Read Sangir YESAYA 58 Bible Online

YESAYA 58 - Sangir bible

YESAYA 58

¹MAWU e něhengetang, ”Pẹ̌bansage tuhụ ihạ i kamene! Pěhabarẹ̌ko su manga umatẹ̌-Ku kal᷊awọu rosan sire.

²I sire mạněmba si Siạ e apang kal᷊aěllo, ringangu mẹ̌měningu masingkạ u kapulu-Ku, tabidạu i sire mẹ̌kẹ̌koạ mapia, ringangu satia su manga tita-Ku. I sire mẹ̌bẹ̌bera u i sire mal᷊uasẹ̌ měněmba si Siạ dingangu mẹ̌měnning u tita-Ku adilẹ̌ e.”

³Bansa ene nakiwal᷊o, ”Apa gunane mẹ̌puasa kereu MAWU e tawe makasilo? Apa wue gunane i kitẹ mẹ̌těngkasanạ u watangeng kereu i Sie e tawe měnaung ene tangu?” MAWU e něhengetang, ”Mamben těngadẹ̌, těntal᷊ang i kamene měpẹ̌puasa, i kamene mědẹ̌deạ untung hala ringangu měngẹ̌ngakal᷊ẹ̌ taumata apang bẹ̌baehang i kamene.

⁴Těntal᷊ang kapẹ̌pẹ̌puasane, i kamene pěmpẹ̌darendehẹ̌ dingangu pěmpẹ̌kakoka arau pẹ̌koạ tindakangu mahoto. Katihọ i kamene kakakoạ i kamene mẹ̌puasa e makawal᷊insahẹ̌ si Siạ baugu rumaringihẹ̌ kal᷊awọu kakal᷊iomaneng i kamene tangu?

⁵Kereu i kamene e měmpẹ̌puasa e i kamene mạnịgěsạbe watangeng i kamene; i kamene kụkakulelen těmbọ i kamene e kere raukalun děmpugẹ̌. I kamene měmilạ u karong dingangu měnẹ̌nawuhu awul᷊ẹ̌, kụ mạhundal᷊oka su wowone. Kụ seng ene e ngae isẹ̌sěbạ i kamene e mẹ̌puasa? Katihọ i kamene e Iạ e mal᷊uasẹ̌ ual᷊ingu kakanoạ ene tangu?

⁶Seng ini pẹ̌papuasa kụ Takụ ikẹ̌kapulu: Lěsọko wěntung u pẹ̌tatingkaị dingangu wawaěngu tawẹ kạadile, ringangu liwirẹ̌ko taumata apang tẹ̌těl᷊idang.

⁷ Pẹ̌papahiạko kaěng i kamene su apan taumata kụ měngkạl᷊unusẹ̌, tarimạko taumata apang měmpẹ̌pal᷊eongang su wal᷊eng kamene! Pẹ̌gěllịkong pakeang suapan taumata mạtěntol᷊e ringangu kumbahangbe tawe měnarimạ u anạ u sěmbaụ u kụ hinong itul᷊ung.

⁸Tangu tualagẹ̌ e sarung sumarang si kamene kere tualagu wěmbanaho, ringangu apang lesẹ u e tạ karěngụ e maul᷊e. Iạ e sarung maněntanudẹ̌ si kamene mědeạu měngambang si kamene. Darěnta-Ku e sarung mangěllung si kamene wọu pungu anging sude.

⁹Kereu i kamene mẹ̌kal᷊iomaneng ute, Iạ e sarung dumaringihẹ̌. Kereu i kamene kumahiorọ si Siạ, Iạ e sarung sumimbahẹ̌. Kumbahangbe saụ měmpěnědạ sěndinganengu kụ ědoko kal᷊awọu pẹ̌sasitori ringangu taghunalangu mohong.

¹⁰Gěllirengkong kaěnge apang něngkahutung dingangu pẹ̌tul᷊ungkong taumata apang sẹ̌sědakeng. Kereu i kamene mẹ̌koạbe kerene ute, kararěndung su sěndihangu mạngělikụ e ute sarung matualagẹ̌ kere tualagu ěllo mal᷊ětu.

¹¹Iạ e sarung hanesẹ̌ měngahạ si kamene ringangu mapakal᷊aedʼi kamene su ěntana mamara; Iạ sarung měndiagạ si kamene tadeạu těbewe mahuweka ringangu matoghasẹ̌. I kamene sarung mẹ̌sul᷊ungu rahami akene mal᷊awo, mẹ̌sul᷊ungu simbul᷊u akẹ tawẹ banạu mạl᷊ěsa.

¹²Soa seng marěngụ nakoạ ěnnạ e sarung pětikang i kamene kạpia su wowong pondasi těbe. Kụ isěbạ i kamene ’Bansa kụ měmangung kapia manga mesele dingangu měngul᷊i kal᷊awọu wal᷊e apan naghagholang.’ ”

¹³MAWU e něhengetang, ”Pěngadatẹ̌ko ěllon Sabatẹ̌ kere ěllo waugu MAWU. Kumbahang měngkai měngurusẹ̌ pandungangu hala e su ěllo ene. Bantugeko ěllo ene tabidạu ěllon dal᷊uasẹ̌; pěngadatẹ̌ko ěllon MAWU kụ abe měngkai mědẹ̌daral᷊eng; dingangu kumbahang lai měhal᷊ẹ̌ arau mẹ̌bisarang hal᷊ẹ̌ sia-sia.

¹⁴Tangu i kamene sarung mal᷊uasẹ̌ ual᷊ingu měmẹ̌munara waugu Iạ e. Iạ e sarung mapakariading kamene lẹ̌adateng su kạguwạu dunia. I kamene sarung mẹ̌biahẹ̌ masěnaěng dingangu ghěsing ěntana pusakạ i Yakub, i upungu e. Iạ e kai MAWU seng něhengetang.”