Read Sangir YESAYA 55 Bible Online

YESAYA 55 - Sangir bible

YESAYA 55

¹ MAWU e něhengetang, ”Pěmpẹ̌damahị e kěbị i kamene apan něngkarou; pěmpěnginungke, akẹ e seng nasadia. Děntako kěbị i kamene apan tawẹ doite, tarimạko gandung tạ bawaehe ringangu kaěngke! Anggorẹ̌ dingangu susụe seng nasadia, tarimạ e matagẹ̌.

²Kai pẹ̌kapura tangu měmělli apa-apa kụ tawe makaundang kapulu, ringangu měmunara waugu apa kụ tawe makal᷊aedẹ̌ e? Daringihẹ̌ko parenta-Ku, kụ i kamene makakaěngbe mapia, ringangu makateěngbe sasadia masasědapẹ̌.

³ Pẹ̌daringihẹ̌ko, ei wansa-Ku, děntako su anu-Ku, i kamene ren Takụ gěllirangu pẹ̌bawiahẹ̌ tutune. Baugu kakěndagẹ̌ dingangu kasasatia Takụ nikědo si Daud, Iạ e nẹ̌taingu pẹ̌dariandi kụ kakalẹ̌ dingang i kamene.

⁴Mambeng hinone i sie Takụ koateng těmbonange ringangu panglima, sahidi wọu kawasa-Ku baugu manga wansa.

⁵I kamene sarung měmpẹ̌kui manga tau raghị, dingangu i sire tạ kararengụ e ruměnta su anunu, waugu Iạ, MAWU Ruatanu, Duatang Israel susi, batụu Iạ seng nẹ̌dalong kamene.”

⁶Pěmpẹ̌sul᷊ẹ e sol᷊ong anum MAWU karěngụewem piạ l᷊oahe, pẹ̌kui si Sie karěngụeweng i Sie marani.

⁷Mal᷊owọko taumata ral᷊akisẹ̌ e reng měngul᷊ị pẹ̌bawiahe, ringangu měmal᷊ui raral᷊engu tiněnnane. Balạe pẹ̌bawalị e i sie sol᷊ong anum MAWU, tadeạu nakahombang kakěndagʼE. Mal᷊owọko i sie reng měnumbiling sol᷊ong anun Duatang kitẹ, batụu MAWU e ringangu mal᷊uasẹ̌ měgěllịu kal᷊aampung.

⁸MAWU e něhengetang, ”Tiněnna-Ku e wal᷊inewe tiněnnanu, ringangu dal᷊eng-Ku e wal᷊inewe ral᷊engu.

⁹Karangẹ u langị su wowon dunia e, kerene karangẹ e tiněnna-Ku e su wowon tiněnnanu e, ringangu ral᷊eng-Ku e su wowon dal᷊engu.

¹⁰ Mẹ̌sul᷊ungu tahiti nahondosẹ̌ bọu langị, dingangu tawe mẹ̌bal᷊ị, kaiso měholo dunia, makatawa ěntana ringangu mapatuwong haghing sasuang, měngonggọ u wuane waugu asikang dingangu kanengang,

¹¹kerene lai wawera Takụ iwera e tawe mẹ̌sul᷊e su anu-Ku e sia-sia, kaiso piạ ual᷊ine mẹ̌koạ apang kapulu-Ku e, ringangu makaratingu apang karaki-Ku e.

¹²I kamene sarung měněntang u Babel dingangu ral᷊uasẹ̌, dingangu tondaěng sol᷊ong likude ringangu kasasal᷊amatẹ̌. Bul᷊ude ringangu wongkone sarung měmpạhul᷊uasẹ̌ dingangu měmpạhul᷊iagẹ̌, manga kakaluang su waelẹ̌ e měmpẹ̌tẹ̌tal᷊okạ.

¹³Kalun cěmara sarung ipěngaweng děmpugʼu sumpinị manga bungang ipěngaweng manga kěhu mal᷊oang. Ene mariadi tadeạu Iạ e ipakawantugẹ̌; nakoạ kere tatiala kakalẹ̌ kụ tawe mailang.”