Read Sangir YESAYA 59 Bible Online

YESAYA 59 - Sangir bible

YESAYA 59

¹Abe pěngiral᷊ing u MAWU e kawe tumanịu lome waugu měngambang si kamene, arau tumanịu wengelẹ̌ mẹ̌daringihẹ̌ kakahiorọ u.

²Ual᷊ingu kakanoạ u ral᷊akisẹ̌ e hakịu i Sie tawe rimaringihẹ̌ su tempong i kamene mẹ̌kẹ̌kal᷊iomaneng si Sie. Kal᷊awọu rosang kamene e nakapěta si kamene wọu anun Duata e.

³I kamene nẹ̌sal᷊a e ual᷊ingu nẹ̌konti ringangu nẹ̌koạ tạkatul᷊ide ual᷊ingu mẹ̌kẹ̌koạ katatingkaị dingangu měmate.

⁴I kamene něnowang pěrkara tawẹ alasange ringangu něhukung tawẹ kạadile. I kamene nẹ̌konti ringangu mạngumbahasu hal᷊ẹ̌ sia-sia; i kamene mẹ̌kẹ̌koạ karaki waugu manilakạ taumata wal᷊ine ringangu mẹ̌kẹ̌koạ dal᷊akisẹ̌.

⁵Kal᷊awọu karaking kamene ral᷊akisẹ̌ e makawawa papate kere těluhu těmpu mawisa. Kereu těluhẹ̌ ene ipakiighang, tangu suměbang těmpune. Karaki ene mamben tawẹ gunane si kamene, mẹ̌sul᷊ungu pakeang kụ nikahiwuang bọu sal᷊ehu kal᷊ibangkang!

⁷ I kamene sěntiniạ měngkate tinalung mělẹ̌hingidʼu mẹ̌koạ karaki ral᷊akisẹ̌, kụ mapulu lighạ mẹ̌koạ ene. Tawẹ goẹ̌ e i kamene měmate taumata tạ sal᷊ane. Balạewe sol᷊ong apa i kamene, mang měnẹ̌něntang u kaghagholang dingangu kawawinasa.

⁸I kamene tawe mẹ̌tatawakal᷊i měhundugẹ̌ pẹ̌darame, ringangu kal᷊awọu kakanoạ i kamene e tawẹ adile. Dal᷊eng i kamene e mẹ̌kẹ̌kakalelọ, ringangu i sain tụtol᷊e ral᷊eng ene e sarun tawẹ karal᷊unsemahẹ̌.

⁹Bansa ene e nẹ̌bera su Mawu Ruata, ”Orasẹ̌ ini e i kami masingkạ u unụ e i Kau e tawe něngambang si kami wọu manga taumata kụ měmpạněndạ si kami e. I kami e měngẹ̌ngampal᷊ẹ̌ tualagẹ̌, kaiso kawe tumbạeng piạ kararěndung.

¹⁰I kami e mẹ̌sẹ̌sasaghipo kere tau wuta; ěllo rangẹ i kami e mạsangkong kere su tempong hěbi maral᷊ung; su tal᷊oarang taumata wiahẹ̌ e i kami mẹ̌sul᷊ungu taumata nate.

¹¹I kami e su katakụ dingangu lụlahunsusa; i kami e mědẹ̌deạ kạadilẹ̌, kaiso kawe tala; i kami e mělẹ̌harapẹ̌ kasasal᷊amatẹ̌, kaiso kawe sia-sia.

¹²Apạ e kakěpal᷊e karal᷊akisʼi kami e si Kau; kal᷊awọu rosang kami e mapěsẹ̌sal᷊ang kami. I kami e mambeng měsẹ̌sasěsilʼu karal᷊akisʼi kami e, ringangu masingkạ u kal᷊awọu rosang kami e.

¹³I kami e seng limampa ringangu nělibutu su těngom MAWU, ringangu mạdiri tumol᷊e Mawu Ruatang kami. I kami e seng něnědạ bal᷊ine ringangu nělenga; tiněnnang kami e napal᷊idẹ̌, ringangu manga wawerang kami e konti.

¹⁴Tita kụ adil᷊ẹ̌ e seng nipakarau ringangu kạadilẹ̌ e seng nipakaghea. Katul᷊idẹ̌ e tawe papandungang su tampạ u l᷊awọ e, ringangu katatulusẹ̌ e pẹ̌pelokang su wiwihe.

¹⁵Kụ semben tawẹ apa taumata matul᷊idẹ̌ e, ringangu i sain mẹ̌těngkaraung karal᷊akisẹ̌ e, i sie sẹ̌sane makoạ sasal᷊iung karal᷊akisẹ̌ e.” MAWU e sen nakasilo, ringangu i Sie tawẹ karal᷊uase kereu selain tawẹ apa kạadilẹ̌ e.

¹⁶ I Sie mạherang u sen tawẹ apa reng suměpụ dingangu tawẹ u taumata tumatatawange. Tangu i Sie nẹ̌pakẹeng kawasa-Ne sẹ̌sane waugu mapakasal᷊amatẹ̌ dingangu měgěllị i sire kal᷊auntu.

¹⁷ I Sie nẹ̌pakẹeng kaadilẹ̌ dingangu kasasal᷊amatẹ̌ e mẹ̌sul᷊ungu pakeang uase ringangu sapeọ e waja! I Sie piạ kanaunge měngul᷊ị kapia e kakakoạ kerene e ringangu měmal᷊isẹ̌ tạ kaadile.

¹⁸I Sie měmal᷊isẹ̌ kal᷊awọu sědụ e natuhụ ewe su kakanoạ i sire. Sarang katewe manga wansa su manga tahanusane mararau e tawe mal᷊iwirẹ̌ bọu hukumangʼE.

¹⁹Kawasa ringangu kawawantugʼE sarung ikẹ̌katakụ u kal᷊awọu taumata wọu sěmběkan daki, sol᷊ong sěmběkam bahẹ. I Sie sarung duměnta kere sal᷊ụ lụelehe maihạ pinakaihạ u anging maihạ.

²⁰ MAWU e něhengetang su manga umatʼE, ”Iạ e sarung duměnta su Yerusalem mědeạu měngambang si kamene kěbị apan němpẹ̌tobatẹ̌ bọu kal᷊awọu rosang kamene.

²¹Iạ e mẹ̌taing u pẹ̌kakakědo si kamene: I kamene e Takụ gěllirangu kawasa-Ku ringangu těntiro-Ku e sarang marěngụ-děngụ. Těntiroko su manga anạ i kamene e tadeạu i sire e mal᷊aing makapaněntiro waugu hěnto měbẹ̌bawallasẹ̌ e orasẹ̌ ini ore sarang marěngụ-děngụ.”