Read Sangir YESAYA 46 Bible Online

YESAYA 46 - Sangir bible

YESAYA 46

¹Seng ini e pěngěnsueěngu manga kal᷊awọu mahan duatam Babelẹ̌ e; nạung kal᷊imona ute tul᷊adang Bel dingangu Nebo sẹ̌sěmbaěng, arawe orasẹ̌ ini e lẹ̌lurangeng su wowom binatang, makoạ bawawaěng baugu binatang kụ mạsaghedẹ̌ e.

²Manga tul᷊ada ene tawe makaumal᷊ẹ̌ mẹ̌tul᷊ungu měmamasaěnge, i sire hala e nihengkẹ kere tau nitaweng. Seng ene kasuěngʼi sire e.

³Daringihẹ̌ko si Siạ, ei hiten Yakub, i kamene apang nal᷊ěmbe wọu umatẹ̌-Ku e. Iạ e seng nẹ̌padul᷊i si kamene e rokeng i kamene nikawantelẹ̌.

⁴Iạ e tatapẹ̌be Ruatang kamene sarang i kamene e maghurang; dingangu tatapẹ̌ mělẹ̌lukadẹ̌ si kamene sarang i kamene měngowang. Iạ e něndiadi si kamene ringangu tatapẹ̌ mẹ̌pẹ̌padul᷊i si kamene, Iạ e sarung mẹ̌tul᷊ung dingangu mapakasal᷊amatʼi kamene.

⁵Iạ e kai isul᷊ung si sai kahiang kamene tangu? Kai piạ mẹ̌sul᷊ung u Iạ e?

⁶Taumata měmuka kawihe ringangu měměmbingu wul᷊aeng e, wọu e měnimbang sal᷊akane ringangu timbangeng darodọ e. I sie měmaehẹ̌ mamaměmbing bul᷊aenge baugu ipẹ̌koạ tul᷊adam mahan duata, bọu e maněmba tul᷊ada kinoạ e.

⁷Tul᷊ada ene pẹ̌pakuang dingangu pẹ̌pěllokang su tampạ e, i sie rụdarisị sene kụ tawe lumaisu. Maẹngu taumata e mẹ̌kal᷊iomaneng si sie e, i sie tawe sumasimbahẹ̌, dingangu tawe měngangambang si sie wọu kasasịgěsạ e.

⁸Tahěndungeko, ringangu timbangeko, ei taumata apan duruhaka!

⁹Tahěndungeko apan nariadi nạung su tempo kal᷊imona e; akue wue u i Iạ e kai Ruata, ringangu tawẹ u wal᷊ine, Iạ e kai Ruata, ringangu tawẹ apa kụ mẹ̌sul᷊ungu Iạ.

¹⁰Bọu tětạ e Takụ nihabarẹ̌ apang kụ mariadi samuri, deng nạung Takụ nitěbal᷊ẹ̌ apang kụ sarung mariadi. Angkuěngku: Putusang-Ku e sarungbe mariadi, kapulu-Ku e nal᷊ahẹ Takụbe koateng!

¹¹Iạ e mẹ̌kẹ̌kui sěngkatau měngangawasa e wọu sěmběkan daki,[66] i sie e riměnta kere manụ u winalangeng kụ dul᷊u baugu apěndal᷊eng putusang-Ku e. Apan Takụ piněhengetang e mang sarung Takụ koateng, apan Takụ nipẹ̌karaki e mang mal᷊ahẹ u Takụ koateng.

¹²Pẹ̌daringihẹ̌ko si Siạ e, ei apam mararangẹ naunge, i kamene kụ mạngěnnau makawatạ e kai wědang marau.

¹³Iạ e sarung mapakaraning ěllom pěndal᷊iwirẹ̌ e, kasasal᷊amatẹ̌ kụ Takụ nionggọ e seng tawe saụ masohọ. Iạ e sarung mapakasal᷊amatʼu Yerusalem, dingangu měgěllị u kal᷊aadatẹ̌ su Israel.”