Read Sangir YESAYA 6 Bible Online

YESAYA 6 - Sangir bible

YESAYA 6

¹ Su taungu Ratu i Uzia e napohong, iạ nakasilo MAWU. I Sie mạiang su wowong kal᷊aianengʼE marangẹ dingangu mawantugẹ̌. KakingkaengʼE něnakạ kasěllahu Ghaheda.

²Mạngělikụ si Sie piạ manga riadikang mạhundarisị duděllị kere putung, sěngkatau-sěngkatau e piạ papanide tahạ ěnnung. Papanide rarua su těngone nanakạ gatine, darua něnakạ badange, dingangu papanide lai rarua e ute ipakẹ e lai waugu tuměllạ.

³ I sire měmpẹ̌bẹ̌bera sěmbaụ su wal᷊ine: ”Susi, susi, susi. Susi e MAWU Limembong Kawasa. Dunia e napenẹu rarěnta-Ne mawawantugẹ̌.”

⁴ Tingihi sire e nakakiọ lanteng Bal᷊eng MAWU, ringangu Bal᷊eng MAWU ene hala e napenẹ u tipu.

⁵Bọu e iạ nẹ̌bera: ”Kạěngkěhang! Seng tawẹ harapẹ̌ku lai iạ e, watụ u mohongku e kai kotorẹ̌ ual᷊ingu rosa ringangu iạ e mạtanạ su tal᷊oaram bansa lai kerene. Manilaing kerene, ual᷊ingu mataku hala e iạ seng nakasilo Ratu, MAWU Kụ Limembong Kawasa!”

⁶Bọu e sěngkatau wọu tal᷊oarang manga riadikang ene e timělạ sol᷊ong anuku nẹ̌bawa tětuhẹ̌ su sasepẹ bọu pananěmbaěng.

⁷Nisenggehange wiwihẹ̌ku e ringangu nẹ̌bera, ”Tětuhẹ̌ ini seng něnenggehẹ̌ biwihu. Kụ ini e sal᷊anu e seng nirědasẹ̌ dingangu rosanu e seng niampungangu MAWU.”

⁸Bọu e iạ nakaringihẹ̌ tingihu MAWU e něhengetang, ”I sie Takụ irolohẹ̌? I sai tangu sarung makoạ mẹ̌bawa bal᷊on sal᷊amatʼi kitẹ e?” Iạ e simimbangu, ”Ini e iạ. Dolohe iạ!”

⁹ Bọu e Sie rimolohu iạ nẹ̌bawa tatanata ini su kal᷊awọu umatẹ̌: ”I kamene sarung turusẹ̌ dụdaringihẹ̌, kaiso tawe makaěnna. I kamene e sarung turusẹ̌, měnẹ̌nitị kaiso wěga wue měnsang apạ e mariadi.”

¹⁰Mase nẹ̌berạ e i Sie si siạ, ”Pakal᷊umuko tiněnnan sire ene e, apẹ̌bengelẹ̌ko tul᷊ine ringangu pakawutako matane tadeạu i sire tawe makasilo, makaringihẹ̌ arau makaěnna, bọu e saụ mẹ̌bal᷊i si Siạ kụ maul᷊e!”

¹¹Iạ makiwal᷊o, ”Kạděngụe kakanoạ kere ini e pẹ̌tatahang MAWU?” SasimbangʼE, ”Sarangkewe kal᷊awọu soa e makoạ ěnnạ e kụ tawẹ taune, manga wal᷊e semben tawe lai pẹ̌tatanakeng mase ěntana e nakoạ tạ l᷊ohone ringangu nal᷊inggi,

¹²tumanạu manga soa ene sarung Takụ tokol᷊ang pakarau sarang hakịu kasěllahu ěntana e lụhio.

¹³Ore lai kiwuạ u wọu tal᷊oarang mapul᷊ong katau e rem bědang piạ sěmbaụ mạtanạ su wanua ene, i sie lai sarung ipakawinasa. Kaiso mẹ̌sul᷊ungu kalun nunụ kereu tuwangenge mang bědang piạ tuide, kai kerene lai mang bědang piạ lěmbene wọu wansa ene kụ nakoạ panẹ̌takengu umatẹ̌ susi e.”