Read Sangir YESAYA 33 Bible Online

YESAYA 33 - Sangir bible

YESAYA 33

¹Kạěngkěhang manga sekẹ i kitẹ e! I sire e mělẹ̌hampasẹ̌ maniweng i sire tawe lahampaseng, dingangu měmpẹ̌tẹ̌tul᷊a, maningbe i sire tawe kal᷊ahinoěngu pẹ̌tatul᷊a. Kaiso wọuten něhampasẹ̌ dingangu němpẹ̌tul᷊a e, i sire hala sarung makoạ bawalaru pělahampasẹ̌ dingangu pẹ̌tatul᷊a e.

²O MAWU, tal᷊ěntukong kami e. Seng i Kau pẹ̌lẹ̌harapeng i kami e. Ěllungeko i kami wọu ěllo sarang ěllo dingangu ambangeko i kami e su tempong kasasěsẹ.

³Kereu i Kau e mẹ̌pětị dingangu apararingihu tingihʼU měgẹ̌gio e, manga wansa e sarung měmpahuntal᷊ang kụ dingangu mẹ̌kal᷊iaesẹ̌.

⁴Kere ghapaěngu kal᷊imbotonge taumata měmpěnekẹ dingangu měmpěhampasẹ̌ arětạ i sire e.

⁵MAWU e enẹ e kapiane; i Sie kawasam patikụ e. I Sie sarung mapakateing ondang-ondang dingangu kạadilẹ̌ e su Yerusalem,

⁶dingangu mẹ̌gěllịu karal᷊enehẹ̌ su manga umatʼE. Arětạ makasal᷊amatẹ̌ si sire ute kai kapelesa ringangu kasingkạ ore lai adatẹ̌ su MAWU.

⁷Taumata kụ maral᷊intoị e měkẹ̌kiạ u makitul᷊ung; apan darolohang kụ mẹ̌dẹ̌deạ dal᷊engu pẹ̌darame e měngkai mạdarubain dal᷊ungkang.

⁸Apan dal᷊eng mawawěnahẹ̌ e měngkai apạ e piạ silakạ e hakịeweng kẹ̌kararihang; kụ tawẹ apa rumaral᷊enge. Pẹ̌kakakire e tawe laitukang dingangu pẹ̌gaghighilẹ̌ e nilewangeng. Sen tawe lai nipandungang.

⁹Banua e měngkate niwala piněhio. Manga kěhung Libanon apạ e timal᷊iahu ringangu Wal᷊an Saron matawa e nakoạ kere wanua l᷊inggi. Su Basan dingangu Wul᷊udu Karmel manga raukalu e měngkai apạ e měngkạhondosẹ̌.

¹⁰MAWU e něhengetang su wansa ene, ”Ini e Iạ sarung mẹ̌pětị dingangu mẹ̌karadiahang měnodẹ u kawasa-Ku.

¹¹Hingidu e sia-sia, ringangu kěbị apang kẹ̌koateng i kamene e tawẹ gunane. Dal᷊angehu e mẹ̌sul᷊ungu putung makawinasa watangeng hala.

¹²I kamene kere himang nitutung nakoạ apụ; kere sumpinị nituwang dingangu nitutung su ral᷊ungu putung.

¹³Balạekere kěbị taumata apang marani arau marau e makạdingihẹ̌ kereapa kakanoạ-Ku ringangu mạngakuweng kawasa-Ku e.”

¹⁴Apam barạdosa su Sion něngkawintogu takụ. Angkuěng i sire, ”Putusang u Ruata e mẹ̌sul᷊ungu putung dụděllị sarang marěngụ-děngụ. Aramanung měnsang dem piạ u makatahang su ral᷊ungu putung kụ makawihua ene?”

¹⁵I kamene makakědang kereu i kamene mẹ̌bera ringangu mẹ̌koạ apang matul᷊idẹ̌ e. Kumbahang mẹ̌deạ untung dingangu měměhạ tau kasiang, dingangu kumbahang měnarimạ sasorokẹ̌. Kumbahang tumol᷊e taumata piạ karakine měmate arau kakanoạ dal᷊akisẹ̌ bal᷊ine e.

¹⁶Tangu i kamene sarung maěllung dingangu mal᷊indung, tabidạu i kamene ene su ral᷊ungu benteng kụ matoghasẹ̌. Kaěng dingangu inumang sarang mạsasadia waugʼi kamene.

¹⁷Sarung marěnta tempone i kamene makasilo sěngkatau ratu kụ mẹ̌pẹ̌parenta kụ matul᷊ende su wanua naěmpahẹ̌ sol᷊ong patikụ beọ e sude.

¹⁸Katatakụ apan seng nal᷊iu e su maghaghělle pajakẹ̌, mapapangkatẹ̌ dingangu su měnanahimata raghị e kate kạtatanạ tatahěndungang.

¹⁹I kamene sen tawe sarung lai makasilo taumata raghị tawẹ atorange kụ mẹ̌bẹ̌bera su ral᷊ungu wawera tawe kal᷊aěnnaěng i kamene e.

²⁰Kakěllako soan Sion, tampạ i kitẹ mẹ̌mantugẹ̌ manga sal᷊iwangu agama. Tatinganeko Yerusalem! Enẹ e kal᷊enehe tampạ ene waugu pẹ̌tanakeng, mẹ̌sul᷊ungu tenta kụ tawẹ běke ilẹ̌al᷊ing, kụ papasị e tawe isawụ dingangu tal᷊ine tawe mạběsụ.

²¹MAWU e sarung mapasilong kawantugʼE si kitẹ. I kitẹ sarung mẹ̌biahẹ̌ su wiwihu sal᷊ụ mawěnahẹ̌ kụ tawe kapẹ̌sakaenangu kapal᷊u sědụ.[43]

²²Kal᷊awọu apal᷊iwụ su kapal᷊ʼi sire e tawẹ gunane; manga senggọ e tawe ikawewẹ! Kal᷊awọu kakakalạu wuntuang u sekẹ e sarung pul᷊ahoěng i kitẹ, kụ dekenange enẹ e mal᷊awọ, hakịu taumata peosẹ̌ e mal᷊aing makaěbạ buạ e. MAWU e hala sarung makoạ datung kitẹ; i Sie sarung mẹ̌parenta, mapateing pělatorang dingangu měngambang si kitẹ e wọu anun sědụ.

²⁴Tawẹu sarang sěngkatau su wanuang kitẹ e mẹ̌kẹ̌kabaratang ual᷊ingu sakị, dingangu kal᷊awọu rosa e sarung ampungang.