Read Sangir YESAYA 54 Bible Online

YESAYA 54 - Sangir bible

YESAYA 54

¹ Yerusalem, kal᷊imona e i kau mẹ̌sul᷊ungu wawine wantọ kụ tawe makapěhěnding. Kaiso orasẹ̌ ini e pahal᷊uase, ringangu pẹ̌kantarịko ringangu ral᷊iagẹ̌! Batụu manga anạ u e mal᷊awọ kahěngang, němal᷊iu manga anạ bawine kụ tawe nitěntangu kawing esẹ.

²Pěměnahẹ̌ko manga suěng pẹ̌tatanakengu e; pakanandụko manga tal᷊ine, ringangu toghaseko manga pasạ e!

³I kau e sarung měnambang kal᷊oahe sol᷊ong koaneng dingangu kaihi; tumanạu sarung matanạ su ěntanang kal᷊awọu wansa, ringangu měmpẹ̌banua suapan soa gaghuwạ kụ orasẹ̌ ini e seng lụhio.

⁴Abe katakụ, i kau e sarung tawe ipakamea; tawe sarung hinakaneng dingangu tawe makerọ u mea. I kau e sarung miwul᷊eng koạ u tawe satiane e su tempong kangangudạ u e; semben tawe makatahěndung katatal᷊iahunu kere sěngkatau wal᷊u.

⁵Měndariadinu e mẹ̌sul᷊ungu sěngkatau esẹ kawingu, Duatang Israel susi e kai Mananal᷊amatu. MAWU Limembong Kawasa e ene arengʼE, i Sie kai Ruata měngangawasa kasěllahu dunia.

⁶Israel, i kau mẹ̌sul᷊ungu sěngkatau kawing bawine mangudạ mạsusa ual᷊ingu nitěntang u kawinge. Kaiso Ruata e nẹ̌kui si kau kapia ringangu něhengetang,

⁷”Kate kadodọ tempo Iạ e měněntang i kau; ringangu napenẹ u kakěndagẹ̌ i kau e sarun Takụ al᷊akeng kạpia.

⁸Kětạeng kadodọ tempo Iạ e mẹ̌bihu wọu anunu, ual᷊ingu ral᷊angehẹ̌-Ku e měngkai hanesẹ̌ sụsahoka. Kaiso ringangu kakěndagẹ̌ kakalẹ̌, Iạ e kuměndagʼi kau.” Kerene angkuěngu Ruata Měnanal᷊amatʼu.

⁹ ”Mẹ̌sul᷊ungu su tempong Nuh, Iạ e nẹ̌diandi u lěba maihạ e selain tawe měhěmbung dunia lai, kerene lai orasẹ̌ ini e Iạ e nẹ̌diandi u Iạ e semben tawe sarung lumangehẹ̌ arau měnilakạ lai si kamene.

¹⁰Manilaing manga wul᷊ude ringangu manga wongkone kumiọ, Iạ e tawe měngědo kuměndangʼi kau. Dianding pẹ̌darame-Ku e sarung Takụ sěntiniạ umbelekang,” angkuěngu MAWU e kụ kuměndagʼi kau e.

¹¹ MAWU e něhengetang, ”Ei Yerusalem, soa e soe, i kau e tawe makakoạ apa-apa ringangu tawẹ mělahiboru. Kal᷊awọu wawěntanu e sarun Takụ ipělọ kạpia, ringangu manga watu mal᷊aarěga.

¹²Manga benteng Takụ pětikang bọu watun delima, manga tukadu pasěllangengu e wọu watum paramata, manga meselu e wọu kal᷊awọu haghing intan paramata.

¹³ Kal᷊awọu tumanạu e makoạ muritẹ̌-Ku e, i sire sarung mal᷊unsemahẹ̌.

¹⁴I kau e ipětị su wowong laěmpahu kạadilě e, ipakarau wọu katatakụ dingangu pananědạ.

¹⁵Kereu i kau e linguang, bal᷊inewe Iạ e něngoro, walạe měnsang i sai mělingu si kau e sarung manawo.

¹⁶Seng Iạ e napakariading kipung e měngalabẹ̌ putung baugu měněsal᷊ẹ̌ aghidẹ̌ e. Seng Iạ e lai mapakạdiahing sordado e mẹ̌pakẹ u aghidẹ̌ e pěmate.

¹⁷Kaiso apạeweng aghidẹ̌ e nisěsal᷊ẹ̌ ipěndokạ si kau e sarung tawẹ ual᷊ine. Dingangu apang laěnsilẹ̌ su ral᷊ungu pěnggaghutaěng sarun ilahẹ u kawe nẹ̌sal᷊a. Iạ e sarung měgělliu watạ su manga ěllang-Ku,” kerene angkuěngu MAWU.