Read Sangir YESAYA 36 Bible Online

YESAYA 36 - Sangir bible

YESAYA 36

¹Su ral᷊ungu taung kapul᷊o ěpạ e su parentan Hizkia ratun Yehuda e, manga soan Yehuda kụ piạ benteng e niolaěng kụ kinawatạ i Sanherib, datung Asyur.

²Bọu ene i sie něndolohu pěrwirane karangetange wọu Lakhis sol᷊ong Yerusalem dingangu těntarane maěnasẹ̌ baugu měnuntụ tadeạu Ratu i Hizkia e mẹ̌tumpěkuhẹ̌. I sire nahumpạ su soa ene ringangu nendol᷊ong tampạ su rahami kụ isẹ̌sẹ̌bạ Dahaming Měngangunsạ, maraning songe kụ mạpaelehu akẹ u talagạ bọu wowone.

³Bọu e sawohị i Hizkia těllung katau riměnta nẹ̌sombangu pěrwirang Asyurẹ̌ ene. I sire těllu sawohị ene e kai i Elyakim anạ i Hilkia těmbonangu ral᷊ohom bal᷊eng istana, i Sebna měmamohẹ u něgara, ringangu i Yoah anạ i Asaf, tulị u istana.

⁴Pěrwirang Asyurẹ̌ ene e nẹ̌bera si sire, ”Paul᷊ịko si Hizkia waweran datung Asyurẹ̌ ini e, ’Unụe i kau e makạpěndang batangengu e matoghasẹ̌?

⁵I kau mạngěnna u kětạeng bawera e makaawembe tahuakal᷊ẹ̌ dingangu katoghasu sordado tangu? I sai pạngumbalaěngu hakịu i kau wahani dumokạ Asyurẹ̌?

⁶ I kau e mambeng mělẹ̌harapẹ̌ tatongkan Misirẹ̌, kaiso ene e mẹ̌sul᷊ungu mẹ̌pẹ̌pakẹ u kalung ěhe makoạ těking; — kụ těking ene hědom mapědi kụ limanu e matěbị. Kerene lai ratum Misirẹ̌ e waugu kěbị taumata kụ mělẹ̌harapẹ̌ si sie.’ ”

⁷Tuhụ e pěrwirang Asyurẹ̌ e nẹ̌bera, ”Arau aramanung i kamene kai nẹ̌bera u i kamene mělẹ̌harapẹ̌ su MAWU Ruatanu? Su tempong i Hizkia nẹ̌parenta tadeạu tau Yehuda ringangu Yerusalem kětạeng mẹ̌kẹ̌kal᷊iomaneng su těngong pananěmbaěng su Yerusalem, bal᷊inewe niupu ene e, kawe pananěmbaeng ringangu manga tampạ u pananěmbaěng su MAWU hala?

⁸Orasẹ̌ ini e iạ e su arengu ratung Asyurẹ̌ e wahani mẹ̌bataru u kereu i kamene gělirang u kawal᷊o rua hiwu su waụ e, nal᷊ahẹ u i kamene sarung tawẹ taumatane kerene kal᷊awọe waugu sumasakene.

⁹Mẹ̌deạu měndokạ pěrwirang Asyurẹ̌ kụ manilaing kasanakenge kai i kamene wal᷊inewe sěntara, kaiso i kamene mal᷊aing mẹ̌kẹ̌karalọ u Misirẹ̌ e reng měndingọ u tatongka karetan sekẹ dingangu wuntuangu piạ kawal᷊one!

¹⁰I kamene mạngiral᷊ing u i kami e měnekẹ dingangu měmatạ banuang kamene kụ tawẹ luontol᷊u MAWU tangu? Seng MAWU e sẹ̌sane kụ něndolohẹ̌ si kami pěnẹ̌nekẹ dingangu pẹ̌gěnggoghahẹ̌.”

¹¹Bọu e angkuěng i Elyakim, i Sebna ringangu i Yoah su pěrwirang Asyurẹ̌ e, ”Tuang, pẹ̌berạ e su ral᷊ungu werang Aram dingang i kami e, i kami makạěnna. Abe pẹ̌pakẹ u werang Ibrani, měntěhang kaěnnaěng u kawanua ěnnaẹ su wowom meselu soa e.”

¹²Sasimbangu pěrwirang Asyurẹ̌ ene, ”Apa měnsang si kamene ringangu ratunu samatang iạ e irol᷊ohu ratung Asyurẹ̌ baugu paul᷊i u kěbị ini e tangu? Iạ e mal᷊aing mẹ̌bisara su kawanua kụ mạiang su meselẹ̌ ene, kụ dingang i kamene sarung kumaěng taine hala ringangu měnginung liase sẹ̌sane.”

¹³Bọu e pěrwira marangẹ ene rimarisị dingangu nẹ̌bansagẹ̌ su werang Ibrani, ”Daringihẹ̌ko apan niweran datung Asyur,

¹⁴’Abe kapulu akal᷊eng i Hizkia! I sie tawe makasal᷊amatẹ̌ si kamene!

¹⁵Abe raringihẹ̌ laologe waugu měharapẹ̌ su MAWU. Abe pěngiral᷊ing u MAWU e sarung měngambang si kamene arau mẹ̌sěding u sordadong Asyurẹ̌ e měmul᷊aho soang kamene.

¹⁶Abe raringihe i Hizkia! Iạ, datung Asyur měngansang si kamene tadeạu i kamene sěbangke wọu soa kụ pẹ̌tumpěkuhe su těngon sire. I kamene hědọ e wotonge kumaěng buang anggorẹ̌ e wọu rahaminu e hala, ringangu makateěng buang ara e wọu kalung aranu e hala ringangu měnginung akẹ bọu pahighinu e hala,

¹⁷sarung i kamene takụ ial᷊ing sol᷊ong banua sěmbaụ mạngawẹ bansanu e hala. Paị sene piạ baelu anggorẹ̌ makạonggọu anggorẹ̌ si kamene ringangu ansedu gandung makạual᷊i tapoěng baugu kaěng i kamene.

¹⁸Abe raringihe i Hizkia! I sie kětạeng měngakal᷊ẹ̌ si kamene ringangu wawerang MAWU e sarung mapakasal᷊amatʼi kamene. Mahan duatam bansa wal᷊ine e wọu nakasal᷊amatẹ̌ ngae wanuane wọu kawasaku tangu?

¹⁹Kai suapạ e manga mahan duatam banuang Hamat dingangu Arpad? Kai suapa manga mahang duatan Sefarwaim? Piạbe nahunděnta nakasal᷊amatẹ̌ Samaria?

²⁰Kai mahan duata sude wọu nakal᷊iwirẹ̌ banuane wọu kawasaku? Hal᷊ẹ̌be kereapa kụ MAWU e makasal᷊amatẹ̌ Yerusalem!’ ”

²¹Nakaringihẹ̌ ene, tumanạu Yerusalem tawe simimbang, batụu Ratu i Hizkia e seng nẹ̌parenta tadeạu i sire měngkate karěmasẹ̌.

²²Tangu i Elyakim, i Sebna ringangu i Yoah něnggehẹ pakeang i sire tatialan naunge masusa, bọu e tamai naul᷊ị su ratu apan seng niwerang pěrwirang Asyurẹ̌ ene.