Read Sangir YESAYA 37 Bible Online

YESAYA 37 - Sangir bible

YESAYA 37

¹Su tempong Datu i Hizkia nakaringihẹ̌ paraul᷊ị i sire těllu ene, i sie něnggehẹ pakeangu ringangu něluheng pakeange karong tatialan naung masusa, bọu e i sie nakoạ sol᷊ong Bal᷊em MAWU.

²Bọu e i sie rimolohi Elyakim těmbonangu istana, i Sebna i tulị u něgara ringangu manga imang mapapangkatẹ̌ baugu mẹ̌sombangu Nabi i Yesaya, anạ i Amos. I sire mal᷊aim mělẹ̌luheng pakeang i sire karong.

³Seng ini e tatanatang Hizkia kụ nihabari sire su Nabi Yesaya, ”Ěllo ini kai ěllong susan; naung i kitẹ e ihukung dingangu tongkeaneng. I kitẹ e mẹ̌sul᷊ungu wawine seng tempone mapulu měhěnding, kaiso kawe kinasuěngu toghasẹ̌.

⁴Datung Asyur seng něndolohu pěrwirane mararangẹ pangkate mědeạu pěhinakang Duata kụ biahẹ̌. I sai masingkạ MAWU Ruata e seng nakaringihẹ̌ pělahinakang ene e kụ sarung měhukung i sire apan němpẹ̌sẹ̌bạ u ene! Ual᷊ingu ene pẹ̌kal᷊iomanengko su Mawu Ruata e, waugu apan taumatang kitẹ e kụ bědan biahẹ̌.”

⁵Sarětạem bọu nakatarimạ tatanatan Datu i Hizkia ene,

⁶i Yesaya něngoro manga rarolohang ene pěhabaru ini, ”MAWU e něhengetang, i tuang tawahal᷊uasu matakụ makaringihẹ̌ pělal᷊ahẹu manga ěllangu ratung Asyurẹ̌ ene u MAWU e tawe makapěllọ i kitẹ.

⁷MAWU e sarung mapakariadin datung Asyur tumatingang sěmbaụ habarẹ̌ niusẹ̌ hakịu sie mapul᷊ẹ sol᷊ong banuane sẹ̌sane, kụ pai sene i sie sarung pateěng.”

⁸Pěrwirang Asyurẹ̌ marangẹ ene nakahombang habarẹ̌ u ratune seng naněntang u Lakhis dingangu kapẹ̌sẹ̌sekẹ e rumokạ soang Libna, tạ kararaune wọu ene. Tangu tamaị e i sie waugu mẹ̌sombangu ratune ene.

⁹Ratung Asyurẹ̌ e seng nakatarimạ habarẹ̌ u wuntuangu Misirẹ̌ suahạ u těmbonange i Tirhaka wọu Sudan kạděntane waugu měngalo si sire. Ual᷊ingu ene, ratung Asyurẹ̌ e něndingọ u suratẹ̌ si Hizkia,

¹⁰ratung Yehuda. Kere ini waweran suratẹ̌ ene, ”Kumbahangbe kaakal᷊engu riandin Duata pạngumbalaěngu ene u i kau sarung tawe manawo su l᷊imaku.

¹¹I kau e seng nakaringihẹ̌ u apam banua kụ lẹ̌aloěngu manga ratung Asyur nipakagholang marihutu. Abe pěngěnna u i kau e kawe mal᷊iwirẹ̌.

¹²Su tempong i upungku e měnggoghahẹ̌ soang Gozan, Haran, dingangu Rezef, ore lai měmate taumatang Eden kụ mạtanạ su Telasar, tawẹ u sarang sěngkatau lai wọu manga mahang duatan sire mapakasal᷊amatʼi sire.

¹³Kai suapa manga ratung soang Hamat, Arpad, Sefarwaim, Hena ringangu Iwa?”

¹⁴I Hizkia něnarimạ u suratẹ̌ ene wọu manga rarolohang dingangu nẹ̌basa ene. Bọu ene i sie nakoạ sol᷊ong Bal᷊em MAWU kụ němingkahẹ̌ suratẹ̌ ene su těngom MAWU,

¹⁵wọu e nẹ̌kal᷊iomaneng, angkuěnge,

¹⁶ ”MAWU Limembong Kawasa, Ruatang Israel, kụ mạintol᷊ang su wowong kerub,[47] i Kau e mamben Duata mang sěmbaụ něngawasa patikụ kararatuang su wowon dunia. Seng i Kau e něndiadi langị dingangu dunia.

¹⁷MAWU, mal᷊owọko reng makatingang apa měnsang mạdiadi su tal᷊oarang kami orasẹ̌ ini e. Daringihẹ e kěbị lahinakang i Sanherib si Kau Ruata, kụ biahẹ̌ e.

¹⁸I kami kěbị e masingkạ, u MAWU, manga ratung Asyur seng němpaminasa bansa mal᷊awọ dingangu něnggagholọ u kal᷊awọu wanuan sire.

¹⁹Manga mahan duatan sire mal᷊aing nitutung dingangu nighoghahẹ̌, batụu manga mahan duatan sire e mamben těngadẹ̌ tawẹ kawasane. I sire kětạeng tul᷊ada wọu kalu ringangu watu koạ u taumata.

²⁰O, MAWU Ruatang kami, liwirẹ̌ko i kami wọu tau Asyurẹ̌ ene, tadeạu kal᷊awọu wansa su dunia e masingkạ i Kau mang MAWU sěmbaụ.”

