Read Sangir YESAYA 50 Bible Online

YESAYA 50 - Sangir bible

YESAYA 50

¹MAWU e něhengetang su tau Israel, ”Ei umatẹ̌-Ku, katihọ u Iạ e kai něnokol᷊i kau kere sěngkatau esẹ něnokol᷊ẹ̌ kawinge? Mageng kerene, kai suapa suratu sindone tangu? Katihọ u Iạ nẹ̌bal᷊ụ i kau, kere sěngkatau i amang nẹ̌bal᷊ụ anạ e su měnanětul᷊ẹ̌ utang tangu? Bal᷊ine! I kau e nitaweng dingangu nirěmmẹ ual᷊ingu rosa ringangu karal᷊akisu e hala!

²Unụe wọu manga umatẹ̌-Ku e tawẹu sarang sěngkatau ren nakasimbahẹ̌, piạ Iạ e riměnta nẹ̌kui si sire? Kai měngkai kạtatanạ marěmasẹ̌ i sire mạngiral᷊ingu Iạ e tamakaumal᷊ẹ̌ měliwirẹ̌ dingangu měngambang si sire? Mamben těngadẹ̌, ual᷊ingu kawasa-Ku e laudẹ̌ namara, apan sal᷊ụ Takụ nikoạ banua l᷊inggi, manga kinạ e něngkapate ringangu nawělisẹ̌.

³Langị e Takụ pinẹ̌těngkitung maěllị, Takụ nitimbuhungang kere nitakatengu pakeangu měndal᷊utu.”

⁴MAWU Limembong Karangetange naněntiro si siạ mẹ̌bisara, tadeạu waweraku e makatoghasẹ̌ apan lụěnsu. Apang kamal᷊ukadẹ̌ e i Sie makạbal᷊insahẹ̌ kapuluku e mědeạu rumaringihẹ̌ těntiro-Ne si siạ.

⁵MAWU e nẹ̌gěllịu tingirangku e makạěnna; iạ e tawe rumal᷊ewang arau tumal᷊ikudẹ̌ si Sie.

⁶ Takụ tagheěng pal᷊ukaku e su taumata kụ měnal᷊iwuhẹ̌ si siạ e; ringangu pipịku su taumata kụ měngěbụ bianggụku. Iạ e tawe manumbilingu ghatiku su tempong iạ e hinakaneng dingangu ěduang.

⁷Batụu MAWU Ruata e nẹ̌tul᷊ungu iạ e, tangu iạ e tawe ipakamea. Iạ mapakatoghasu naungku e mědeạu iạ e makědang; iạ e masingkạ u iạ e tawe ipakamea.

⁸ Batụu Ruata e kawe marani, i Sie nělahẹ u iạ e tawẹ sal᷊aku. I sai mapulu mẹ̌darendehu iạ tangu? Mahiko i kitẹ e sěngkasěpụ. I sai tangu rumokạ si siạ? Oroiko i sie pẹ̌těngkaraning iạ.

⁹Mamben těngadẹ̌, MAWU Kụ Limembong Karangetange e tụtatawang si siạ, i sai wahani měnoke si siạ piạ sal᷊aku? Kěbị apang měnoke si siạ e sarung maparung kere pedesẹ̌ těbe nikaěng u uane.

¹⁰Ei i kamene kụ měmpạngadatẹ̌ MAWU, ringangu rụdaringihẹ̌ bawerang ěllangʼE, dal᷊eng kụ dẹ̌dal᷊engang i kamene e aramanung kai marěndung, kụ tawẹ apa tualagẹ̌ sụsěnnang baugʼi kamene; kaiso pangimangke su MAWU; pěngumbalako su Ruatanu.

¹¹Ei kamene kụ mapulu mapakasilakạ u taumata wal᷊ine, i kamene sarung ipakawinasa kahiang karakine hala. Seng MAWU e nẹ̌koạ ene pinakariadi, i kamene sarung bantiang pakatědụ.