Read Sangir YESAYA 39 Bible Online

YESAYA 39 - Sangir bible

YESAYA 39

¹Su piạ tempo ene, ratum Babelẹ̌ e kụ i Merodakh Baladan anạ i Baladan, nakaringihẹ̌ u Ratu i Hizkia buhụ e napia wọu nasakị. Tangu i sie rimolohu taumata apẹ̌bẹ̌bawa suratẹ̌ dingangu ghaghěllị si Hizkia.

²I Hizkia naněnsomahẹ̌ manga rarolohang ene ringangu naunge mal᷊uasẹ̌ dingangu napatodẹ kal᷊awọu kakakalạ e si sire, wul᷊aeng, dingangu sal᷊aka, manga rampa, ringangu l᷊ana mawěngi, ringangu kal᷊awọu apal᷊iwụ u sordadone. Tawẹ apa manga apa-apa su istana ringangu su kasẹ̌llahu kararatuange kụ tawe niapasilone si sire.

³Bọu ene Nabi Yesaya nẹ̌těngon Datu i Hizkia ringangu nakiwal᷊o, ”Bọu apa kal᷊awọu taumata ene? Apạe niweran sire?” I Hizkia simimbang, ”I sire e wọu Babel, banuạ e marau.”

⁴”I sire nakasilo apa su istana?” kakiwal᷊ong Yesaya kapia. ”Kal᷊awọu sabarang,” sasimbang i Hizkia. ”Tawẹ apa sạbarang kakakalạ su ral᷊ungu istana kụ tawe takụ niapasilo si sire.”

⁵Bọu e i Yesaya nẹ̌bera su ratu, ”MAWU Limembong Kawasa e něhengetang,

⁶’Sarung duměnta tempone kal᷊awọu kakakalạ su ral᷊ungu istananu, ringangu apang kụ seng nịkakomol᷊u manga i upungu sarang ěllo ini, nihengkẹ sol᷊ong Babel. Tawẹ apa kụ sarung matěntang.

⁷ Bọu anạ pulung u piạ u sarung al᷊akeng kụ koateng sawohị u istana apẹ̌tangkiang datum Babel.’ ”

⁸Datu i Hizkia simimbang, ”Mapia l᷊ai tatanatam MAWU e kụ nihabaru si siạ e.” Iạ simimbahẹ̌ kerene ual᷊ingu mạngěnna: ”Asal᷊u kararatuangku e těbewe mal᷊enehẹ̌ dingangu maghighilẹ̌ karěngụeweng iạ e wiahẹ̌.”