Read Sangir YESAYA 5 Bible Online

YESAYA 5 - Sangir bible

YESAYA 5

¹Daringihẹ̌ko kakantarịku mạanung wawaelangu anggoru hapịku. Hapịku piạ baelu anggorẹ̌ su wěntihu wul᷊ude matawa e.

² I sie mạmacolẹ̌ ěntanane ringangu mẹ̌děnděmẹ manga watune. Nisuange anggorẹ̌ pinile nipětịe měnara pělukadenge. Lohange niwangka mědeạu pěměhaěng anggore, kụ bọu ene i sie měngampal᷊ẹ̌ buane pakasasạ katewe ual᷊ine kawe anggorẹ̌ mahaesẹ̌.

³Kụ ini e hapịku nẹ̌bera, ”I kamene kěbị e tumanạ u Yerusalem dingangu Yehuda koạko pakapia su wěllạu wawaelangu anggorẹ̌-Ku e ringangu Iạ e.

⁴Apạ e lai hinon Takụ koateng, kaiso wědang ta nikẹ̌koạ-Ku waugu wawaelang u anggorẹ̌-Ku e? Unụe wuane mahaesẹ̌ e nariadie, kụ bal᷊inewe wuane mapia e kere Takụ lẹ̌harapeng e?

⁵Kere ini sarung Takụ pakariadi wawaelangu anggorẹ̌-Ku e: Pagarẹ̌ mạngělikụ e sarung Takụ ěbukang, meselẹ̌ dal᷊indunge sarung Takụ topeěng, bọu ene Takụ iwala binatang karangěngisẹ̌ e apěnggolang dingangu apělinda si sie.

⁶Iạ e sarung apakawala apatuwong kěhu. Kalung anggore tawe Takụ běbaseng dingangu tawe Takụ leleěng. Katewe Takụ iwala pakahěmbungu sumpinị dingangu manga rěmpugẹ̌, saral᷊aing manga winawa e Takụ isěding maparasehu tahiti su wowone.”

⁷Batụu wawaelangu anggoru MAWU Lembong Kawasa e ute kai umatu Israel dingangu tau Yehuda e ute kai kalung anggorẹ̌ kụ nisuangʼE. Bọi sire i Sie mělẹ̌harapẹ̌ kạadilẹ̌, kaiso kětạembeng kawe katatingkaị. Lěharapeng i Sie ute kai tadeạu i sire kawe mapakateing katul᷊idẹ̌ e, kaiso tumbạengbeng kakahiorọ u mẹ̌gausẹ̌ kạadilẹ̌ e.

⁸Kạěngkěhang i kamene apang němpěmělli wal᷊e dingangu rimalagẹ̌ manga rahami ipěnamba arětạ i kamene. Tawe nararěnnạ lai nasue e tampạ baugu taumata wal᷊ine ringangu samatang i kamene hala natanạ su wanua ene.

⁹Takụ nikaringihẹ̌ MAWU Limembong Kawasa e nẹ̌salu, ”Manga wal᷊e gaghaghuwạ dingangu maral᷊ěnggihẹ̌ ini e kěbị e kai tawẹ dal᷊ohone tạ taune.

¹⁰Gěsing ěntana e sarung tawẹ ual᷊ine apa, baelu anggorẹ̌ kụ kạguwạ e mapul᷊ong hektarẹ̌ e kětạeng makạual᷊i akẹ u anggorẹ̌ mapul᷊ong literẹ̌ ual᷊ine. Bine mahasụ su litere kětạeng gandung mapul᷊ong literẹ̌ ual᷊ine.”

¹¹Kạěngkěhang i kamene! Bọu mal᷊ukadẹ̌ sarang hěbi hal᷊ẹ̌ i kamene kětạeng měmpạnginung inumang makakětị dingangu měmpẹ̌tẹ̌těngkiwukang.

¹²Su manga sal᷊iwang i kamene e piạ e tingihu manga kěcapi, gambus, arabanạ, dingangu suling dingangu inumang anggorẹ̌. Kaiso i kamene tawẹ pandungange su munarang MAWU ringangu apang kẹ̌koatenge.

