Read Sangir YESAYA 61 Bible Online

YESAYA 61 - Sangir bible

YESAYA 61

¹ Kawasang MAWU Limembong Karangetange e ene si siạ; i Sie němile ringangu něndolohu iạ mědeạu pěhabaru Injilẹ̌ su taumata kasiang dingangu napakaul᷊en taumata apang něngkanawo naunge; baugu apěmẹ̌mokạ su taumatan tahungkụ u i sire e tawẹ kạděngụ e sarung ipakal᷊iwirẹ̌, dingangu suapan taumata su ral᷊ungu tahungkụ, u i sire sarung ipěllọ.

² I Sie něndolohu iạ apělẹ̌habarẹ̌ u seng nidatingu tempone MAWU e měnal᷊amatẹ̌; baugu měhiborẹ̌ patikụ apang naunge masusa, ringangu apạmal᷊isẹ̌ kal᷊awọu sědụ i sire;

³baugu apẹ̌gẹ̌gěllịu karal᷊uasẹ̌ dingangu karal᷊iagẹ̌ e su taumata apang naunge mạsusa ringangu měmpělẹ̌lutu; mědeạu pěmẹ̌mal᷊ui susan naung i sire makoạ lagung daralo. I sire sarung mẹ̌sul᷊ungu kalu nisuang u MAWU sẹ̌sane. I sire sarung mẹ̌koạ apang mapia ringangu kahěngang, hakịu MAWU e wẹ̌bantugang.

⁴I sire sarung měmangung manga soa apan seng marěngụ nagholang dingangu mapararisị u kal᷊awọu tampạ kụ seng marěngụ něhio.

⁵Ei, bansaku, tau raghị sarung mẹ̌tangkiang si kamene; i sire sarung měngahạ manga binatangu ringangu měmpẹ̌karadiahang dahami ore lai waelu anggoru.

⁶I kamene sarung isẹ̌bạ ěllangu Ruata ringangu isẹ̌bạ imang u MAWUNG kitẹ. I kamene sarung makateěng kakalạ u manga wansa ringangu makapěndang mal᷊uasẹ̌ ual᷊ingu arẹ̌tạ i sire e.

⁷Ual᷊ingu i kamene seng nakaěbạ kamamea ruan sul᷊e nawalung, dingangu turạ e ore kal᷊ahina e seng nakoạ bahageangu, tangu i kamene makaěbạ pusakạ duan sul᷊e mal᷊ipa su wanuanu ringangu managhuang dal᷊uasẹ̌ kakalẹ̌.

⁸MAWU e něhengetang, ”Iạ e lụlandang u kạadilẹ̌ dingangu mạběnsing u pěnanědạ ore lai karal᷊akisẹ̌ e. Iạ sarung měngonggọu tatendengu ringangu kasasatia, ringangu měngikị u pẹ̌dariandi kakalẹ̌ dingang i kamene.

⁹Hěntonu e timeleng su apan tampạ, nasěsahẹ̌ su tal᷊oarang kal᷊awọu bansa. Tangu kal᷊awọu taumata kụ apang nakasilọ e sarung mangakung ene, u wansa ini e Takụ al᷊amateng.”

¹⁰Yerusalem něbera, ”Iạ e lụl᷊uasẹ̌ ual᷊ingu MAWU, naungku e lụl᷊iagẹ̌ ual᷊ingu Ruata. Mẹ̌sul᷊ungu boroitẹ̌ esẹ dingangu wawine mẹ̌pẹ̌pakẹ u ral᷊ěgahẹ̌ napenẹ u karal᷊ěnggihẹ̌, kerene MAWU e mapěluheng iạ e pakeangu kasasal᷊amatẹ̌ dingangu kal᷊auntu.

¹¹Mẹ̌sul᷊ungu wine nisawuhẹ̌ sarung tumuwo makoạ sasuang, kerene MAWU Ruata e mapatendangu kasasal᷊amatẹ̌ e ringangu patikụ bansa sarung mẹ̌dalo si Sie.”