Read Sangir YESAYA 44 Bible Online

YESAYA 44 - Sangir bible

YESAYA 44

¹MAWU e něhengetang, ”Daringihẹ̌ko, ei Yakub ěllang-Ku e, ei Israel, umatẹ̌ pinile-Ku e.

²Iạ e kai MAWU něndiadi si kau, nẹ̌koạ si kau ren dokeng bọu gandongang, dingangu nẹ̌tul᷊ung i kau. Kumbahang matakụ, i kau e kai ěllang-Ku, umatẹ̌ pinile-Ku, ikẹ̌kěndagẹ̌.

³U Iạ sarung měměmbingu akẹ su ěntana kụ mamara, ringangu mapaelehu manga sal᷊ụ su ěntana kimaigẹ̌. Iạ e sarung mẹ̌gěllịu kawasa-Ku e su manga hitenu ringangu měngal᷊amatẹ̌ manga anạ u ringangu pulungu.

⁴I sire sarung tumuwo mapia kere rěmpugẹ̌ marěduhu akẹ, kere kalung gandarusa su wiwihu sal᷊ụ.

⁵Sěngkatau-sěngkatau sarung měngakum batangenge tataghuaneng-Ku, kụ duměnta mẹ̌dal᷊aụ u hiten Yakub. Sěngkatau-sěngkatau e měmohẹ su l᷊imane u: Tataghuanengu MAWU, ringangu mẹ̌sěbạ u watangenge, laesu wadangu umatu Mawu Ruata.”

⁶ Seng ini e angkuěngu MAWU Limembong Kawasa, Ratu ringangu měngangěllung Israel, ”Iạ e kai Ruata Man Sěmbaụ, kahumotongange ringangu pěngěnsueěnge.

⁷Kai i sai tangu mẹ̌sul᷊ungu Iạ e? Oroiko i sie apěngaku! Balạete i sie apěhabarẹ̌ dingangu apělahẹ si Siạ! I sai seng něněbal᷊u tempo ramahi nanětạ bọu panẹ̌takenge sarang pěngěnsueěngu tempo e tangu?[65]

⁸Bansa-Ku, abe katakụ arau abe hěkosẹ̌; bal᷊inewe seng bọu tětạe sarang orasẹ̌ ini e Iạ seng něněbal᷊u apa sarung mariadi tangu? Seng i kamene ini e kal᷊awọu sahidi-Ku. Měngangěllung bal᷊ine e tawẹ apa, ringangu tawe Takụ kakakiral᷊a.”

⁹Taumata apam měmpẹ̌kẹ̌koạ tul᷊adang mahan duata ene e tawẹ gunane, ringangu manga mahan duata kụ sẹ̌sěmbaěng i sire e tawẹ kěhase. Apam měmpěnẹ̌němba tul᷊ada ene e wuta ringangu wẹ̌gambeng apa-apa, ual᷊ingu ene i sire e sarung měngkamea.

¹⁰Sia-sia wue mẹ̌koạ tul᷊ada wěmbing dingangu maněmba ene kere mahan duata.

¹¹Mamben těngadẹ̌, kěbị taumata apang mạněmba tul᷊ada e měngkamea. Taumata kụ mẹ̌koạ tul᷊ada ene e kai taumata wiasa. Oroko i sire apasěpụ sěngkasěpụ; nal᷊ahẹu i sire matakụ dingangu mamea.

¹²Kipung e něngal᷊ạ uase sěmpotọ bọu ene luhudange su ral᷊ungu putung kụ taghal᷊ẹ̌ tẹ̌tukang u manga rarupa. I sie nẹ̌koạ ene ringangu kasěllahu toghasʼu wadange. Těntal᷊ang kapẹ̌kẹ̌karadiahange, i sie mạhutung, mạdou ringangu mạdul᷊ěpe.

¹³Basẹ̌ u kalu měngukurẹ̌ kalu. I sie měnggambarẹ̌ duhine ringangu apụ, měngukirẹ̌ dingangu manga pakakase ringangu kinoạ e tul᷊adan taumata kụ enẹ e mal᷊epatẹ̌, mase ipělọ e su ral᷊ungu wal᷊ene.

¹⁴Aramanung kalu nipakẹ e kai kalun cěmara, kalun cěmara sihinge arau kalun sol᷊o kụ nituwange su kěhu. Aramanung lai i sie nẹ̌suang u kalun dampa mase, měngampal᷊ẹ̌ saran tahiti makakatuwon sie.