²¹Bọu e i Yesaya něndingọ u tatanata su Ratu i Hizkia u kere sasimbahe su kakal᷊iomanengu ratu,

²²MAWU něhengetang, ”Soang Yerusalem měmpạhul᷊ěge ringangu mẹ̌tẹ̌taghunalang i kau, Sanherib!

²³I kau e masingkạ i sai rẹ̌dohangengu ringangu lẹ̌hinakanengu ene? Iạ, e kai Ruatang Israel, Duata kụ susi.

²⁴I kau něndolohu rarolohang baugu pẹ̌tẹ̌taghunalang u mohongu ual᷊ingu kal᷊awọu karetan sekẹ u e, i kau e seng nakapěngawasa manga wul᷊ude mararange e su Libanon. I kau e mạngobotu i kau e seng něnuwang manga kalun cěmarane kararangetange ringangu karal᷊ěnggihange, kụ nẹ̌tatěpasu manga kěhune maral᷊oang.

²⁵I kau e mal᷊aing lụl᷊esạ u i kau e němangka sumu ringangu něnginung akẹ su kal᷊awọu wanua raghị dingangu manga sordadonu e měmpělẹ̌linda Sal᷊ụ u Nil sarang namara.

²⁶Kai tawe nakạdingihẹ̌ i kau e kěbị ene sen Takụ kẹ̌karakiang deng nạung kal᷊imona? Kụ orasẹ̌ ini e Iạ mẹ̌kakoạ e. Kai Iạ e něngonggọ u kawasa si kau waugu pẹ̌gěnggolọ manga soa piạ bentenge kụ mal᷊ěmbe kate ěnạe.

²⁷Taumata apang měmpẹ̌tẹ̌tanạ paịse tawe makakoạ apa; i sire lụhěkosẹ̌ dingangu mạtakụ. I sire mẹ̌sul᷊ungu rěmpugẹ̌ su wimbaenge arau rěmpugẹ̌ tụtuwo su wowong atụ kụ nahěgu kereu tiukangu anging daki matětị.

²⁸Kaiso Iạ e masingkạ u kěbị kakakoạ u e. Iạ masingkạ u apang kẹ̌koatengu ringangu sol᷊ong apa ral᷊engangu e. Iạ masingkạ u i kau e nẹ̌pědu kahěngang si Siạ e,

²⁹ringangu Iạ e seng nakaringihẹ̌ mạanung dal᷊angehẹ̌ dingangu obotu e. Kụ ini e Takụ saketang kakaị su irungu ringangu tal᷊i wawol᷊eng su mohongu, tadeạu i kau e Takụ bol᷊engang pakapul᷊ẹ bọu ral᷊eng niral᷊engangu piạ i kau e riměnta.”

³⁰I Yesaya e mal᷊aing něndingọ u tatanata ini si Hizkia, ”Seng ini e sarung makoạ tatiala si kau. Taung ini ringangu taung damahi taumata e sarung kumaěng gandung timuwo hala. Kaiso wọu ene e sire nakapẹ̌suang u gandung dingangu anggorẹ̌ ore lai makateěng buane.

³¹Tau Yehuda kụ bědang biahẹ̌ e sarung masorogạ kere sasuang kụ maral᷊ung kahěngang hamụ e kụ makaghěllị u wuane.

³²Su Yerusalem dingangu su wowom Bul᷊udu Sion sarung piạ taumata masal᷊amatẹ̌ e, watụ u MAWU Limembong Kawasa e sen nělahẹ u hal᷊ẹ̌ ene sarung mariadi.

³³Seng ini e niweram MAWU mạanun datung Asyur: ’I sie sarung tawe sumuẹ̌ su Yerusalem arau měngěnạ u papitị e sol᷊ong soa ene. Manga sordado piạ kěllunge tawẹ apa kụ dumani su soa ene, kụ su tampạ ene nangělikụ e tawe pětikang těndạ u pẹ̌seketang.

³⁴Datung Asyurẹ̌ e sarung mapul᷊e lumiu ral᷊eng niral᷊engange piạ i sie riměnta, tawe simuẹ̌ bọu soa ene. Iạ e MAWU, seng něhengetang.

³⁵Soang Yerusalem sarung Takụ tatawangeng dingangu Takụ ěllungang ual᷊ingu pěngangarěgang batangeng-Ku hala e ringangu riandi-Ku ringangu ěllang-Ku e i Daud.’ ”

³⁶Su hěbi lai ěndaị ene malaekatu MAWU e riměnta sol᷊ong tentan tau Asyurẹ̌ e ringangu němate 185.000 su kataune prajuritẹ̌ e. Sěngkariọěllone mal᷊uka-l᷊ukadẹ̌ e manga maietʼi sire e nẹ̌sawuhẹ̌.

³⁷Tangu simohọ e i Sanherib, datung Asyur, kụ napul᷊ẹ sol᷊ong Niniwe.

³⁸Piạ su sahěllo, piạ i sie kapẹ̌kẹ̌kal᷊iomanenge su ral᷊ungu pẹ̌kakal᷊iomanengang su mahan duata i Nisrokh, i sie nipate ringangu peda kahiang Adramelekh dingangu Sarezer, manga ahuse esẹ. Bọu ene i sire nahuntal᷊ang sol᷊ong Ararat. Tangu i Esarhadon e, ahuse lai wal᷊ine e, nakoạ datu kụ nangaweng si sie.