Read Sangir YESAYA 51 Bible Online

YESAYA 51 - Sangir bible

YESAYA 51

¹MAWU e něhengetang: ”Daringihẹ̌ko si Siạ, ei kamene kụ lụěnningu masal᷊amatẹ̌ e, ringangu ruměnta su anu-Ku mẹ̌dorong tul᷊umang. Pẹ̌tahěndungko wul᷊udu watu piạ i kamene mạkaketạ, dingangu pěngangal᷊i watu su piạ i kamene nikal᷊i.

²Pẹ̌tahěndungko su manga i upung i kamene i Abraham dẹ̌duan Sara kụ seng něngědihi kamene; piạ Iạ nẹ̌kui si Abraham, i sie tawẹ anạ e; bọu e Takụ nial᷊amateng i sie ringangu Takụ nionggotangu pal᷊ahitene mal᷊awọ.

³Yerusalem, Iạ e sarung měhiborẹ̌ si kau, dingangu kěbị apang mạtanạ su manga ěnạ u kinaopehangu. Manga wimbaengu apang linggi e Takụ koateng pẹ̌sasuangeng, kerẹewe Eden, pẹ̌bawaelang-Ku matuwo e. Sene taumata e sarung mahul᷊uasẹ̌ dingangu mahul᷊iagẹ̌ dingangu mẹ̌kal᷊iomanengu tatarimakasẹ kapẹ̌kẹ̌kantarị e.

⁴Naungeko tingihẹ̌-Ku e, ei wansa-Ku, pẹ̌daringihẹ̌ko kal᷊awọu tingihẹ̌-Ku, ei manga umatẹ̌-Ku. Takụ gěllirangu těntiro-Ku kal᷊awọu wansa, kal᷊awọu tita-Ku e sarung měnualagẹ̌ si sire.

⁵Kasasal᷊amatẹ̌ Takụ nionggọ e seng masanggidẹ̌; tempo-Ku makauntu e seng maraning mahumpạ. Iạ sẹ̌saku e sarung mẹ̌parenta manga wansa. Kal᷊awọu wanua mararau e měngẹ̌ngampal᷊ẹ̌ si Siạ dingangu měngẹ̌ngantibẹ̌ kakanoạ-Ku mahasa e.

⁶Tatingangko l᷊angị e ringangu dal᷊ingeiko runia e; langị e sarung mapaghohẹ̌ kere tipu ringangu dunia e sarung maral᷊umadẹ̌ kere pal᷊edetẹ̌ těbe, kal᷊awọu tumanạ e sarung mate kere těnị. Arawe kasasal᷊amatẹ̌ Takụ ionggọ e mamben tatapẹ̌ sarang karěngụe, dingangu watạ-Ku e tawẹ pěngěnsueěnge.

⁷Daringihẹ̌ko si Siạ, ei wansa-Ku, i kamene masingkạ u munara kụ mẹ̌tẹ̌tatahino; těntiro-Ku e madaresọ su ral᷊ungu naungu. Kumbahang matakụ kereu i kamene ipẹ̌baheaun taumata, kumbahang i kamene mẹ̌bimbongu lahinakang i sire.

⁸I sire sarung mawinasa ringangu mapuạ kere pedesẹ̌ nikinạu tahuwu, ringangu hekạ u rukụ u domba nikinạ u rumpilạ. Arawe kasasal᷊amatẹ̌ e Takụ nighěllị man tatapẹ̌ sarang karěngụe, batạ-Ku e tumuhung bọu hěnto sarang hěnto e.”

⁹Pẹ̌pětịko MAWU, tul᷊ungko i kami, ambangeko i kami e ringangu kawasa-Nu. Pẹ̌pětịko kere nạung tempo kal᷊imona su tempong i Kau e něndarul᷊ẹ si Rahab[71] dingangu něněkạ nagạ u l᷊aedẹ̌ ene e sarang nate.

¹⁰I Kau lai napakamarang laudẹ̌, akẹ u l᷊audẹ̌ mal᷊oang kụ maral᷊ung. I Kau e nẹ̌koạ dal᷊eng limiu akẹ ene tadeạu taumata apang ipakasal᷊amatẹ̌ e wotonge makal᷊iu.

