Read Sangir YESAYA 63 Bible Online

YESAYA 63 - Sangir bible

YESAYA 63

¹ ”I sai tangu i sie kụ narěnta wọu Bozra su Edom? pakeange mahamụ, pakeange matilang; i sie rụdal᷊eng[80] dingangu mal᷊epatẹ̌ o kawe lai mahasa.” ”Iạ e kai MAWU kụ botonge makasal᷊amatẹ̌ dingangu ruměnta mẹ̌bawa habaru pěmamatạ.”

²”Unụe pakeangu e kahamụ e kawe kerene mẹ̌sul᷊ungu pakeangu měndal᷊inda wuang anggorẹ̌ e tangu?”

³”Sẹ̌saku hětubẹ̌ su tampạ u pěndal᷊indaěng anggorẹ̌ e su tal᷊oarang umatẹ̌-Ku e tawẹ apa kụ deng mapulu mẹ̌tul᷊ung u Iạ e. Manga wansa e Takụ tẹ̌tahidaěng su ral᷊ungu ral᷊angehẹ̌-Ku e, mẹ̌sul᷊ungu měndal᷊inda wuang anggorẹ̌ e. Dahang sire něměsị be něholo lahaweng-Ku nakal᷊amuhụ kěbị pakeang-Ku.

⁴Iạ e seng něhingidu ěllom pěmamal᷊isẹ̌, dingangu tempong pěndal᷊iwirẹ̌ baugu umatẹ̌-Ku.

⁵ Iạ e mẹ̌dẹ̌deạ, kaiso tawẹ apa kụ mětatul᷊ung, Iạ e mạherang u tawẹ apa kụ deng mẹ̌sumbala. Bọu e katoghasẹ̌-Ku hala e mẹ̌tul᷊ung u Iạ, dal᷊angehẹ̌-Ku e reng makasumbala si Siạ.

⁶Su ral᷊ungu ral᷊angehẹ̌-Ku e měngkai apa rụděllị e, Takụ tẹ̌tatahidaěng kal᷊awọu wansa; Takụ ipakawinasa i sire, dingangu rahan sire Takụ ipakawoso sol᷊ong ěntana.”

⁷Iạ e kai měhabaru kakěndagu MAWU ringangu mẹ̌pudi si Sie ual᷊ingu kal᷊awọu pẹ̌kakoạʼE. Dingangu mědẹ̌dal᷊embo i Sie mẹ̌ngal᷊amatẹ̌ umatʼE, ual᷊ingu i Sie piạ tatal᷊ěntụʼE ringangu kakěndagʼE tạ kahěpusange.

⁸MAWU e něhengetang, ”Memben těngadẹ̌ i sire e kai umatẹ̌-Ku, manga anạ be tawe makakedọ naung.” Tangu i Sie makoạ Měnanal᷊amatẹ̌ si sire,

⁹i Sie hala e kahinoěngu susan sire.[81] MAWU e tawe maparal᷊engu rarolohang arau pakirinʼE; i Sie sẹ̌sane měliwirʼi sire ual᷊ingu kakěndagʼE ringangu tatal᷊ěntụʼE. I Sie sěntiniạ mělẹ̌hiking si sire ren dokeng nạung kạngerẹ.

¹⁰Arawe i sire e němpěnggohaeng dingangu nakasusa naungu MAWU. Tangu i Sie nẹ̌bihu nakoạ sědụ i sire e, i Sie sẹ̌sane dimokạ si sire.

¹¹Bọu ene i sire[82] nakatahěndungke tempo nạung kal᷊imona e, su tempọ eng Musa, ěllang u MAWU e. I sire nakiwal᷊o, ”Kai suapa MAWU kụ němatạ manga těmbonangu umatʼE limiu laudẹ̌ e tangu? Kai suapa MAWU něngonggọu kawasanʼE si sire?

¹² Kai suapa MAWU kụ tụtaking si Musa e ringangu l᷊ima-Ne matoghasẹ̌ matětogẹ̌ e, kụ něměta akẹ su těngon sire tadeạu arengʼE tumeleng sarang marěngụ-děngụ e tangu?

¹³Kai suapa MAWU kụ něnata si sire rimal᷊eng limiu akẹ maral᷊ung tangu? Mẹ̌sul᷊ungu kawal᷊o limiu kěhu l᷊inggi, i sire tawẹ běke reng masangkong tangu?”

¹⁴MAWU e nẹ̌bawa si sire sol᷊ong tampạ pěngangirul᷊eěng, mẹ̌sul᷊ungu binatang lẹ̌ahakeng sol᷊ong děmpugẹ̌ su wimbaenge. Kerene i Sie měnẹ̌nata umatʼE, tadeạu arengʼE wantugang.

¹⁵O MAWU, tatinganeko wọu sorga e, wọu kal᷊aianengʼU susi ringangu mawantugẹ̌ e. Kụ suapa kakěndagẹ̌ dingangu kahuagatʼU e tangu? Kai suapa pal᷊ahuanakeng dingangu kakakěndagʼU e tangu? Kumbahangbe měngědal᷊u ene wọʼi kami e.

¹⁶Kai wal᷊inewe i Amang i kami e tangu i Kau e? I Abraham dẹ̌duang Yakub běgaweng kami. Kaiso i Kau e MAWU, kai i Amang i kami, Měnanal᷊amatʼi kami nạung kal᷊imona-mona e.

¹⁷O MAWU, unụe niwalanu e i kami pinakapal᷊idẹ̌? Unụe i Kau e pinakakětị u naung i kami e hakịu i kami tawe matatakụ si Kamene? Pẹ̌sul᷊ẹ e waugu manga ěllangʼU, waugu umatʼU, pusakạ tataghuanengʼU.

¹⁸Unụ e pinakawalanʼU sekẹ e měndaral᷊inda Wal᷊e-Nu, ringangu kal᷊awọu taumata napakal᷊amuhụ u wongkonʼU susi e tangu?[83]

¹⁹I Kau e niěbạ si kami e tabidạ i Kau e tawẹ nẹ̌kẹ̌kawasa si kami e, tabidạu i kami e tawe nakoạ umatʼU.