Read Sangir YESAYA 43 Bible Online

YESAYA 43 - Sangir bible

YESAYA 43

¹Israel, kere ini angkuěngu MAWU, ”Kai Iạ e něndiadi ringangu nẹ̌koạ si kau, abe katakụ! I kau e mamben Takụ ipakasal᷊amatẹ̌! Iạ e sen nẹ̌kui si kau ringangu arengu, i kau e kai tataghuaneng-Ku.

²Kereu i kau e luměbạ akẹ e, Iạ sarung maněntanudẹ̌ si kau e tawe miwul᷊usẹ̌ su ral᷊ungu kal᷊awọu kasasịgěsạ u. Kereu lumiu putung, i kau e tawe mahěngisẹ̌, kal᷊awọu manga sasal᷊ukạ mawawěhạ e sarun tawe makasilakạ si kau.

³U kawe Iạ e MAWU, Ruatanu, Ruatang Israel susi e Mananal᷊amatẹ̌ si kau. Misirẹ̌ e Takụ gěllirang kere tatubusu, Sudan dingangu Syeba e kere laaweng si kau.

⁴I kau piạ arẹ̌gane su mata-Ku, Iạ e mạngarěga ringangu kụkěndagʼi kau e; tangu Takụ gěllirang u taumata kere laaweng si kau, manga wansa e kere laaweng niawanu.

⁵Abe katakụ, u Iạ e maněntatnudẹ̌ si kau. Bọu wahẹ dingangu wọu raki Takụ nioro manga anạ u ringangu manga pulungu apạděnta pẹ̌tẹ̌tampung.

⁶Takụ parentang apan su sěmběkan sawěnahẹ̌ dingangu timuhẹ̌, tadeạu i sire lighạbe pakipěllọ. Manilaing manga anạ u manga esẹ e měmpẹ̌sul᷊e wọu mararau, ringangu manga anạ u manga wawine e měngkapul᷊ẹ bọu manga pondol᷊u dunia.

⁷Batụu i sire kěbị e sen nikuiang dingangu areng-Ku, i sire e Takụ niriadi waugu pěmantugẹ̌ si Siạ.”

⁸Duata e něhengetang, ”Oroko apakahawịko sol᷊ong horone, wansa-Ku kụ apam buta e, manimbe si sire piạ matan sire; apam bengelẹ̌ e manilaim piạ tul᷊ine.

⁹Pěngoroko patikụ bansa e pẹ̌tampung dingangu kal᷊awọu hěnto e apẹ̌komol᷊ẹ̌. Kai i sai wọu tal᷊oaram manga mahan duatan sire e sen něhabaru apang kụ sem mariadi orasẹ̌ ini ngae? I sai něhabaru wọu tal᷊oaran sire e makatěbal᷊u apa mariadi su tempo rahami ngae? Balạekere manga sahidin sire apasěpụ dingangu měmpělahẹ̌ u i sire e kahěngang bue, tadeạu kěbị apan nakaringihẹ̌ si sire e nẹ̌bera, u mambeng kerene.

¹⁰Ei umatẹ̌-Ku, seng i kamene e manga sahidi-Ku e, i kamene Takụ pinile makoạ manga ěllang-Ku, tadeạu makakiral᷊a si Siạ dingangu mangimang si Siạ, ore lai makahěngang u kai Iạ e Ruata. Iạ e kai Ruata Mang Sěmbaụ, tawẹ apawe wal᷊ine kal᷊imona ringangu samuring Iạ e.

¹¹Kai Iạ sẹ̌saku e MAWU, sul᷊iung Iạ e tawẹ apa kụ makasal᷊amatẹ̌.

¹²Iạ e sen něhabarẹ̌ si kamene, kai Iạ e makasal᷊amatẹ̌ si kamene, dingangu wal᷊inewe ruata raghị kụ ene su tal᷊oarang kamene; seng i kamene e makoạ manga sahidi-Ku. Dingangu Iạ e, kai Iạ ini e Ruata,

¹³baugu sarung marěngụ Iạ e tatapẹ̌ Duata. Tawẹ apa kụ makakal᷊iwirẹ̌ bọu kawasa-Ku, arau měnahaghe karaki-Ku.”

