Read Sangir YESAYA 41 Bible Online

YESAYA 41 - Sangir bible

YESAYA 41

¹Angkuěng u Ruata, ”Pakarěmmasẹ̌ kụ daringihẹ̌ko si Siạ, ei manga tumanạu wanua mararau. Pẹ̌dariahiko mědeạu suměbang su pěnggaghutaěng, tol᷊ọko ringangu sowako pěrkaranu. Mahịe i kitẹ sěngkapẹ̌sidang, mědeạu měmutusẹ̌ měnsang i sai nihino ringangu i sai nẹ̌sal᷊a.

²Kai i sai tangu něnganoạ mangangawasa wọu sěmběkan daki,[59] ringangu něngonggọ u watạ tawẹ ědone? I sai wue nakariadi si sie němatạ manga wansa ringangu napẹ̌samal᷊ẹ u manga ratu e waugʼi sie? Pedane nakapẹ̌sal᷊iawuhẹ̌ si sire kere awul᷊ẹ̌, papitị e nakapẹ̌kal᷊iaesi sire kere kalung ěmme mahěgu tẹ̌tiukangu anging.

³I Sie měngkate turusẹ̌ měnẹ̌nahusu ringangu tụtol᷊ọ sahaghene; laede masahawụ masarạ tawe makasenggehẹ̌ dal᷊eng.

⁴I sai mẹ̌kẹ̌karạdiahang kěbị ene tangu? I sai měnẹ̌nilakehu raral᷊engu wěke tangu? Iạ, MAWU, kai Iạ e kahumotongange, ringangu těbe ene sarang pěngěnsueěnge.

⁵Tumanạu manga wanua marau e makạsilo kai apạ e sen Takụ nikoạ. I sire himěkosẹ̌ dingangu kụkenden takụ, bọu e nẹ̌tampung sěngkapẹ̌tampung dingangu riměnta.

⁶Kěbị taumata e mẹ̌tẹ̌tatul᷊ung, dingangu lawo mẹ̌tatatoghasẹ̌ naung.

⁷Basẹ̌ u kalu mạnoghasẹ̌ naungu měnaněsal᷊ẹ̌ bul᷊aeng, i sire apang měmamipi manga uase ringangu rarupa e mẹ̌dẹ̌dalo taumata kụ měněsal᷊ẹ̌ su wowon dakilang. Angkuěnge, ’Mapia kahěngang hal᷊ẹ̌ u e’; bọu nitoghase ringangu paku, tadeạu tawe magholang.

⁸ Arawe i kau, Israel, ěllang-Ku, umatẹ̌ pinile-Ku e, i kau e kai hěnton Abraham, hapị-Ku.

⁹I kau e Takụ nial᷊ạ bọu manga pondol᷊u dunia, Takụ nikuiang bọu apan tampạ kụ kararauange. Angkuěngu wera-Ku e, ’Seng i kau e ěllang-Ku; Iạ e tawe měnanuhudu pile-Ku e.’

¹⁰Abe katakụ, u Iạ e mạněntanudẹ̌ si kau abe ghaghiantang, u Iạ e Ruatanu. I kau e Takụ ipakatoghasẹ̌ dingangu Takụ itul᷊ung, tataěngu takiahẹ̌-Ku pakatul᷊ende.

¹¹Kakěllạ e, kěbị taumata apang limangehẹ̌ si kau, sarung batakeng dingangu apạ e namea-mea. Taumata apang dumokạ si kau sarung mawinasa ringangu masue makaehẹ̌.

¹²I kau e sarung mědeạ taumata kụ dumokạ si kau e, kaiso i sire tawe ikareạ u. Taumata apang mẹ̌sekẹ dingangu, ini e seng nawihua ringangu nailang.

¹³Batụu Iạ e MAWU, Ruatanu, mạngumpaedẹ̌ limanu koaneng; bawera-Ku, ’Abe katakụ, Iạ e sarung mẹ̌tul᷊ung i kau.’ ”

¹⁴Angkuěng u MAWU, ”Abe katakụ, Israel, manịeng i kau kadodọ dingangu lome. Iạ e kai MAWU mẹ̌tul᷊ung i kau, Limembong Kasusiange, Ruatang Israel e kai Mananal᷊amatu.

