Read Sangir YESAYA 49 Bible Online

YESAYA 49 - Sangir bible

YESAYA 49

¹ Pẹ̌daringihẹ̌ko si siạ, ei manga wanua mararau, pěnẹ̌naungko manga waweraku e. MAWU e nẹ̌kui si siạ kal᷊imonang iạ piněhěnding, i Sie němile si siạ e ren dokeng bọu gandongang.

² I Sie napakahorom baweraku e kere peda, ringangu lima-Ne hala[69] e i Sie něngěllung si siạ. I Sie napakariading iạ e kere horom papitị bọu niasa, kụ nirẹ̌pehẹ̌ su ral᷊ungu pasol᷊one tadeạu sadia paketang.

³AngkuěngʼE si siạ, ”Seng i kau e ěllang-Ku; Iạ e sarung ipakawantugẹ̌ ual᷊ing i kau.”

⁴Arawe iạ e nẹ̌bera, ”Liaghang gatiku e tawẹ gunane; takụ ipakasue toghasẹ̌ku e tawẹ kěhase!” Kaiso iạ e maiaking bue u MAWU e tumatawang su hakẹ̌ku, Duata e měmal᷊isẹ̌ siạ e tuhụ kakanoạku.

⁵Kal᷊imonang tanạděnta su dunia e, iạ nikuiang u MAWU nakoạ ěllangʼE, mědeạu měngomol᷊ẹ̌ umatu Israel, tadeạu i sire mẹ̌sul᷊e su anu-Ne. MAWU e mapakariading iạ e lẹ̌adateng, Duata e kai katoghasẹ̌ku.

⁶ MAWU e něhengetang si siạ, ”Hal᷊ẹ̌ limembong kasariaěnge mạhědo si kau e ěllang-Ku; i kau e wal᷊inewe kětạeng sarung mapẹ̌sul᷊en manga hiten Yakub lěmbene ringangu měngul᷊ị kapia kasěllahu manga hěntong Israel, kaiso Takụ lai koateng tualagu apam bansa tadeạu patikụ dunia e ipakasal᷊amatẹ̌.”

⁷Duata susi Měngangambang Israelẹ̌ e něhengetang su taumata apang tumanịu lẹ̌hinakaneng, dingangu apang ipẹ̌bẹ̌binsị u manga wansa, ore lai makoạ ěllangu apang kawasa, ”Mararatu e sarung makasilo kakanoạ-Ku; i sire sarung mẹ̌pětị mangadatẹ̌ si Siạ. Apang piạ kawasane e sarung makasilo ene lai, kụ bọu ene mẹ̌tumpěkuhẹ̌ mẹ̌suba.” Ene nariadi e ual᷊ingu MAWU e sen němile ěllangʼE; Duatang Israelẹ̌ e susi, satia su kědonʼE.

⁸ MAWU e něhengetang su manga umatʼE, ”Su tempong Iạ e pakawala, Iạ e sarung sumimbang; su ěllong Iạ e měngambang, Iạ e mẹ̌tul᷊ung i kamene. I kamene e Takụ ěllungang, dingangu Takụ lukadeng, dingangu Takụ koateng pẹ̌kakakědo waugu manga wansa. Takụ ul᷊ikang banua apang marěmasẹ̌ luhio e makoạ ěntana tataghuaneng kụ pẹ̌tatanakeng.

⁹Taumata nitahungkụ e Takụ iapasěbang; apang kụ su tampạ marěndung e Takụ bawaěngu sol᷊ong tualagẹ̌. Sarangkate lai su wul᷊ude kụ dolohẹ̌ e i sire tawe lai kakawusang, suapan dal᷊eng kạsasadia kaěng.

¹⁰ I sire sarung tawe marou ringangu mahutung, dingangu tawe sarung kahombangengu likibu matangěllo e, su wanua l᷊inggi. Batụu Iạ, kumakěndagẹ̌ si sire e, sarung měngahạ si sire, ringangu něnata si sire, sol᷊ong manga simbul᷊u akẹ.

¹¹Iạ e sarung mẹ̌koạ dal᷊eng matěpasu wul᷊ude kěbị dal᷊eng-Ku maral᷊oahẹ̌ e sarung Takụ teneěng.

¹²Bọu marau umatẹ̌-Ku e měmpạhunděnta, wọu sawěnahẹ̌, bọu wahẹ dingangu Sinim[70] su sěmběkan timuhẹ̌.”