¹⁴MAWU Mananal᷊amatu e, Susi e Israel, nẹ̌bera, ”Baugʼi kamene e, něndingọu sordado sol᷊ong Babel, kụ Takụ nitěnehẹ̌ manga kakal᷊ehẹ̌ tukadu tahungkụ; gaghiong manga tau Kasdim Takụ niwal᷊ui kakindoạ.

¹⁵Kai Iạ e MAWU, Ruatanu susi, Ratunu, kụ něndiadi si kau, ei Israel!”

¹⁶MAWU e seng nẹ̌koạ dal᷊eng sěmbaụ lumiu l᷊audẹ̌, lumiu akẹ gụgal᷊ěgehẹ̌ e.

¹⁷I Sie rimolohu sordado ringangu manga pěrwirane nipẹ̌sekẹ, kụ i sire nipatol᷊ọ dingangu kareta piạ kawal᷊one. Kaiso i sire nanawo, kụ seng tawe saụ nakapẹ̌pětị kapiạ, i sire něngkapate kere sobu naědusẹ̌.

¹⁸MAWU e něhengetang, ”Tawẹ gunane mẹ̌tahěndung tempo nal᷊iu, tawẹ kěhase mẹ̌tahěndung apan sen napaghohẹ̌ e.

¹⁹Tatingangke, Iạ e sen nẹ̌koạ hal᷊ẹ̌ buhu; kụ ini e seng nanětạ, kụ kai tawe nakasilo i kau tangu? Iạ e sarung mẹ̌koạ dal᷊eng su kěhu l᷊inggi, ringangu manga sal᷊ụ su kěhu mal᷊oang.

²⁰Binatang dul᷊u e sarung měmantugẹ̌ si Siạ; dal᷊ugẹ̌ dingangu manụ onta e sarung mẹ̌dalo si Siạ batụu Iạ e mapaelehu akẹ su wanua l᷊inggi, ringangu manga sal᷊ụ su kěhu mal᷊oang baugu měngonggọu inumang su manga umatẹ̌ pinile-Ku e.

²¹I sire e wansa kụ Takụ kinoạ baugu watangeng-Ku tadeạu makapěhabaru raralo si Siạ e.”

²²MAWU e něhengetang, ”Kai i kau e Israel, tawe naněmba si Siạ, dingangu tawe lai nẹ̌kal᷊iomaneng si Siạ.

²³I kau e tawe nẹ̌bawa domba waugu ghaghěllị tẹ̌tongkateng e, tawe měngangadatẹ̌ si Siạ dingangu sasěmbanu. Sěmbal᷊iau Iạ e tawe měmaměhạ si kau ringangu gaghěllị, arau manịgěsạ si kau ringangu měnuntụ kamania.

²⁴I kau tawe němělli wuwụ mawěngi waugʼu Iạ e, tawe napakasaheng Iạ e ringangu tawang binatang gaghěllị u pẹ̌potokange. Su sěmběkane i kau e kawe naměhạu Iạ e ringangu kal᷊awọu rosanu e, nanigěsạ Siạ e ringangu kal᷊awọu pẹ̌sasal᷊anu.

²⁵Kaiso Iạ e kawe Ruata měngangěmmụ dosanu, Iạ e měngampung si kau e, u kawe ual᷊ingu kerene lulu-Ku e; Iạ e tawe mẹ̌tatahěndung dosanu e.

²⁶Ul᷊ikeko Iạ e, wọete i kitẹ sol᷊ong pěnggaghutaěng e, pěngalakẹ̌kong pěrkaranu e tadeạu i kau e kahěngang.

²⁷Manga i upung gaghurangu kụ kahumotongange[63] sen nẹ̌dosa, apam pangahạ u e sen němpẹ̌bawal᷊ětohẹ̌ su těngo-Ku,

²⁸manga imang u e seng nakal᷊amuhụ[64] Banala-Ku e. Tangu Israel Takụ nisarakang mědeạu pakitongkeane, hiten Yakub Takụ pakawala pakiupu.”