Read Sangir YESAYA 48 Bible Online

YESAYA 48 - Sangir bible

YESAYA 48

¹Daringihẹ̌ko, ei hiten Yakub, hiteng Yehuda kụ mẹ̌pẹ̌pakẹu areng Israel, angkuěngu, i kau e měngaku wue su Ruatang Israelẹ̌ e, ringangu mẹ̌salu su arengu MAWU. Arawe kal᷊awọu waweranu e tawe nẹ̌buạ bọu naung tutune.

²Manimbe kerene, i kau e mangakuwe mal᷊oahẹ̌ u i kau e kawe kawanuang soa susi; dingangu i kau e mạngunsarehẹ̌be su Ruatang Israelẹ̌ e kụ isẹ̌sẹ̌bạ MAWU Limembong Kawasa.

³MAWU e něhengetang, ”Daringihẹ̌ko, e Israel! Apa nạung nariadi kal᷊imona e, seng marěngụ Takụ nihabarẹ̌; apang kụ niwera-Ku e, sěngkělěndịu Takụ kinoạ dingangu Takụ nikoạ karal᷊ahẹ e.

⁴Iạ e masingkạ u i kau e kai makul᷊i naungu, těmbọ u makětị dingangu makětị kere watu.

⁵Tangu seng bědang nạung kal᷊imona e Takụ ilẹ̌ol᷊ang; kal᷊imonan mariadi e, sen Takụ nihabarẹ̌, tadeạu i kau e kumbahangbe mẹ̌bera, u ene ute kai kakanoạu kal᷊awọu manga tul᷊adang mahang duatanu e.

⁶Kěbị nubuetẹ̌-Ku kụ nikaringihu e, seng nariadi; i kau e hinong mangaku u wawera-Ku ini e kahěngang. Ini e Iạ měhabaru apang hal᷊ẹ̌ buhu, kal᷊awọu rahasia kụ bědang tawe kinạsingkatengu.

⁷Kụ buhụ e ini e Iạ mapakariading ene e, ringangu wal᷊inewe kal᷊imona; wědang tawẹ běke i kau e nakaringihẹ̌ hal᷊ẹ̌ ene, tadeạu i kau e tawe makapẹ̌bera, u i kau e masingkạ u kěbị e.

⁸Iạ masingkạ u i kau e tawe kapangimangeng, deng dokeng kal᷊imona e i kau timeleng kere měnggaghohaeng. Ual᷊ingu ene i kau wěga wue, tawẹ sarang sěmbaụ kadiongeng bawera e mahumpạ su tul᷊inu e.

⁹Iạ e mẹ̌tẹ̌tingkědangu ral᷊angehẹ̌-Ku e tadeạu areng-Ku e ipakawantugẹ̌. Iạ e mělẹ̌lantingu ene waugʼi kau e tadeạu i kau e tawe ipakawinasa.

¹⁰Iạ e měmẹ̌manikạ si kau e su ral᷊ungu putungu sigěsạ, mẹ̌sul᷊ungu sal᷊aka ipakasahị su ral᷊ungu putungu rapuhang.

¹¹Ene e Takụ nikoạ baugu watangeng-Ku e hala u Iạ e tawe napakawalang areng-Ku e ipakamea; kawawantugẹ̌-Ku e tawe Takụ pahiakeng dingang i sai-sai.”

¹² MAWU e něhengetang, ”Daringihẹ̌ko Israel, umatẹ̌ kụ Takụ nikuiange, Iạ e tẹ̌bewe Ruatanu e. Iạ e kahumotongange, ringangu Iạ l᷊ai pangěnsueěnge.

¹³Lima-Ku něměllọ u wawěntan dunia e, ringangu něngěmpahu winangaenge. Kereu Takụ kuiang arenge, ute i sire masahawụ-sahawụ duměnta.

¹⁴Pěmpẹ̌komolẹ̌ko i kamene kěbị dingangu raringihẹ̌ko! Su tal᷊oarang manga mahan duata e tawẹ apa měnanighadẹ̌ u taumata pile-Ku e sarung měngalo Babelẹ̌ e; i sie sarung mẹ̌koạ apang kapulu-Ku e.

¹⁵Seng Iạ ini e nẹ̌bera e ringangu nẹ̌kui si sie, něngahạ si sie sarang nakaual᷊i.

¹⁶Damahiko pakaraning Iạ e ringangu pẹ̌daringihẹ̌ko, nạung deng kal᷊imona e Iạ nẹ̌bisara mal᷊ahẹ; dingangu wawera-Ku e sěntiniạ měngkate Takụ kẹ̌koateng karal᷊ahẹ e.” Orasẹ̌ ini e MAWU Ruata něndolohu Iạ dingangu něngonggọ u kawasa-Ne si siạ samatang sẹ̌saku.

¹⁷Angkuěngu Ruatang Israelẹ̌ susi e, Mananal᷊amatẹ̌ si kau, ”Iạ e kai MAWU Ruatanu, kụ mạněntiro si kau e apam piạ gunane si kau, ringangu měngahạ i kau sural᷊eng kụ hinon dal᷊engangu e.

¹⁸Kereu i kau e měnẹ̌naungbe manga tita-Ku, tangu karal᷊unsemahu e mẹ̌sul᷊ungu sal᷊ụ kụ tawe maral᷊ẹ̌sa, ringangu pal᷊edu mapia e mẹ̌sul᷊ungu luạ su sasị kụ tawẹ ědone.

¹⁹Hitenu e sarung kal᷊awọe kere ěnne su apeng; Iạ e mẹ̌padul᷊i si sire kụ tawe Takụ ipakawinasa.”

²⁰ Dakọ e kụ tal᷊angke wọu Babel, kekeko habarẹ̌ ini e walạewe měnsang sol᷊ong a. Habarẹ̌ko ringangu ral᷊uasẹ̌ ore ral᷊iagẹ̌: ”MAWU e sen něngambang Israelẹ̌, ěllangʼE.

²¹Su tempong i Sie něngahạ i sire limiu wal᷊ane mamara, i sire tawe nakapěndang narou. MAWU e němahiạ batu hanibẹ̌ e ringangu napaelehu akẹ, bọu ral᷊ungu watu e i Sie napẹ̌giasu akẹ baugʼi sire.

²² Tawẹ apa kasasal᷊amatẹ̌ baugu taumata ral᷊akisẹ̌ e,” kerene hengetangu MAWU e.