¹⁵Sěmbahageang bọu kalu ene nikoạ e kalun dapuhang baugu měndarang dingangu mẹ̌tongkạ borotẹ̌, dingangu mẹ̌tongkạ kinạ, kụ maundangke sěbị e. Kụ i sie něndarang mase nẹ̌bera, ”Heute, arawe temange kasědapẹ̌ e ringangu katětị e! Apạ e kapia ihạ u putung ini e!” Lěmbeng kalu ene nipakẹ e waugu ipẹ̌koạ tul᷊ada. I sie kimakurung nẹ̌suba ringangu nẹ̌kal᷊iomaneng, ”I kau e ruataku, ambangeko iạ!”

¹⁸Apạ e kawodoke taumata kerene! I sire měnẹ̌nakạ mata ringangu naung i sire e hakịu tawe makaěnna apa.

¹⁹Mẹ̌kakoạ tul᷊ada ene tawe nakarating nẹ̌tiněnna, ”Kalu ene e sěmbahageang takụ dikotang, mase woheng e takụ ipẹ̌tongkạ borotẹ̌ dingangu ipěnamehẹ̌ kinạ darěling kaěngku. Mase lěmbeng kalu ene takụ koateng tul᷊ada. Kụ orasẹ̌ ini e iạ měnẹ̌němba kalu sěmpotọ!”

²⁰Kakanoạ ene e měngkate mẹ̌sul᷊ungu kụkaěng awul᷊ẹ̌. Tau ene nipal᷊idu tiněnnane wodo, hakịu i sie e selain tawe natul᷊ung. I sie tawe makapangaku u tul᷊ada kụ su l᷊imane ene e kawe tahuakal᷊ẹ̌ samatang.

²¹MAWU e něhengetang, ”Tahěndungeko kěbị ini e, ei Israel, u kai i kau e ěllang-Ku. Iạ nẹ̌koạ si kau, ringangu i kau e ěllang-Ku, Israel, Iạ e sarun tawe miwul᷊eng kau e.

²²Sal᷊anu e Takụ liwuaheng kere winawa, dosanu e Takụ ipakapụa kere hiwụ. Pẹ̌sul᷊eko su anu-Ku, watụ u Iạ e seng něliwirʼi kau e!”

²³Pahul᷊uasẹ̌ ore pahul᷊iagẹ̌, ei langị, pěmpẹ̌gion dal᷊uasẹ̌, ei wahageangu wanua su ral᷊unge! Pahul᷊uasẹ̌ ore pahul᷊iagẹ̌, ei manga wawul᷊urange! kerene lai kěhu ringangu apang kakaluang su ral᷊unge! Batụu MAWU e seng nělahẹ u kawantugʼE dingangu něnubusẹ̌ Israel umatʼE.

²⁴Kere ini e hengetangu MAWU e Mananal᷊amatʼu e, kụ seng napakariading kau e ren dokeng bọu gandongang, ”Iạ e MAWU napakariadim patikụ e, kụ batangeng hala e němingkahẹ̌ langị e, ringangu tawẹ apa kadiongeng laontol᷊ẹ̌ mẹ̌koạ banua e.

²⁵ Kai Iạ e nakal᷊uka pananěbal᷊u tahapaněbal᷊ẹ̌ dingangu nakapẹ̌taghunalang tahatariang. Baweran tau masingkạ e Takụ dẹ̌dendehang, kapelesan sire e Takụ kẹ̌koateng kawawodokẹ̌.

²⁶Seng Iạ e mạnoghasẹ̌ baweranu manga ěllang-Ku e, ringangu mẹ̌kẹ̌koạ hingidẹ̌ kụ ilẹ̌lahẹ u rarolohang-Ku, Iạ e něhengetang u Yerusalem saụbe sarung pẹ̌tanakeng kapia; ringangu manga soan Yehuda e sarun Takụ pẹ̌tikang kapia; kụ manga ěnnạ e sarung ul᷊ikang.

²⁷Seng Iạ e něhengetang su wal᷊ang laudẹ̌ e: Kaohọe! Iạ e kai mapulu mapakamarang manga sal᷊ụ u.

²⁸ Seng Iạ e nẹ̌bera si Kores, ’I kau e sarung mẹ̌parenta si Siạ, dingangu mẹ̌koạ kal᷊awọu kapulu-Ku. Pěngoroko tadeạu Yerusalem pẹ̌tikang kapia, ringangu Wal᷊em MAWU e pělokangbe wawěntane.’ ”