Read Sangir YESAYA 45 Bible Online

YESAYA 45 - Sangir bible

YESAYA 45

¹MAWU e seng němile si Kores nakoạ datu; i sie nitěbọ baugu měmatạ manga wansa ringangu waugu měmekohẹ̌ kawasam mararatu e. MAWU e sarung měmuka manga pasěllangengu soa waugʼi sie, tawe mal᷊ěmbe sarang sěmbaụ kụ dem mạl᷊ahěping. MAWU e něhengetang si sie,

²”Iạ e sarum měndiahin dal᷊eng baugʼi kamene; bul᷊ude ringangu wongkone sarun Takụ ipakatene, manga tukadẹ̌ tambaga e sarun Takụ ipakawawěka, ringangu manga papal᷊e tukadẹ̌ bọu uase e Takụ papědiang.

³Tangu i kau e sarun Takụ gěllirang u arětạ kakakalạ kụ mạbawuni, tadeạu i kau e masingkạ u kai Iạ e MAWU, Ruatang Israel, kụ sen nẹ̌kui si kau ringangu arengu.

⁴I kau e Takụ kuiang dingangu Takụ gěllirangu pangkatẹ̌, manịeng i kau e wěgaweng Iạ e. Takụ oroěng i kau e pẹ̌tul᷊ung u Israel ěllang-Ku e, batụu i sire e kai wansa pile-Ku e.

⁵Iạ e kai MAWU, tawẹ u wal᷊ine, Iạ e kai Ruata Limembong Kawasa. I kau e seng Takụ nipẹ̌papangaghidẹ̌, manimbe i kau e wěgaweng Iạ e.

⁶Patikụ ene e Takụ kinoạ tadeạu wọu sěmběkan daki e sarang sěmběkam bahẹ e, kal᷊awọu taumata e masingkạ u kai Iạ e MAWU, tawẹ apa ruata wal᷊ine sul᷊iung Iạ e.

⁷Seng Iạ e napakariadin tualagẹ̌ dingangu kararěndung, Iạ e maparěntang al᷊amatẹ̌ dingangu silakạ. Seng Iạ e MAWU nẹ̌koạ patikụ ene.

⁸Bọu langị e Takụ nipal᷊intụ u pěmamatạ kere tahiti, dunia e namingkahu watangenge waugu měnarimạ u ene, wọu e mapatuwong kasasal᷊amatẹ̌ dingangu karal᷊iwirẹ̌; Iạ e kai MAWU kụ nẹ̌koạ ene pinakariadi.”

⁹Kaěngkěhang taumata kụ mẹ̌dẹ̌darendehẹ̌ dingangu Měndariadine; i sie mẹ̌sul᷊ungu kuring dụdokạ taumata mẹ̌kakoạ e. Apa měnsang ěntana masipul᷊ụ e makịbal᷊o su mẹ̌kakoạ kuring, ”I kau kai kapẹ̌kẹ̌koạ e apa?” Apa měnsang kuring e mẹ̌kẹ̌kasiang u mẹ̌kakoạ e tawẹ apa kasingkạ e?

¹⁰Kạěngkěhang taumata kụ mẹ̌bẹ̌bera su manga ghaghurange, ”Unụe iạ e kinawantelẹ̌ kere ini tangu?”

¹¹MAWU Ruatang Israel susi e nẹ̌bera, ”Kiwal᷊oiko Iạ e mạanun tempo ramahi. Kaiso kumbahang makiwal᷊ong manga anạ-Ku, arau rumolohu Iạ e pẹ̌koạ manga apa.

¹²Iạ e kai MAWU něndiadi runia, ringangu mapakạdiadin taumata waugu tumanạ e. Dingangu kawasa-Ku Iạ e něngěmpahu langị, dingangu nẹ̌parenta matangěllo, wul᷊ang dingangu manga wituing.

¹³Kai Iạ e něnganoạ si Kores waugu apẹ̌děndal᷊eng timona-Ku e ringangu apạteing kạadilẹ̌ e. Iạ sarung mapakateneng kěbị dal᷊eng lẹ̌liuange. I sie sarung měmangung kapia soa-Ku Yerusalem dingangu měliwirẹ̌ umatẹ̌-Ku kụ nitaweng, tawẹ sasoroke dingangu tawẹ bawaehe.” MAWU Limembong Kawasa e seng nẹ̌bisara.