¹³Pěmpẹ̌kantarịko ei langị dingangu pěmpahul᷊uasẹ̌ko ei dunia, ei manga wul᷊ude pěmpahul᷊iagẹ̌, pahul᷊uasẹ̌! Batụu MAWU e riměnta něhiborẹ̌ umatʼE, i Sie kụkěndagu umatʼE kụ kẹ̌kaẹ̌pisang.

¹⁴Kaiso tumanạu Yerusalem nẹ̌bera, ”MAWU e seng něněntang i kitẹ, MAWUNG kitẹ e seng niwul᷊eng kitẹ.”

¹⁵MAWU e simimbang, angkuěngʼE, ”Botonge sěngkatau marehokang miwul᷊eng anạ e, ringangu tawe kuměndagu anạ e niědihẹ̌ e. Manilaing i sie miwul᷊eng ene, kaiso Iạ e tawe miwul᷊eng kau!

¹⁶Yerusalem, Iạ tiniạ mang mẹ̌tahěndung si kau; arengu Takụ ketakeng su pal᷊edu lima-Ku.

¹⁷Taumata apang kụ mẹ̌mahansang si kau e tạ kararěnane ruměnta, ringangu apan seng něnggaghollọ i kau e sarung matamai.

¹⁸Pẹ̌kakěllạe ringangu tatingang su tampạ u mạngělikụ e, kawanuanu e seng nẹ̌tampung dingangu riměnta su anunu. Baugu Iạ, Duata kụ biahẹ̌, Iạ e nẹ̌bera, mamben těngadẹ̌ i kau e sarung lumuasẹ̌ ual᷊ingu kawanuanu, mẹ̌sul᷊ungu kaghiang bawine lụluasu ral᷊ěgahe.

¹⁹Banuanu kụ mahasụ dingangu lụhiong karěmmase, orasẹ̌ ini e seng tumanịu masěsẹ baugu taumata kụ mẹ̌měnningu matanạ sene. Dingangu apan taumata kụ mapulu mapakawinasang kau e, seng měngensọ pinakarau wọu anunu.

²⁰Manga rariọ kụ nawantel᷊ẹ̌ su wanuan tau l᷊iwụ e sarung mẹ̌bera si kau, ’Banua ini e tumanịu masěsẹ si siạ, gěllirengkon tampạ tadeạu iạ e makapẹ̌tanạ sini.’

²¹Tangu i kau e sarung mẹ̌bera, su ral᷊ungu naung, ’I sai tangu němantelu manga rariọ ene waugu iạ e? Bal᷊inewe iạ seng kinailangengu manga anạku e, ringangu sen tawe makapěhanạ kapia? Iạ e nihengkẹ su ral᷊ungu pěmamembangeng dingangu nịlaingkạ dingangu nitěntang sẹ̌saku matagẹ̌. Kụ bọu manga rariọ ene e ringangu i sai napakasarian sire tangu?’ ”

²²Duata Limembong Karangetange nẹ̌bera su manga umatʼE, ”Iạ sarung mẹ̌gěllịu tatiala su manga wansa ringangu i sire sarung mapakapul᷊ẹ u manga anạ u; manga anạu esẹ sarung tingkul᷊uang, dingangu manga anạu wawine e sarung sendengang su wowom pal᷊uka.

²³Manga ratu e sarung mẹ̌sul᷊ungu i amang baugʼi kamene, dingangu manga woki kere marehokang. I sire sarung měmpẹ̌tumpěkuhẹ̌ měngadatẹ̌ si kau ringangu mẹ̌těngkasasanạ u watangeng i sire su těngonu. Tangu i kau e sarung masingkạ u Iạ e kai MAWU; taumata apam měmpạngumbala si Siạ e tawe Takụ ipakakedọ.”

²⁴I kamene nakiwal᷊o, ”Botonge ngae apam pul᷊aho e, pul᷊ahoěng bọu l᷊imang mol᷊ensekẹ e tangu arau apan nitaweng kụ nihěngkasẹ̌ bọu l᷊imang taumata matingkaị e?”

²⁵MAWU e simimbang, ”Kụ seng ene e kụ sarung mariadi. Apan taweng kụ kai manga mol᷊ensekẹ e sarung pul᷊ahoěng kapia. Taweng u apam matatingkaị e sarung hampaseng lai. Batụu Iạ sẹ̌saku e rumokạ manga sědụ u; Iạ e sarung mapakasal᷊amatʼu manga anạ i kamene.

²⁶Iạ e sarung mapakawukang u raha su sekẹ u hakịu i sire měmpẹ̌papate sěmbaụ dingangu wal᷊ine. Tangu patikụ umatẹ̌ e sarung masingkạ, u Iạ e, MAWU, Mananal᷊amatu; Limembong Katoghase, Duatang Yakub, Mananubusu.”