¹⁵Kakěllạe, i kau Takụ koateng kere pěpal᷊u tatahidang, kụ buhu, mahoro, ringangu piạ isine ruam běhị. I kau e sarung měndal᷊inda manga wul᷊ude ringangu mapakaghoghahẹ̌ kěbị; manga wongkone sarung koatengu kere wal᷊ẹ̌ka.

¹⁶I kau e sarung měnaẹ̌ si sire, bọu ene i sire itěllạ u anging dingangu kal᷊iaesangu rěllang. I kau e sarung lumuasẹ̌ ual᷊ingu Iạ e, MAWU, ringangu lumiạgu ual᷊ingu Iạ, Ruatang Israel.

¹⁷Kereu wansa-Ku kụ soe ene kụ mědeạ akẹ, dingangu tinggol᷊ang i sire e nahangan dou e, tangu Iạ e, MAWU, sarung dumaringihẹ̌ kakal᷊iomaneng i sire; Duatang Israel tawe sarung maněntangu umatʼE.

¹⁸Manga sal᷊ụ e Takụ iapaelehẹ̌ su manga wukide kụ nal᷊inggi e; simbul᷊u akẹ e sarung sumal᷊iwěbudẹ̌ su tal᷊oarang tenene. Kěhu l᷊inggi e sarung Takụ ipakakoạ talagạ; akẹ sarung měgiasẹ bọu ěntana mamara e.

¹⁹Bimbaenge l᷊inggi e sarun Takụ suangeng u kalun cěmara, kalun zaitun, kalum murad,[60] dingangu kalung akasia. Bimbaenge l᷊inggi e sarun Takụ ipakakoạ kěhu, kěhun cěmara sihinge, kalu wuane piạ pisine makětị dingangu cěmara.

²⁰Tangu kěbị taumata e sarung makasilo ringangu makakasingkạ u Iạ, MAWU e, kụ mẹ̌kakoạ e. I sire sarung kumakělla ringangu makahěngang Duatang Israel susi e napakariading ene.”

²¹MAWU, ratung Israel, něhengetang su manga mahan duata, ”Sowako pěrkarang kamene, kụ paul᷊ikong kal᷊awọu alasange!

²²Děntako, ringangu pěněbal᷊ẹ̌kong apan sarung mariadi e, tadeạu i kami e masingkạu pěngěnsueěnge sarung. Paul᷊ịkong apan nariadi kal᷊imona e, tualageko mangal᷊ene tadeạu i kami e mẹ̌kakělla wue.

²³Pěberạe apa sarung mariadi, tadeạu i kami masingkạu i kamene e mamben těngadẹ̌ duata. Koạ apam piạ gunane arau makakarugi e, tadeạu i kami e maherang makasilo e.

²⁴Tuhụ hinone, i kamene ringangu kakanoạu e tawẹ apa, ringangu apang měmpẹ̌dalo si kamene e měngkate samatang makạdarěnting.

²⁵Iạ e seng něnganoạ sěngkatau wọu sěmběkan daki; Takụ kuiang i sie ipěngalo wọu sěmběkan sawěnahẹ̌. Manga měngangawasa e sarun tatahidaěnge kere lěbo, mẹ̌sul᷊ungu tahakọa kuring mẹ̌dẹ̌dal᷊inda ěntana masipul᷊ụ.

²⁶I sai wọu i kamene seng něněbal᷊u ene, hakịu i kami e mapěhinon sie! Kaiso wọu tal᷊oarang kamene e tawẹ u naul᷊ị, tawẹ u nakaringihẹ̌ si kamene mạhumbisara.

²⁷Iạ e, MAWU, kụ kahumotongange měhabarẹ̌ su Sion; Iạ e něndingọ mẹ̌bawawa habaru kasasal᷊amatẹ̌ e sol᷊ong Yerusalem.

²⁸Piạ e Takụ dẹ̌deakeng su tal᷊oarang manga mahan duata e, tawẹu sěmbaụ makaonggọu tatul᷊ada, tawẹ apa kụ deng makasimbahẹ̌ e.

²⁹Těngadẹ̌, manga mahan duata ene e tawẹ gunane, i sire tumbạen tul᷊ada niwěmbing kụ tawe makakoạbe apa, ringangu tawe makaumal᷊ẹ̌ mẹ̌koạ manga apa.”