¹⁴MAWU e něhengetang su Israel, ”Taghuanẹ e ghěsing ěntanang Misirẹ̌ e ringangu untungu Sudan. Apan tau Syeba kụ masasadadạ e makoạ tataghuanengu; i sire rimal᷊eng su l᷊ikudu e kạl᷊ahapusẹ̌. I sire sarung mẹ̌suba ringangu měngaku, ’u Ruata e kahěnga-hěngang su tal᷊oaranu; tawẹ duata sul᷊iun Sie.

¹⁵Duata kụ makasal᷊amatẹ̌ Israelẹ̌ e kai Ruata kụ měmẹ̌muning batangengʼE.

¹⁶Kal᷊awọu taumata kụ mẹ̌kẹ̌koạ tul᷊adang mahan duata e; sarung tahumeang dingangu lẹ̌heghesang.

¹⁷Arawe Israelẹ̌ e ipakasal᷊amatʼu MAWU; kasasal᷊amatẹ̌ e sarung mauwuhẹ̌. I kamene tawe sarung ipakamea ringangu heghesang sarang marěngụ-děngụ.’ ”

¹⁸Seng MAWU e něndiadi langị, kai i Sie Ruata! Seng i Sie e něndiadi ringangu nẹ̌koạ dunia, nẹ̌koạ e pinakatoghasẹ̌ dingangu tatapẹ̌ dụdarisị. I Sie e tawe napakariadin tampạ kụ tạ taune, kaiso kawe tampạ baugu pẹ̌tanakeng. Seng i Sie e něhengetang, ”Iạ e kai MAWU, ringangu tawẹ u wal᷊ine.

¹⁹Iạ e tawe mẹ̌bisara kụ mẹ̌bawurung, arau mẹ̌darahasia. Iạ e tawe měndolohu umatẹ̌-Ku Israelẹ̌ e mědeạ si Siạ pẹ̌gagholọ u saghedẹ̌. Iạ, e kai MAWU měhabaru hal᷊ẹ̌ kahěngang, dingangu maul᷊ị u apang su hinone.”

²⁰MAWU e něhengetang, ”Pěmpẹ̌tampungko kụ děntako sěngkapahunděnta, i kamene kěbị apang nal᷊iwirẹ̌ su tal᷊oaram manga wansa! Bodo taumata apang mělẹ̌likụ apạsilong tul᷊ada wọu kalu, ringangu měmpẹ̌kẹ̌kaliomaneng su manga mahang duata kụ tawe makasal᷊amatẹ̌.

²¹Sowako pěrkaranu, ringangu paul᷊ịko kal᷊awọu karal᷊ahẹ e, ore, walakere i sire pẹ̌dal᷊ahintau sěngkapědal᷊ahintau. I sai tangu něhabaru hal᷊ẹ̌ ene ringangu naul᷊ị u ene nạung dokeng kal᷊imona e? Kai wal᷊inewe Iạ, e MAWU tangu? Tawẹ duata wal᷊ine sul᷊iung Iạ e. Iạ e kai Ruata kụ adilẹ̌ dingangu Mananal᷊amatẹ̌, tawẹ u wal᷊ine sul᷊iung Iạ e!

²²Ei, kal᷊awọu tumanạu wanua e, pẹ̌bihuko sol᷊ong anu-Ku, tadeạu i kamene e masal᷊amatẹ̌, batụu kětạembeng Iạ e Ruata, tawẹ u wal᷊ine!

²³ Iạ e seng nẹ̌kědo, ringangu kědo-Ku e tawẹ apa kụ tawe masasěhụ; dingangu waugu Iạ sẹ̌saku e Iạ mẹ̌salu: Apan taumata e sarung mẹ̌tumpěkuhẹ̌ su těngo-Ku, ringangu su ral᷊ungu wawerane hala e nẹ̌diandi mẹ̌deạu mẹ̌těngkasatia su těngo-Ku.

²⁴Kal᷊awọu taumata e sarung mẹ̌bera u, ’Kạadilẹ̌ e ringangu katoghasẹ̌ e kětạeng bọu anum MAWU!’ Kěbị taumata apang měmpẹ̌bẹ̌binsị u Iạ e sarung duměnta su anu-Ku ringangu mamea.

²⁵Arawe hiten Yakub sarung ipakasal᷊amatẹ̌, dingangu i sire e sarung mẹ̌dalo si Siạ, e MAWU.