¹¹Tangú, taumata apang ipakal᷊iwiru MAWU e sarung mapul᷊ẹ, i sire sumuẹ̌, sol᷊ong Yerusalem dingangu ral᷊uasẹ̌ e gatin sire e matatilang ual᷊ingu ral᷊uasẹ̌ kakalẹ̌. I sire měmpạhul᷊uasẹ̌ dingangu měmpạhul᷊iagẹ̌, susa naung dingangu kakakěndung e seng napaghohẹ̌.

¹²MAWU e něhengetang, ”Seng Iạ e měhiborẹ̌ si kamene. Unuẹ i kau e matakụ u taumata tawe kakalẹ̌ e, su taumata kụ irěmmẹ kere onasẹ̌?

¹³Unụe i kau e miwul᷊eng MAWU Něndiadi si kau e, němingkahu l᷊angị dingangu něměllọu wawěntan dunia? Unụ e kanandung ěllo e i kau ghụgiantangu pěngangambung i měngẹ̌ngěpisẹ̌ kụ mědẹ̌dariahi měngupu e? Mamben těngadẹ̌ pěngangambung i sire ene tawe tumětal᷊ẹ̌ si kamene.

¹⁴Apang kinataweng e sarung tạ kararěnane ipakal᷊iwirẹ̌; i sire sarun tawe ikakawusu kaěng, dingangu sarun tawe mate ringangu ilěbing.

¹⁵Batụu kai Iạ e MAWU Ruatanu, kụ nakaghal᷊ěgehẹ̌ laudẹ̌ e hakịu luạ e gụgal᷊ědụ. I Limembong Kawasa e kai areng-Ku.

¹⁶Kai Iạ e němingkahu[72] langị e ringangu něměllọu wawěntan dunia e. Iạ e nẹ̌bera su Sion: Seng i kau e umatẹ̌-Ku Iạ e něgěllịu těntiro-Ku e si kamene ringangu něngěllung i kau e ringangu kawasa-Ku.”

¹⁷ Pẹ̌pětị e, ei Yerusalem, pẹ̌pětị e! Hukumang kụ ninawon MAWU e ual᷊ingu ral᷊angehʼE sen riral᷊engangu sol᷊ong nasue.

¹⁸Bọu apan tumanạu e tawẹ u něngahạ i kau e, ringangu apang měmpẹ̌tẹ̌tanạ anunu e tawe měngahạ si kau e.

¹⁹I kau e kahinoěngu sigěsạ haghine rarua; lẹ̌tạu pẹ̌sasekẹ e wanuanu e naghoghahẹ̌ marasai, ringangu kawanuanu e něngkapaten lunusẹ̌ e. Tawẹ u kiměndagẹ̌ dingangu něhiborẹ̌ si kau.

²⁰Su apang pondol᷊u ral᷊eng apan taumatanu e něngkanawo kinasueěngu toghasẹ̌ kere rusa naehọ su somạ. I sire kinahinoěngu ral᷊angehu Mawu, ringangu kinahěkadengu Ruatanu.

²¹Pẹ̌daringihẹ̌ko ei kal᷊awọu taumata apang lẹ̌ěpisang, apang kụ mạpongge kere tau wukang!

²²Kere ini hengetangu MAWUnu, MAWU Ruatanu e kụ tụtatawang si kamene, ”Kasasigěsạ kụ takụ ighěllị su ral᷊ungu ral᷊angehẹ̌-Ku, sarun Takụ al᷊akeng kapia wọu anunu. Dal᷊angehẹ̌-Ku e sarung mal᷊ěda, ringangu i kamene e tawahal᷊uasu lai, měnanggung ene.

²³Kasigěsạ ene e Takụ ionggọ su apang mạngěpisẹ̌ si kau, apan bọu mạngoro si kamene apạdal᷊oka su ěntana, dingangu apang měmpạnahida si kamene, tabidạu i kamene raral᷊engang kụ lẹ̌liuangu taumata e.”