Read Sangir YESAYA 35 Bible Online

YESAYA 35 - Sangir bible

YESAYA 35

¹Banua l᷊inggi ringangu ěntana mamara e sarung mahul᷊uasẹ̌, manga bungang masị kamaměsị su wimbaenge mahughěne.

²Banua l᷊inggi e mạhuntinambang kasuwenehe, ringangu měngkai apạ e mělẹ̌lagung lagun dal᷊uasẹ̌. Kapaele kere wul᷊udu Libanon kakuwal᷊ị e kere Wal᷊ang Karmel dingangu Saron. Tangu apan taumata sarung makasilo kawasang MAWU, ringangu kawawantugu Ruatang kitẹ.

³ Toghaseko l᷊ima nạung lome, ringangu pakateiko wuku nạung seng mal᷊ei.

⁴Paul᷊ịko suapan seng měngkapěndụ naunge, ”Pakatoghasẹ̌ bue naungu e, abe katakụ, Duatanu e riměnta waugu měhukung sekẹ, i Sie riměnta mapakasal᷊amatʼi kamene.”

⁵ Su tempo ene tau wuta e sarung makasilo, dingangu tau wengelẹ̌ e sarung makaringihẹ̌.

⁶Tau peosẹ̌ e sarung měpẹ̌paral᷊insọ kere rusa, tau mou e sarung mědẹ̌dahenesang u ral᷊uasẹ̌ e. U akẹ u mata e mạměsị su wanua l᷊inggi e, sal᷊ụ e lụelehẹ̌ su wimbaengu ěnne.

⁷Ěnne matětị e sarung makoạ talagạ, ěntana mahusụ e sarung makoạ kal᷊awọu simbul᷊u akẹ. Tampạ nạung kal᷊imona pẹ̌tẹ̌tanakengu asung kěhu e, sarung tuwoěngu lěntuwu ringangu pondang.

⁸Paị sene sarung piạ dal᷊eng masěllahẹ̌, ”Dal᷊eng kụ mẹ̌tẹ̌timona kasasal᷊amatẹ̌” arenge. Taumata marosa e tawe lumiu wọu ene, taumata wodo e tawe makapal᷊idẹ̌ taumata lụl᷊iu e.[46]

⁹Su tampạ ene sarung tạ apa singa, arau binatang dul᷊u wal᷊ine. Taumata apang ipakasal᷊amatu MAWU e sarung dumal᷊eng paị sene.

¹⁰Taumata kụ ilẹ̌liwiru MAWU e sarung mapul᷊ẹ; i sire sumuẹ̌ su soan Yerusalem piạ tingihe gahị i sire matal᷊oahẹ̌ ual᷊ingu ral᷊uasẹ̌ kakalẹ̌. I sire sarung mahul᷊uasẹ̌; susa naung dingangu kapapěndụ e seng nasue naparung.