Read Sangir YESAYA 42 Bible Online

YESAYA 42 - Sangir bible

YESAYA 42

¹ Angkuěngu MAWU, ”Seng ini e ěllang-Ku Takụ tingkul᷊uang, taumata pinile-Ku makạl᷊uasẹ̌ naung-Ku e. Iạ e seng něngonggọ kawasa-Ku e si sie, waugu mẹ̌bawa kạadilẹ̌ baugu apam bansa e.

²I sie sarun tawe měmansagẹ̌ arau mẹ̌kiạ pakaihạ, tingihe tawe sarung ikaringihẹ̌ su ral᷊eng.

³Hiung napěkuhẹ̌ e tawe sarung pědiang, sol᷊o mẹ̌dẹ̌dusẹ̌ e tawe tiukang. Dingangu satia i sie sarung mělahẹ u katul᷊idẹ̌,

⁴tawẹ taghiawahe arau tawe ghuměnggang, sarang kaadilẹ̌ e ipakatei su dunia. Bansa apam mararau e mẹ̌kẹ̌karalọ u těntirone.”

⁵ MAWU Ruata e něndiadi ringangu němingkahu l᷊angị; i Sie němangung dunia ringangu kal᷊awọu apang tụtuwo su wowone. I Sie něngonggọu singongom pẹ̌bawiahẹ̌ dingangu niawa. I Sie něhabaru tatanata ini su ěllangʼE,

⁶ ”Iạ, MAWU, nẹ̌kui ringangu napěmunarang kau waugu měndal᷊engu kạadilẹ̌. I kau e Takụ tataěng dingangu Takụ hikinang mědeạu makoạ pẹ̌kakakědo waugu taumata, ringangu tualagẹ̌ baugu patikụ bansa.

⁷Baugu měmekesẹ̌ matan tau wuta e, ringangu měliwiru taumata wọu kararěndungu tahungkụ.

⁸Iạ e kai MAWU, kai ene areng-Ku; kawawantugẹ̌-Ku tawe Takụ ionggọ si sai-sai; kal᷊aadatẹ̌-Ku e tawe Takụ isarakang su tul᷊ada.

⁹Orasẹ̌ ini e apan Takụ nitěbal᷊ẹ̌ e seng nakoạ mal᷊ahẹ; Iạ e mapulu měhabaru apang hal᷊ẹ̌ buhu; kụ kal᷊imonang ene mariadị e, sen Takụ pinẹ̌bera si kau.”

¹⁰Pẹ̌kantarịkong kakantarị buhu e waugu MAWU, pẹ̌daloko si Sie, ei patikụ dunia! Pẹ̌gaghal᷊ẹ̌gehẹ̌ko, ei laudẹ̌[61] dingangu kal᷊awọu lohone, manga wanua mararau ringangu kal᷊awọu tumanạ e!

¹¹Kěnangko apan banua l᷊inggi e ringangu apan soane měmpẹ̌dalo MAWU, kěnangko tumanạ u Kedar mẹ̌dalo si Sie! Kěnangko tumanạ u soan Sela měmpahul᷊uasẹ̌ dingangu měmpẹ̌tahimokoi wọu wowom bul᷊ude?

¹²Mapiawe i sire pěmpẹ̌dalo MAWU, ringangu mapakateleng i Sie su manga wanua mararau.

¹³MAWU e tamai mẹ̌tohạ kere sěngkatau mol᷊ensekẹ, mẹ̌sul᷊ungu sěngkatau sordado napinunụ u kal᷊okom mẹ̌sekẹ. I Sie měngahạ u wansagu pẹ̌sasekẹ, dingangu manodẹ u kal᷊aotelẹ̌ su těngon sekẹ.

¹⁴Duata e nẹ̌hengetang, ”Sem marěngụ Iạ e němou; Iạ e marěmasẹ̌ dingangu mẹ̌tẹ̌tingkědangu watangeng. Kụ ini e semben tempone mědeạu kumanoạ, dingangu Iạ e mapulu měmansagẹ̌ mẹ̌kiaratagẹ̌ kere tau wawine mẹ̌lẹ̌hěnding.

¹⁵Bul᷊ude ringangu wongkone sarun Takụ ipakal᷊ungguhẹ̌, patikụ sasuange Takụ ipakalolang. Manga wal᷊an sal᷊ụ e Takụ bal᷊uiang makoạ banua l᷊inggi,[62] patikụ dano e Takụ ipakamara.

¹⁶Bansa-Ku apam buta e sarun Takụ ahakeng bọu ral᷊eng kụ tawe susingkạ i sire; i sire sarun Takụ ahakeng su apan dal᷊eng kụ tawe ikakiral᷊an sire. Kararěndung e Takụ ipakariadin tualagẹ̌ e waugʼi sire, dingangu apan dal᷊eng piạ bongkone ringangu wal᷊ane Takụ ipakatene. Kụ seng ene e Takụ koateng baugʼi sire, kụ nal᷊ahẹ u sarun Takụ pakariadi.

¹⁷Taumata kụ mạngimang su tul᷊adam mahan duata ringangu mạngakung ene kere ruatan sire e, sarung hinakaneng dingangu tahumeang.”

¹⁸MAWU něhengetang, ”Pẹ̌daringihẹ̌ko, ei taumata apam bengelẹ̌! Kakěllako, ei taumata apam buta!

¹⁹I sai tangu něngalembo wuta wọu Israel ěllang-Ku e? I sai něngalembom bengelẹ̌ bọu rarolohang-Ku e?

²⁰Israel, mal᷊awọ sen kinasilonu, kaiso tawe tatatinganengu, tul᷊inu e kạbawuka, kaiso i kau tawe rumaringihẹ̌.”

²¹MAWU e mapulu měngambang: i Sie mapulu titanʼE adateng dingangu apakawantugẹ̌.

²²Kaiso wansa ene e sen nasue nihampasẹ̌; i sire niaresẹ̌ su ral᷊ungu manga huange su al᷊ungu ěntana, ringangu nitaho su ral᷊ungu manga tahungkụ. I sire makoạ pahurum pělahampasẹ̌ e, ringangu tawẹ u riměnta něngonggọu tul᷊umang.

²³I sai wọu tal᷊oarang kamene mapulu rumaringihẹ̌ hal᷊ẹ̌ ini, e ringangu tumingang ene e sarang karěngụ e tangu?

²⁴I sai tangu něnarakangu Israel mědeạu pakihampasẹ̌ e? Bal᷊inewe MAWU sẹ̌sane tangu? Baugu i Sie e i kitẹ nẹ̌dosa, i kitẹ e tawe nẹ̌biahẹ̌ timuhụ titanʼE, ringangu tawe tumuhụ těntironʼE.

²⁵Tangu i Sie e niapẹ̌pěndang i kitẹ e kereapa kasěllahu ral᷊angehʼE si kitẹ, dingangu nẹ̌tatahang ual᷊ingu pẹ̌sasasekẹ marial᷊u. Ral᷊angehʼE makatutung su Israel kere putung, kaiso i kitẹ e tawe nakapěndang ene, e ringangu tawe něngěndung apan seng bọu himombang si kitẹ e.