Read Sangir YESAYA 62 Bible Online

YESAYA 62 - Sangir bible

YESAYA 62

¹Baugu Yerusalem tangu iạ e sarung mẹ̌bisara, baugu Sion iạ e tawe sarung matanạ měngkate marěmasẹ̌, sarang i sie ipakasal᷊amatẹ̌ dingangu kal᷊auntungu pěmamatạ e su sěnnang kere oborẹ̌ su tempong hěbi.

²Ei Yerusalem, manga wansa e nakasilo pěmamatạ u, manga ratu e tụtingang kasěllahu. I kau e sarung isěbạ dingangu areng buhu, MAWU e hala sarung měngonggọ u areng ene.

³I kau e makoạ kere makota mal᷊ěnggihẹ̌ su l᷊imang MAWU, makotang kararatuang su l᷊iman Duatanu.

⁴Arengu sembem bal᷊ine lai ’I anu Pinahuntěntangeng’, banuanu e selaing bal᷊ine ’I anu lẹ̌humpinausang’. I kau e sarung isẹ̌bạ si ’Tẹ̌tal᷊ěntukang u Ruata’, dingangu wanuanu e isěbạ ’I anu Seng bọu Nẹ̌kawing’, u MAWU lẹ̌lahimpuluangi kau, i Sie mẹ̌sul᷊ungu kawing esẹ baugu wanuanu.

⁵Mẹ̌sul᷊ungu sěngkatau kal᷊endesang mẹ̌kawingu sěngkatau mahuala parawang kerene Měndariadinu e sarung mapẹ̌kawing i kau.[78] Mẹ̌sul᷊ungu sěngkatau boroitẹ̌ e mal᷊uasẹ̌ makasilo kawinge, kerene Ruata e sarung lụluasʼi kau.

⁶Su meselu Yerusalem iạ e měměllọu lukadẹ̌; ěllo ringangu hěbi i sire tawe wotonge marěmasẹ̌, kaiso harusẹ̌ turusẹ̌ mapẹ̌tahěndung u Ruata su kědo kụ nạung seng kinoạʼE.

⁷I sire tawe wotonge mapakawalan Sie katatanạ marěmasẹ̌ kal᷊imonan Sie měmangung Yerusalem kạpia, ringangu mapakariadin sie timeleng su kasěllahu dunia.

⁸MAWU e seng nẹ̌diandi ringangu pẹ̌sasalu ringangu sarung měndal᷊eng u ene ringangu kawasanʼE: ”Iạ e tawe lai sarung mẹ̌gěllịu gandung u su sekẹ; tau raghị e selain tawe měnginung anggoru kụ nikaual᷊ing kamene ringangu sigěsạ.

⁹Arawe i kamene kụ seng něnampung u apang nipěnsạ e sarung kumaěng buane ringangu mẹ̌dalo MAWU; ringangu i kamene kụ něnimpo wuang anggorẹ̌ e sarung měnginung akene su ěnsal᷊ị u Wal᷊e-Ku.”

¹⁰Tumanạ u Yerusalem, sěbangke wọu tukadu pasěllangeng, riahiko ral᷊eng baugu taumata apang mapul᷊ẹ. Koako ral᷊eng matal᷊oahẹ děmmẹko manga watune, pakateiko manga pandelẹ̌ baugu manga wansa e.

¹¹ MAWU e něngonggọ u tatanata ini su kal᷊awọu manga weọ u dunia, ”Pẹ̌berako su manga tumanạ u Sion, ’Kakělla, MAWU Mananal᷊amatẹ̌ e riměnta! I Sie tẹ̌takinangu taumata apan seng nipakal᷊iwirʼE.’ ”[79]

¹²I sire sarung isěbạ: ’Umatẹ̌ susi’; ’Umatẹ̌ kụ nipakasal᷊amatʼu MAWU’. Yerusalem sarung isěbạ ’Soa kụ sẹ̌sahimolokangu MAWU’, ’Soa e kụ sen tawe lai itěntangu MAWU’.