Read Sangir YESAYA 31 Bible Online

YESAYA 31 - Sangir bible

YESAYA 31

¹Kaěngkěhang taumata apang kụ makoạ sol᷊ong Misirẹ̌ kụ mẹ̌dorong tatongka! I sire kai mạngumbala katoghasu wuntuangu sekẹ u Misirẹ̌ piạ buntuangu sumasake kawal᷊o ringangu kawal᷊one matatoghasẹ̌ ore lai karetane mal᷊awọ. Kaiso i sire tawe mangangimang su MAWU, Duatang Israel susi ringangu tawe mẹ̌darorong laontol᷊ʼE.

²MAWU e pelesa ringangu masingkạ u apang kẹ̌koatenge. I Sie mapạděntang silakạ dingangu měkoạ tingkaị e měhukungu taumata ral᷊akisẹ̌ e ringangu taumata apam měmpẹ̌tẹ̌tul᷊ung i sire.

³Tau Misirẹ̌ e tumbạen taumata, wal᷊inewe Ruata. Kawal᷊on sire e riadikang biasa, wal᷊inewe piạ kakakoạ u maruata. Kereu MAWU e mẹ̌karạdiahang, bansa mẹ̌tatul᷊ung ene e sarung masangkong dingangu wansa kụ nitul᷊unge sarung manawo. Tangu i rẹ̌dua e sarung mawinasa.

⁴MAWU e něhengetang si siạ, ”Mẹ̌sul᷊ungu singa měbẹ̌buheang u mẹ̌tẹ̌tahutěndạ u kinaěnge ringangu tawe ikatakụ u wansagẹ̌ dingangu kakiạ u měndal᷊ukadẹ̌ sěmbuntuang nasue nipasěbang pěndokạ si sie, kerene lai Iạ sarung mẹ̌paraěng dingangu mẹ̌tahutěndạ i Wongkon Sion.

⁵Kere manụ u winalangeng sěmbaụ mẹ̌kẹ̌kal᷊ipěpahẹ̌ su wowon sal᷊ehe waugu měngěllung manga pěgol᷊e, kerene lai Iạ, MAWU Limembong Kawasa e sarung měngěllung, tumatawang dingangu měngambang Yerusalem.”

⁶MAWU e něhengetang, ”Bansang Israel, i kamene sen dimokạ si Siạ dingangu mẹ̌dosa su těngo-Ku. Kaiso ini e tangu pẹ̌sul᷊ẹ e su anu-Ku!

⁷Sarung marěnta tempone i kamene kěbị měnděmmẹu manga tul᷊adang mahang duata wọu sal᷊aka ringangu wul᷊aeng kinoạ i kamene hala mapenẹ u rosa e.

⁸Asyur sarung pakawinasa su ral᷊ungu pẹ̌seketang, kaiso wal᷊inewe ringangu katoghasu taumata. Tau Asyur sarung tumal᷊ang bọu tampạ u pẹ̌saseketang, dingangu apang mangangudạ i sire e sarung koateng ěllang.

⁹Datun sire e sarung tumal᷊angu takụ dingangu manga pěrwirane apạe himěkosẹ̌, hakịu i sire němpaněntangu manga wanehan sekẹ.” MAWU e sen nẹ̌bisara, MAWU kụ sẹ̌sěmbaěng dingangu lẹ̌adateng dingangu sasěmba tẹ̌tongkateng su Yerusalem.