Read Sangir YESAYA 40 Bible Online

YESAYA 40 - Sangir bible

YESAYA 40

¹Kere ini e hengetang u Ruatanu e, ”Liwuheko, liwuheko wansa-Ku e!

²Lenehẹ̌ko naungu taumatan Yerusalem, pẹ̌berako u pẹ̌tatahuěllange seng napal᷊usẹ̌. Pẹ̌sasal᷊an sire e sen Takụ niampungang,[54] kal᷊awọu rosan sire e sen Takụ nihukung duan sul᷊e.”

³ Piạ tingihẹ̌ mẹ̌kẹ̌kiạ u, ”Riahiko ral᷊eng su wanua l᷊inggi waugu MAWU. Tul᷊idẹ̌ko ral᷊eng gẹ̌guwạ su wanua l᷊inggi e waugu Ruatang kitẹ!

⁴Apang bědạ e hinong ambungang, bul᷊ude ringangu wukide ipakatene. Ěntana piạ bukide sarung matene, dingangu, apang piạ tahantage hinong ipakal᷊ěno.

⁵Tangu kawawantugu MAWU e sarung ipakal᷊ahẹ; kal᷊awọu taumata e sarung makasahidi. Těngadẹ̌, MAWU sẹ̌sane e seng nẹ̌kědong ene!”

⁶ Piạ tingihẹ̌ kụ mẹ̌bẹ̌bera u, ”Habarẹ̌ko!” Iạ makiwal᷊o, ”Kai apa hinon takụ ihabarẹ̌ tangu?” ”Paul᷊ịko u taumata e kai kere rěmpugẹ̌, kere bungang kụ kětạeng kadodọ tempo kal᷊aholẹ e.

⁷Děmpungẹ̌ e mạhěgu ringangu bungang e mạlolang, kereu MAWU e apatiụ u anging kụ mamětị. Těngadẹ̌ bansa e mẹ̌sul᷊ungu rěmpugẹ̌.

⁸Děmpugẹ̌ e mạhěgu ringangu bungange mạlolang, arawe hengetang u Ruatang kitẹ e mẹ̌dẹ̌daragẹ̌ sarang marěngụ-děngụ.”

⁹Awịko sol᷊ong bowom bul᷊ude marangẹ kụ habarẹ̌ko wal᷊on hengetang e su Yerusalem! Pẹ̌berako ringangu tingihẹ̌ maihạ, dingangu habarẹ̌ko wal᷊on hengetang su Sion![55] Pẹ̌berako su manga soan Yehuda u Ruatang sire e sarung duměnta!

¹⁰ Kakělla, MAWU Ruata e ruměnta ringangu kawasa, waugu měngal᷊ạ tindakang e piạ mahasane. I Sie tẹ̌takinangu apan taumata kụ seng nipakal᷊iwirʼE.[56]

¹¹ Mẹ̌sul᷊ungu sěngkatau měndal᷊ukadẹ̌ domba e i Sie mělẹ̌hiking komol᷊angʼE; i Sie sẹ̌sane něnampung i sire. Manga anạu domba e nitingkul᷊unʼE mase ringangu masikome i Sie mạngahạ manga iněnge-Ne.

¹²I sai měnaku laudẹ̌ mal᷊oang dingangu pal᷊edu l᷊imane, arau měngukurẹ̌ binangaeng dingangu rangone tangu? I sai měnupa ěntana ringangu sasupane arau mẹ̌timbang bul᷊ude ore lai wongkone ringangu timbangeng piạ sasupane?

¹³ I sai tangu měngahạ u MAWU, arau maněntiro si Sie kere měnananasa-Ne?

¹⁴Kai si sai tangu MAWU nakiwal᷊o tadeạu makahombang kasingkạ dingangu katatahuěnna? I sai tangu měngonggọu tatualagẹ̌ si Sie baugu mẹ̌karadiahang kere hinone?

¹⁵Baugu MAWU e manga wansa mẹ̌sul᷊ungu akẹ sěntědọ su ral᷊ungu tatimbạ, mẹ̌sul᷊ungu wakị u awul᷊ẹ̌ sěmbaụ su timbangeng něraca; apan tahanusa e mẹ̌sul᷊ung kal᷊ahaěnge ringangu awul᷊ẹ̌ al᷊usẹ̌.

