaghiadẹ̌ dingangu nagạ piạ papanide. Manga gaghěllị ene isẹ̌sěmbang sire su wansa sěmbaụ kụ tawe makatul᷊ung i sire.

⁷Tatongka wọu Misirẹ̌ e měngkate tawẹ kěhase apa. Ual᷊ingu ene Misirẹ̌ e Takụ gěllirang sasunggahị e, ’Nagạ kụ tawe makasilakạ’.”

⁸Duata e něngoro si siạ pěmẹ̌mohe kakanoạ u umatʼE ral᷊akisẹ̌ e su ral᷊ungu bukẹ̌ sěmbaụ kere tatumbal᷊ung sarang marěngụ-děngụ.

⁹Batụu, i sire e kai wansa puluang měnggohaeng su těngon Duata, puluang mẹ̌konti ringangu tawẹ běke kụ mapulu rumaringihẹ̌ těntirom MAWU.

¹⁰I sire měbẹ̌bera su manga nabi, ”Gěmingko mohong! Abe pẹ̌bera si kami apang kụ kahěngang, kaiso kawe apang kụ ilẹ̌ěnning i kami raringihang. Balạekere i kami kạtatanạ mẹ̌sẹ̌sipirẹ̌.

¹¹Pělingkạe kụ pěngal᷊ạ e ral᷊eng bal᷊ine. Kumbahang měnahaghe si kami e ringangu Ruatang Israel susi e.”

¹²Ual᷊ingu ene Ruatang Israel susi e něhengetang kere ini, ”I kamene timal᷊ikudu wawera-Ku e, ringangu mạngumbalạem pananědạ dingangu pěngangakal᷊ẹ̌.

¹³Ual᷊ingu ene tangu i kamene nẹ̌sal᷊a. I kamene mẹ̌sul᷊ungu meselẹ̌ marangẹ nahěngẹ bọu rasị sarang bawa; kụ i kamene sěngkělěndịu sarung mahaka.

¹⁴I kamene sarung mahěmpung kere kuring ěntana kụ bọu e mạběka kụ mẹ̌kal᷊iaesẹ̌, kụ bọu manga hěmpung e ene tawẹ u ikapakẹ baugu ipěngal᷊ạ tětuhẹ̌ bọu sunggilẹ̌ arau waugu ipěngiru akẹ bọu ral᷊ungu bakẹ̌.”

¹⁵MAWU Limembong Karangetange, Ruatang Israel susi e, něhengetang su umatʼE, ”Pěmpẹ̌tobate ringangu pakatatapẹ̌ bue, kụ i kamene sarungbe Takụ ambangeng. Pangimangke si Siạ dingangu naung matatapẹ̌, tangu i kamene sarung Takụ ipakatoghasẹ̌.” Kaiso i kamene kawe mạdiri!

¹⁶Katewe mal᷊ạ i kamene něhingidu tumal᷊angu wadang bọu sekẹ dingangu kạsakene kawal᷊o masahawụ. Mapia wue! Mambeng kerene i kamene hědon sarung mahuntal᷊ang! Katihọ i kamene kawal᷊o e mambeng mahawesẹ̌ tatal᷊ange sumbal᷊iau kawe manga měnanahusune něngalembong kasahawụe.

¹⁷Sěhiwu su kataune sarung tumal᷊ang makasilo pẹ̌tatingkaị u sěngkatau sědụ e, ringangu pẹ̌tatingkaị i sire limang katau kụ makakatal᷊ang i kamene kěbị. Bọu wuntuangu e kate mal᷊ěmbe papasị banehanu sěmbaụ su wowom pusigu wongkone.

¹⁸Maning kerene, MAWU e měngẹ̌ngampal᷊ẹ̌ tempone waugu měnodẹu kakěndagʼE si kamene. I Sie sadia mědeạu kuměndagi kamene. Batụu MAWU e kai Ruata kụ mẹ̌kẹ̌koạ apang suhinone. Kariangkamang apang mělẹ̌harapẹ̌ si Sie.

¹⁹Ei kamene kụ apang mạtanạ su Yerusalem, i kamene tawe měngkai hanesẹ̌ mạhungkiạ. MAWU e kai makěndagẹ̌, kụ dingangu masahawụ sumimbahẹ̌ si kamene kereu i kamene mẹ̌goghọ makitul᷊ung si Sie.

