Read Sangir YESAYA 52 Bible Online

YESAYA 52 - Sangir bible

YESAYA 52

¹ Pẹ̌bangungke, ei Yerusalem, pẹ̌bangungke! Pakakuatẹ̌ bue naungu! Luhẹ e pakeangu kasẹllahu e! Ei Yerusalem, soa susi e, taumata mal᷊amuhụ e tawe lai sumuẹ̌ lumiu pasěllangengu e.

²Pẹ̌pětịko wọu awul᷊ẹ̌ e, ei Yerusalem, tontongko awul᷊e e riměkạ si kau. Pẹ̌lọko hante kụ něngikị lehẹ u, ei tumanạ u Sion kụ kinataweng!

³MAWU e něhengetang su manga umatʼE, ”I kamene e niwal᷊ụ matagẹ̌, kụ orasẹ̌ ini e nipakal᷊iwirẹ̌ matagẹ̌ lai.

⁴Kal᷊imona e i kamene nakoạ sol᷊ong Misirẹ̌ e ringangu natanạ sene kere tau raghị. Bọu ene Asyurẹ̌ e mạměhạ si kamene tawẹ alasange.

⁵ Kụ orasẹ̌ ini e kai a urusang-Ku e sini? Tau Babelẹ̌ e něnaweng si kamene měngkate kerene. I sire apang kụ měmpạngěpisẹ̌ si kamene e měmpangobotẹ̌ dingangu turusẹ̌-turusẹ̌ mělẹ̌hinakang si Siạ.

⁶Ual᷊ingu ene i kamene sarung mangaku u Iạ e kai Ruata, ringangu su tempo ene i kamene sarung masingkạ u kai Iạ e mẹ̌bẹ̌bisara si kau.”

⁷ Kụ apạ e mal᷊uasẹ̌ nakasilo rarěntan darolohang; i sie rụdal᷊eng lụliu wawul᷊urange ringangu měbẹ̌bawa habarẹ̌ mapia, habaru karal᷊unsemahẹ̌, habaru kasasal᷊amatẹ̌ baugu Sion; angkuěnge, ”Ruatanu e Ratu.”

⁸Daringihẹ̌ko gion dal᷊uasu měndal᷊ukadẹ̌ soa e, i sire měmpẹ̌gẹ̌gio-sěngkapẹ̌gio! Batụu ringangu matan těmbọ i sire hala, i sire makạsilo MAWU e mẹ̌sul᷊e sol᷊ong Sion.

⁹Pěmpẹ̌giọ e, ei manga ěnnạ u opehu Yerusalem, u MAWU e měhiborẹ̌ umatʼE, ringangu měliwirẹ̌ Yerusalem.

¹⁰MAWU e měnodẹ u kawasa-Ne su těngom matang kal᷊awọu wansa e. Tangu kasěllahu dunia e sarung mẹ̌sahidi kasasal᷊amatẹ̌ e wọu Ruatang kitẹ.

¹¹ Dakọ e! Těntangko soam Babelẹ̌ e, ei kamene apang kụ nẹ̌bawa apal᷊iwụ u Wal᷊em Mawu! Kumbahang měnenggehẹ̌ apal᷊iwụ mal᷊amuhụ:[73] Pěnusiko watangengu kal᷊imonan tawe něbẹ̌buạ.

¹²I kamene tawe sarung mẹ̌sasahusu rumal᷊eng, dingangu wal᷊inewe kere taumata tumal᷊angu watangeng. Batụu MAWU e sarung měngahạ i kamene; Ruatang Israel maněntanudẹ̌ si kamene wọu kěbị beọ e.

¹³MAWU e něhengetang, ”Mamben těngadẹ̌, ěllang-Ku e sarung makaual᷊i; I sie sarung dẹ̌daloěng dingangu ipakạdangẹ.[74]

¹⁴Kal᷊imona e lawọ taumata e himěkosẹ̌ nakasilo si sie, luhudu nitingkaitang hakịu semben bal᷊inewe kere taumata e lai.

¹⁵ Arawe orasẹ̌ ini e mal᷊awọ bansa e kahian sie nipakaherang, mararatu e nipẹ̌kěmminge ual᷊ingu raral᷊inaụ. I sire sarung makasilo ringangu makaěnna, u nạung kal᷊imona e wědan tawe nikẹkasingkateng i sire.”