¹⁶Kěbị binatang su kěhung Libanon tawe makatimu koateng sasěmba tinongkạ; manga kakaluang e tumanị u mahal᷊i mẹ̌deạu koateng kalune.

¹⁷Patikụ bansa e tawẹ mangal᷊ene si Sie, tabidạu tawẹ apa su těngo-Ne.

¹⁸ Kụ kawe ringang i sai i kau mapulu měnul᷊ung Duata tangu? I sai lẹ̌ěnnaěngu mẹ̌sul᷊ung i Sie?

¹⁹I Sie wal᷊inewe mẹ̌sul᷊ungu tul᷊ada kinoạ u manga tukang kụ niěmboěngu wul᷊aeng dingangu piạ bawěntane sal᷊aka.[57]

²⁰Taumata kụ tawe makaumal᷊ẹ̌ měmělli wul᷊aeng arau sal᷊aka,[58] e mạmile kalu kụ tawe gampang mahenẹ. I sie mědẹ̌deạ tukange kụ matahuěnna baugu mẹ̌koạ tul᷊ada kụ tawe gampang kumiọ.

²¹Tumanị e wue i kau kụ běga wue ringangu tawe makararingihẹ̌, dingangu tawe niul᷊ị si kau rokeng nạung kal᷊imona tangu? Tumanịe wue i kau tawe nakaěnna wọu tětạ e, kereapa panẹ̌takengu dunia tangu?

²²Měndariadine mạintol᷊ang su wowong limbolongu dunia, taune pandang dararodọ kere kal᷊imbotong. I Sie němingkahẹ̌ langị kere hekạ, dingangu něnakẹ ene kere tenta waugu pẹ̌tanakeng.

²³I Sie napakariadim manga mangangawasa e tawe makakoạ apa-apa, ringangu manga těmbonange kẹ̌kailangengu kawasan sire.

²⁴I sire e kai mẹ̌sul᷊ungu sasuang buhu kụ měnětạ humětị hamụ e. Kereu MAWU e mapatiụ u anging, i sire e mamara ringangu itělạ e kere kalung gandung mahěgu.

²⁵I sai lẹ̌ěnnaěngu mẹ̌sul᷊ungu Ruata Limembong Kasusiange? Kai ringang i sai ipẹ̌sul᷊ungu i Sie tangu?

²⁶Tatingangko sol᷊ong langị, kụ titikeko! I sai napakariadim manga wituing tangu? I Sie něhundugẹ̌ si sire kere wuntuang u sekẹ, i Sie masingkạu kal᷊awọʼi sire kěbị, dingangu mẹ̌kui sěngkatau-sěngkatau su arenge. Tawẹu sarang sěmbaụ kụ mailang, kahiang kasěllahu kawasang MAWU e!

²⁷Kụ Israel, unụe i kau e masusa naungu, tabidạu MAWU Ruatanu e wěgang kau e masusa naungu tangu? Tabidạ-bidạu i Sie tawẹ konsang e su pẹ̌bawiahu, ringangu tawẹ naungu su manga hakẹ̌ u e?

²⁸Tumanịu wue i kau e wěga ringangu tawe makaringihẹ̌? MAWU e kai Ruata kakalẹ̌, kụ něndiadi patikụ dunia. I Sie tawe masasaghedẹ̌ arau mararul᷊ěpe; tingirangʼE tawe kasasẹ̌suiang.

²⁹I Sie mạnoghasẹ̌ taumata kụ mạsaghedẹ̌ e, měmẹ̌mahansang si saing kụ tawe makakoạ manga apa.

³⁰Apang mangangudạ e měngkạsaghedẹ̌ dingangu měngkạl᷊owe, manga rariọ kawuhuange měngkạsangkong.

³¹Arawe taumata kụ mạngumbala su MAWU, e sarung makahombang kuatẹ̌ buhu. I sire kai mẹ̌sul᷊ungu manụ sahedẹ̌ tụtěllạ marangẹ kahiang katoghasʼu papanide. I sire mạhuntal᷊ang kụ tawe masasaghedẹ̌, ringangu rụdal᷊eng kụ tawe mararul᷊ěpe.