Read Sangir YESAYA 34 Bible Online

YESAYA 34 - Sangir bible

YESAYA 34

¹Mahịe mẹ̌tampungko, ei wansa, dingangu raringihẹ̌ko. Balako patikụ dunia e, ringangu kěbị apam biahẹ̌ su ral᷊ungu e riměnta ringangu rụdaringihẹ̌.

²MAWU e limangehẹ̌ su patikụ bansa e ringangu kal᷊awọu wuntuang i sire e. I Sie sarung měhukung dingangu mapakawinasang sire.

³Manga maieti sire e sarung tawe lěbingang, kaiso mengkate niwala kerene nipakawuhụ dingangu rimarul᷊u. Manga wul᷊ude sarung pakawuhụ měngkahamụ ual᷊ingu pinělẹ̌baěngu rahan sire.

⁴ Matangěllo, wul᷊ang dingangu wituing e sarung makakorọ. Langị sarung dul᷊ungang kere rul᷊ungu karětasẹ̌. Manga wituing sarung manawo kere manga raukalu měngkahondosẹ̌ bọu kalune.

⁵ MAWU e seng něndiahing peda-Ne su sorga, kụ orasẹ̌ ini e peda ene sarung nihombang su tau Edom kụ seng niěnsakengu hukumang dingangu sarung ipakawinasa.

⁶Pedang MAWU e sarung mělapusu raha ringangu napenẹ u tawan sire e, mẹ̌sul᷊ungu kere raha ringangu tawam binatang isěmba. Batụu MAWU e něndiahin sasěmba su Bozra, dingangu nẹ̌koạ pěnanekehẹ̌ masasaria su ěntanang Edom.

⁷Taumata e sarung měngkairị kere sapi maghaěng dingangu sapi kawuhuang. Banuan sire sarung mahamụ u raha ringangu napenẹ u tawa.

⁸Seng ene e tempone MAWU e tumatawang Sion dingangu měmal᷊isẹ̌ une su manga sědụʼE.

⁹Manga sal᷊ụ u Edom sarung mẹ̌bal᷊ui makoạ kere terẹ̌, dingangu ěntanane makoạ malelang. Pěngěnsueěnge kasěllahu wanua e ruměllị kere terẹ̌.

¹⁰ Ěllo hěbi děllị ene tawe mate, ringangu tipu tumiowol᷊ẹ̌ bọu anune sarang marěngụ-děngụ. Ěntana ene sarung itěntang tạ lohone ringangu mamara-mara wọu hěnto sarang hěnto, dingangu tawẹ u sarang sěngkatau sarung lumiung ene.

¹¹Běngka ringangu landakẹ̌ e sarung makoạ panunggune, manụ baneha ringangu manụ gaga e sarung matanạ paị sene. MAWU e napakariading ěntana ene e nẹ̌kal᷊emboghang dingangu tawẹ lohone mẹ̌sul᷊ungu nạung tawe nịdiadi.

¹²Tawẹ apa ratu kụ deng nẹ̌parenta wanua ene, ringangu kěbị těmbonange e seng naghěngging.[44]

¹³Bal᷊em pẹ̌tatahamawuang e ringangu manga soane piạ pagare sarung tuwoěngu manga sumpinị dingangu rěmpugẹ̌ dingangu pẹ̌baesangu manga ral᷊ugẹ̌ ringangu manụ onta.

¹⁴Binatang dul᷊u sarung mẹ̌dẹ̌dal᷊inding su ral᷊unge; manga kastia e měmpẹ̌sasimbahẹ̌ dingangu kastiang hěbi e[45] mẹ̌dẹ̌deạ tampạ pěngangirul᷊eěnge.

¹⁵Su tampạ ene těmpu maghaghiadẹ̌ e měkẹ̌koạ sal᷊ehe, mẹ̌tẹ̌tělluhẹ̌, měngẹ̌ngighang dingangu mělẹ̌hiking manga anạ e. Manụ lěndu e mal᷊aing měmpẹ̌tẹ̌tampung dingangu parẹ̌ e sěmbaụ-sěmbaụ.

¹⁶Deakẹ e ringangu pẹ̌basako su ral᷊ungu Bukẹ̌ u MAWU: Kụ tawẹu sarang sěmbaụ bọu kěbị diadikang ene sarung mailang arau tawẹ apa parẹ̌ e. U kai kerene parentam MAWU e, ringangu i Sie hala kụ seng něnampung i sire.

¹⁷Seng MAWU e němahiạ banua ene su tal᷊oaran sire e ringangu sěngkatau-sěngkatau e něnarimạ bahageange. I sire sarung matanạ sene sarang marěngụ-děngụ, ringangu ěntana ene makoạ tataghuaneng i sire e bọu hěnto měbẹ̌bawěllasẹ̌.