²⁰MAWU e měngonggọ u tempone wawanikạ mawěhạ si kamene mědeạu makoạ těntiro si kamene. Arawe orasẹ̌ ini e i Sie sẹ̌sane tụtaking si kamene hakịu i kamene e makạhombambe rarěnta-Ne.

²¹Kereu i kamene kawe měmpělenga wọu ral᷊eng, su l᷊ikudu e sarung ikaringihẹ̌ tingihʼE mělẹ̌hengetang u, ”Kai ini e ral᷊enge; tol᷊ẹ e ral᷊eng ini.”

²²Manga patong mahang duatanu piạ niěmboěngu sal᷊aka ringangu wul᷊aeng sarung děmekang i kamene kere lamuhụ, kapẹ̌lẹ̌hengetange, ”Pěmehọ e wọu anuku!”

²³Kereu i kamene měnawuhu wine, MAWU e sarung maparěntan tahiti tadeạu wine ene tumuwo, kụ makapěměnsạ u wuane mahěmpal᷊iung kal᷊awọe. Baugu binatang lẹ̌hikinangu e sarung kạdariahi wimbaengu rěmpugẹ̌ kụ enẹ e kawěnahe.

²⁴Sapi esẹ dingangu kalide kụ měngẹ̌ngal᷊i rahaminu e sarung kumaěng kaěngu binatang kal᷊ěnggihange kụ niriahi těntani.

²⁵Su tempong manga těndạ u sědụ i kamene e nihěbageng kụ kal᷊awọu taumatane nipate, apam bul᷊ude ringangu wongkone e sarung mapẹ̌giasu manga anạu sal᷊ụ.

²⁶Bul᷊ange sarung suměnnang kere tualagu matangěllo, ringangu matangěllo e sarung pitu sul᷊e limembong katilange wọu nạung biasa e, mẹ̌sul᷊ungu tualagu pitu ěllo nikomol᷊ẹ̌ nakoạ sěmbaụ. Kěbị ene sarung mariadi su tempom MAWU e měměkisẹ̌ dingangu mapakaul᷊eng manga lesẹ u umatʼE kụ seng niwěbahe.

²⁷Kawasa ringangu kawawantugu MAWU e ikẹ̌kasilo wọu maraune. Putung dingangu tipue měnẹ̌nodẹ u ral᷊angehʼE. I Sie mẹ̌bẹ̌bisara ringang i sire e, dingangu kal᷊awọu manga hengetangʼE mělẹ̌hěngisẹ̌ kere putung.

²⁸I Sie něngoro anging piněngal᷊imona kere lěba karangẹ u lehẹ kụ makaonodẹ̌ haghim patikụ. I Sie měminasa manga wansa, ringangu mapakaghoghahu karakin sire raral᷊akisẹ̌ e.

²⁹Arawe i kamene umatu Ruata e, sarung měmpahul᷊uasẹ̌ dingangu mẹ̌kantarị kere su hěbing pěmamantugẹ̌ agama. I kamene sarung mahul᷊uasẹ̌ kere taumata mạhundal᷊eng lẹ̌ěntudangu tẹ̌tiukangu suling mẹ̌timona Wal᷊em MAWU, tumatatawang Israel.

³⁰MAWU e sarung mapararingihu tingihʼE mawantugẹ̌ e, ringangu apan taumata e sarung makapěndang kawasa-Ne masěllahẹ̌ e. Dal᷊angehʼE sarung makakarěntam putung kụ makahěngisẹ̌, tahiti masuwenehẹ̌, tahiti watu ringangu rěllang.

³¹Tau Asyur sarung mẹ̌gẹ̌gahẹ̌ kereu makaringihẹ̌ tingihu MAWU ringangu makapěndang hukumangʼE mawěhạ.

³²Těntal᷊ang i sire makạpěndang manga ghagheserʼE, umatu MAWU e měmpạhul᷊uasẹ̌ dingangu musikẹ̌ piạ tambore ringangu kěcapi kẹ̌kobitang. Duata sẹ̌sane e sarung mẹ̌sekẹ u tau Asyur.

³³Dokeng kal᷊imona seng nisadiaěng tampạ u pěnutungang baugu ratung Asyur. Tampạ ene maral᷊ung dingangu mawěnahẹ̌, piạ lohone kalum putung mẹ̌tẹ̌tatimbo. MAWU e sarung měndikọ u ene ringangu měniụ u singongo-Ne kere sal᷊ụ u malelang.