¹³Ual᷊ingu ene manga umatẹ̌-Ku apan tawẹ kasingkạ e apa e sarung ahakeng kere taumata kinataweng. Apan těmbonange ringangu kawanuane sarung mate kal᷊unusang dingangu marou.

¹⁴Mohongu papate e ngụnganganga mal᷊oang-loang baugu ipěngělụ taumata apang su horone su Yerusalem dingangu kawanua e sěngkapẹ̌daral᷊uasẹ̌ su sal᷊iwang.

¹⁵Apan taumata e sarung ipakamea ringangu apang mal᷊aobotẹ̌ e ipakasanạ.

¹⁶Arawe MAWU Lembong Kawasa e mạnodẹ u kasěllahe ringangu měkẹ̌koạ hal᷊ẹ̌ kahěngang. I Sie sarung mapasilong kasusinʼE su měhukung bansa-Ne.

¹⁷Suěnạ u soa, anạ u kambing dingangu domba sarung mahungkaěng děmpugẹ̌ kụ tawe kakawusangu kaěng.[6]

¹⁸Kạěngkěhang bue i kamene kụ měngkai hanesẹ̌ barạdosa!

¹⁹Angkuěngu, ”Balạ e kere MAWU Ruatang Israel susi e masahawụ kumanoạ! Balạ e i Sie pẹ̌koạ apang kẹ̌karakiangʼE, tadeạu i kitẹ e makasilo ringangu masingkạ.”

²⁰Kaěngkěhang i kamene apang mapẹ̌kẹ̌kakal᷊iung mapia ringangu ral᷊akị apang marěndung dingangu apang matualagẹ̌, mapaị dingangu marěngang!

²¹Kạěngkěhang i kamene apang mạngěnna u watangenge kai pelesa ringangu tumanịu pande!

²²Kạěngkěhang bue i kamene kụ tahainung anggorẹ̌ mạhěmpal᷊iu e. I kamene tumanịu wahani ringangu hangiasẹ̌ kereu harusẹ̌ mapẹ̌dal᷊aụ u inumang makakětị!

²³Kaiso kětạeng baugu makareạ doitẹ̌ sasorokẹ̌, i kamene e něliwirẹ̌ be taumata piạ sal᷊ane, ringangu měneheng taumata tạ sal᷊ane makaěbạ hukumang.

²⁴I kamene seng tawe měnarimạ u těntirong MAWU Makawasa e, ringangu mělẹ̌hinakang parentan Duatang Israel susi e. Ual᷊ingu ene, mẹ̌sul᷊ungu rahami ringangu rěmpugẹ̌ mahěgu nasue natutung su ral᷊ungu putung, kerene lai manga hamụ e sarung mawuhụ, kal᷊awọu bungangu e mahěgu ringangu masuen tiụ e su anging.

²⁵MAWU e lumangehẹ̌ su manga wansa-Ne. I Sie seng sadia měhukung si sire. Manga wul᷊ude sarung kumiọ; manga maietẹ̌ e nẹ̌sal᷊iawuhẹ̌ kere onasẹ̌ su manga ral᷊eng. Kaiso MAWU e wědang limangehẹ̌ dingangu tatapẹ̌ sarung měhukung.

²⁶MAWU e sarung kumui wansa kụ marau[7] dingangu i sire sarung duměnta masahawụ.

²⁷I sire sěntiniạ sadia mẹ̌sekẹ dingangu wěgaweng marul᷊ěpe. I sire tawe mẹ̌tatikị arau kahuntikilang.

²⁸Horom papitị e mahoro ringangu naěnakenge sadia ěnakeng. Kanukung kawal᷊one kakětịe kere watum putung, dingangu rodang karetane e tụtěnnung kere angingu rimpul᷊usẹ̌.

²⁹Manga prajurite lụhuang kere singa wuhu pěnaněmbo kinaěnge, mase nital᷊ange, ringangu tawe makapěllọ i sie.

³⁰Su ěllo ene su kasěllahu Israelẹ̌ e kẹ̌karingihẹ̌ bansagu pẹ̌sasekẹ kere ghal᷊ědụu l᷊audẹ̌. Kakěllạ e, kasěllahu wanua ene e marěndung dingangu napanẹ u kasasěsẹ. Tualagẹ̌ e mạdiadi marěndung-rěndung.