Read Sangir YESAYA 38 Bible Online

YESAYA 38 - Sangir bible

YESAYA 38

¹Su ral᷊ungu tempo ene i Hizkia nasakị kụ maraning mairị. Nabi i Yesaya anạ i Amos nẹ̌tiwo si sie kụ nẹ̌bera, ”MAWU e timanata tadeạu i Tuan Datu e pěnguadipẹ̌ko kěbị urusang, batụu i Tuang kai tawe maul᷊e wọu sakị. Tạ kararěnane i Tuang maněntangu dunia.”

²I Hizkia nẹ̌bihu sol᷊ong meselẹ̌, bọu e nẹ̌doa,

³”MAWU, pẹ̌tahěndungko u iạ ini e seng nẹ̌karadiahang baugʼi i Kamene ringangu satia ore lai naung burẹ̌si. Iạ e sěntiniạ mẹ̌tẹ̌tawakal᷊i tụtuhụ kapulu-Nu.” Bọu e i Hizkia simangị marasai.

⁴Bọuteng i Yesaya e tamai, MAWU e rimolohi sie

⁵nẹ̌sul᷊e kapia su anung Hizkia kụ naul᷊ị u tatanata ini, ”Iạ e kai MAWU kụ sẹ̌sěmbaěng i Daud i upungu, seng nakaringihẹ̌ kakal᷊iomanengu ringangu nakasilo akẹ u matanu. Iạ e hědong měnamba umburu mapul᷊o l᷊ima su taunge lai.

⁶I kau ringangu soan Yerusalem sarung Takụ ipěllọ bọu ratung Asyur. Soa ini sarung tatapẹ̌ Takụ ěllungang.” Bọu e i Yesaya něndolohu taumata piněmiụ buang ara ringangu niwuhane su wisul᷊i Hizkia tadeạu maul᷊e. Datu i Hizkia nakiwal᷊o, ”Apa tandane měnsang MAWU e sarung mapakaul᷊eng iạ dingangu měnsang makakarěnta saụ sol᷊ong Bal᷊em MAWU ngae?”[48]

⁷I Yesaya simimbang, ”Seng ini e tandane kụ nionggọ u MAWU si Tuan Datu u i Sie napakasěhụ u kědonʼE.

⁸Su tatěbọu orasu matangěllo koạ u Ratu i Ahas, MAWU e sarung mẹ̌koạ kěngkaune isohọ e mapul᷊ong kěhị.” Tangu simohọ e kěngkau ene mapul᷊ong kěhị.

⁹Samurin Datu i Hizkia nul᷊e, i sie němohẹen lagun daralo ini:

¹⁰”Baweraku, buhụ e maloara umburẹ̌ iạ e hinon tamai, mạngěnsue lěmbeng pẹ̌bawiahẹ̌ku e su runian tau nate.

¹¹Baweraku, iạ sen tawe lai mẹ̌panda MAWU su dunia ini, arau měmanda taumata su dunia ini.

¹²Niawaku e nạběsụ, kụ nahumpạ wiahẹ̌ku e kere tentan lukadẹ̌ kụ nigholang; mẹ̌sul᷊ungu hekạ nipotọ bọu apal᷊iwụ u pẹ̌kakahiwuangeng; su naungku Ruata e kai sarung mangěnsue pẹ̌bawiahẹ̌ku.[49]

¹³Kanandung hěbi iạ e mẹ̌kẹ̌kiaratagu sakị, tabidạu manga ruhiku e nipakahěmpungu singa sěmbaụ; kụ iạ mạngiral᷊ingu Ruata e sarung mangěnsue pẹ̌bawiahẹ̌ku e.[50]

¹⁴Tingihẹ̌ku e mangkeng kạkakělohe ringangu kạpělẹ̌lomene, mẹ̌sul᷊ungu manụ paluma iạ kụkěndungu susa. Mataku e mạl᷊owen daral᷊ingara sol᷊ong langị, MAWU, liwirẹ̌ko iạ e wọu kasasusa ini.

¹⁵Kai apạ e takụ ipẹ̌bera? Ini e kai kakanoạ u MAWU; iạ e takal᷊ahuntikilang ual᷊ingu susa naung.

¹⁶O MAWU, pakawalako iạ e pẹ̌biahẹ̌ ual᷊ingu wawera ringangu kakanoạʼU, balạekere iạ e wiahẹ̌ baugʼi Kau samatang.[51]

¹⁷Susan naungku e sarung mẹ̌bal᷊ui makoạ karal᷊enehẹ̌, i Kau nakasal᷊amatʼu[52] iạ e wọu silakạ; kal᷊awọu rosaku e seng niampungangʼU kěbị e.

¹⁸Su runian tau nate tawẹu mẹ̌dalo si Kau, taumata nate tawe makapangumbala satianʼU.

¹⁹Tumbạeng taumata wiahẹ̌ e mẹ̌dẹ̌dalo si Kau, kerẹewe sen takụ nikoạ su sahěllo ini. Taumata maghurang e mẹ̌běke su manga anạ apạe kasatiane i Kau e MAWU.

²⁰MAWU, i Kau e seng napakapiang iạ e, tangu i kami e mẹ̌kantarị u raralo su Wal᷊e-Nu, kạpangobị e kěcapi, kanandum pẹ̌bawiahʼi kami e.”[53]