Read Sangir YESAYA 60 Bible Online

YESAYA 60 - Sangir bible

YESAYA 60

¹Pẹ̌bangungko kụ kakoạko tualagẹ̌ ei Yerusalem, u tualagu kasasal᷊amatʼi kamene e seng diměnta; Duata e něnualagʼi kau e ringangu kawawantugʼE.

²Dunia e nilakubu kararěndung, manga wansa e nilingkubang u karal᷊uẹ̌; arawe tualagu MAWU e, kai simarang su pusigʼi kamene, tualagu rarěnta-Ne e nakoạbe ene, mal᷊ahẹ su pusigʼi kamene.

³Manga wansa e diměnta e měgẹ̌gapaěng sol᷊ong tualagu, mararatu e kai kinawitaugangu tualagẹ̌ kụ simarang baugʼi kamene.

⁴Kakěllạe měnsang kai a nariadi mạngělikụ si kamene e; kawanua e němpẹ̌tampung mědeạu mapul᷊ẹ sol᷊ong anung kamene e. Manga anạ i kamene manga esẹ e riměnta wọu tampạ marau, manga anạ i kamene wawine e nitingkul᷊u.

⁵Nakasilo ene i kau mạherang dingangu gatinu e měngkai matilang; i kau e kụkondọ dingangu naungu e masaria. Kal᷊awọu arětạ u apam bansa e lẹ̌ěntudang sol᷊ong anunu, kakakalạ kụ bọu sěmběkang laudẹ̌ e mẹ̌dẹ̌dal᷊embo si kamene.

⁶Banuanu e pinẹ̌dahěmbungangu onta mal᷊awọ, i sire e nahunděnta wọu Midian dingangu Efa. Bọu Syeba e taumata mẹ̌bẹ̌bawa wul᷊aeng dingangu kamania, apidu kapẹ̌dẹ̌dalone kakakoạ u MAWU.

⁷Kambing dingangu dombang Kedar iwawa sol᷊ong anunu domba esẹ bọu Nebayot mạdariahi waugu pẹ̌kakal᷊iomanengu. Sasěmba ene e makạl᷊uasẹ̌ naungu MAWU, i Sie nakawěngi Wal᷊enʼE napenẹ u kawawantugẹ̌.

⁸Apa ene měnsang tụtěllạ kere winawa kere paluma kụ tụtěllạ kakạpul᷊ẹ e?

⁹Seng ene e manga kapal᷊ẹ̌ kụ dụděnta němal᷊ango mẹ̌bẹ̌bawa umatʼu Ruata e mapul᷊ẹ bọu wanua marau. Sal᷊aka ringangu wul᷊aeng niwawane ringang baugu ipẹ̌dalo MAWU Ruatanu; baugu Ruatang Israel Kasusiange, kụ nakariadi umatʼE lẹ̌adateng.

¹⁰MAWU e něhengetang su Yerusalem, ”Tau raghị e sarung měmětị kapia meselʼi kamene, dingangu manga ratu e sarung mẹ̌tangkiang si kamene. Kangerẹ Iạ e něhukung si kau su ral᷊ungu ral᷊angehẹ̌-Ku, arawe orasẹ̌ ini e Iạ dembeng kiměndagi kau e.

¹¹ Ěllo hěbi e tukadu pasěllangeng i kamene e sarung matope tadeạu kakakalạ u manga wansa ikatonda su anung kamene ringangu manga ratun sire e kere taumata kinataweng.

¹²Bansa ringangu kararatuang kụ mạdiri mẹ̌karạdiahang baugʼi kamene e, sarung mawinasa ringangu mapuạ tadise.

¹³Dal᷊uasu kěhung Libanon sarung hengketang sol᷊ong anung kamene kalung kalu piạ hanggange, cěmara ringangu sihingu cěmara baugu kakoạ, mapakariading Bal᷊e-Ku e pakahuna, ringangu mapakal᷊ěnggihu tampạ kụ tẹ̌tahidaěng-Ku.

¹⁴ Kụ manga rariọ apang měmpanigěsạ si kau e riměnta němpěsamal᷊e, kụ nạung bọu měmpẹlẹ̌hinakang si kau e sarung mẹ̌tumpěkuhẹ̌, kụ i kau e sarung isěbạ, ’Soan MAWU,’ ’Sion, Soan Duata Susi Israel’.

¹⁵I kau e tawe sarung itěntang dingangu i kawěnsing, dingangu tawe i wala měhio marěmasẹ̌. I kau e Takụ koateng karal᷊uasẹ̌ kakalẹ̌, tampạ u ral᷊iagẹ̌ sarang marěngụ-děngụ.

¹⁶I kau e sarung pạdul᷊iang u manga wansa ringangu manga ratu, mẹ̌sul᷊ungu sěngkatau marehokang mělẹ̌hiking anạ e. Tangu masingkạ e i kau u Iạ e kai MAWU, Mananal᷊amatu, dingangu Ruatang Israelẹ̌ e kai matoghasẹ̌ Měndal᷊iwirẹ̌ si kau.

¹⁷Iạ e mẹ̌bawa wul᷊aeng kere laaweng tambaga, ringangu sal᷊aka kere laaweng uase. Takụ gěllirangu tambaga laaweng kalu, ringangu uase kere laaweng batu. Banuanu e sarung Takụ ipakal᷊enehẹ̌ dingangu pakarěmmasẹ̌, ore lai pẹ̌parentaěng dingangu kạadilẹ̌.

¹⁸Sarung lai seng tawẹ apa habaru mạanung kal᷊ahasa su wanuanu, hal᷊ẹ̌ u kaghaghol᷊ọ dingangu kal᷊aopehẹ̌ su wanuanu. Mẹ̌sul᷊ungu meselẹ̌ Iạ e sarung měngěllung si kau ringangu i kau e sarung mẹ̌dalo si Siạ kere mananal᷊amatu.

¹⁹ I kau e tawe hinong kasarameng u matangěllo e su tempong ěllo, ringangu tawahal᷊uasu tualagengu wul᷊ang su tempong hěbi. U Iạ e kai MAWU nakoạ mananualagẹ̌ kakalẹ̌ baugu e, Iạ měnualagẹ̌ si kau e ringangu kawawantugẹ̌-Ku.

²⁰Baugi kau e sarung piạ matangěllo kụ tawe běke reng sumědạ dingangu wul᷊ang e tawẹ běke reng kimědal᷊ẹ̌. U Iạ e kai MAWU nakoạ mananualagẹ̌ kakalẹ̌ baugʼi kau tempong pěl᷊ahampugu e sarung mapaghohẹ̌.

²¹Tumanạ u e sarung mẹ̌karadiahang kahěngang, i sire sarung managhuang banua baugu sarang karěngụ e. I sire mẹ̌sul᷊ungu cangkokẹ̌ Takụ nisuang hala waugu pělahekang u kawantugẹ̌-Ku.

²²Sarangke lai walagẹ̌ dararodọ e ringangu masanạ e makoạbe kere wansa kụ gẹ̌guwạ dingangu matoghasẹ̌. Iạ e kai MAWU sarung lighạ kumanoạ su tempone.”