Read Sangir YESAYA 53 Bible Online

YESAYA 53 - Sangir bible

YESAYA 53

¹ Bansa ene simimbang, ”I sai mangimang u apan seng kinaringihʼi kami e ngae? Baugʼi sai kụ seng pinělahekang u kawasam MAWU ngae?

²MAWU e mapulu tadeạu ěllangʼE ene e mẹ̌sul᷊ungu tumbal᷊e kụ timuwo su ěntana mamara. Tawẹ apa kụ maholẹ si sie mědeạu pandaěng i kitẹ e; tawẹ apa kụ makạbitaugẹ̌ si kitẹ mědeạu měměnning.

³I kitẹ e mělẹ̌hinakang dingangu mẹ̌tẹ̌ngkaraun sie, taumata kụ napenẹ u sunsara ringangu wiasa měnal᷊udẹ̌ sakị. Tawẹ u sarang sěngkatau kụ mapulu měmanda si sie, ringangu i kitẹ e mal᷊aing tawe měndarekeng i sie.

⁴ Tumuhụ hinone kawe sakị i kitẹ e nital᷊ude, ringangu kawe sunsarang kitẹ e nial᷊ungange, arawe su kiral᷊ing i kitẹ e likibe ene kawe papahangu Ruata e si sie.

⁵ Kaiso i sie nipakal᷊esẹ ual᷊ingu kal᷊awọu rosang kitẹ, dingangu lẹ̌limadeng ual᷊ingu karal᷊akisʼi kitẹ e. I sie nịpapahang tadeạu i kitẹ e iapakasal᷊amatẹ̌, ual᷊ingu manga liwị e tangu i kitẹ e nipakaul᷊e wọu kasasakị.

⁶ I kitẹ kěbị e napal᷊idẹ̌ kere domba, sěngkatau-sěngkatau e nasịdeạ dal᷊enge hala. MAWU e seng napakaěnsạ u karal᷊akisʼi kitẹ kěbị e si sie.

⁷ I sie tẹ̌tingkaitang marasai, kaiso mang tẹ̌tanggunange ringangu kakakědang. I sie tawe měndal᷊engẹ mohonge kere anạu domba itẹ̌tonda sol᷊ong tampạ u pěmamotokange arau iněngen domba rukụ e kẹ̌kul᷊ukang.

⁸I sie nịlaaresẹ̌ dingangu gẹ̌gutaěng, mase lẹ̌hiudang dingangu pahangeng pakapate. Tawẹ u mẹ̌pandung su pẹ̌bawiahe; i sie napohong kahian dosang bansang kitẹ.

⁹ I sie nilěbing dingangu taumata ral᷊akisẹ̌; lěbing e su tal᷊oarang taumata kalạ, maning i sie tawẹ běke nẹ̌koạ dal᷊akisẹ̌, dingangu tawe něngẹ̌ngakal᷊ẹ̌.”

¹⁰MAWU e napulu i sie mẹ̌tatahangu sunsara, ringangu měnarakang u watangenge kere ghaghěllị ipěndědasẹ̌ dosa. Tangu i sie sarung maumburẹ̌ dingangu makasilo pal᷊ahitene, kụ lumiun sie tangu kapulum MAWU e sarung masěhụ.

¹¹Ual᷊ingu ene MAWU e něhengetang, ”Bouten mẹ̌tatahangu sunsara e, i sie sarung mal᷊unsemahẹ̌ dingangu mawatụ kapulune. Ellang-Ku ene, kụ nakal᷊uasẹ̌ naung-Ku e, seng něnal᷊udẹ̌ napahang su taumata l᷊awọ; su arengʼE Iạ e sarung manubusʼi sire.

¹² Mal᷊uasẹ̌ i sie něnarakangu pẹ̌bawiahe ringangu narekengbe su rekenangu taumata ral᷊akisẹ̌. I sie němikul᷊e dosan taumata l᷊awọ dingangu nẹ̌kal᷊iomaneng tadeạu i sire ampungang.[75] Tangú i sie Takụ nighěllirangu taumata l᷊awọ e kere poroseěng, dingangu i sie makahombang bahageange ringangu taumata matul᷊idẹ̌ e.”