Read Sangir YESAYA 65 Bible Online

YESAYA 65 - Sangir bible

YESAYA 65

¹ MAWU e něhengetang, ”Iạ e sadia simimbahẹ̌ umatẹ̌-Ku, kaiso i sire e tawe mẹ̌kal᷊iomaneng si Siạ. Iạ e sadia ipẹ̌sombang i sire, kaiso i sire e tawe mědeạ si Siạ. Bansa ene e tawe mẹ̌kui si Siạ, manimbe Iạ sadia sumimbahẹ̌ u: Kai ini e Iạ e.

² Iạ e man seng těbe sadia maněnsomahẹ̌ umatẹ̌-Ku, kaiso i sire kawe mapulu měnggohaeng. Bansa ene e mẹ̌kẹ̌koạ apan dal᷊akisẹ̌ dingangu tụtol᷊e kapulune hala.

³I sire e měngkate turusẹ̌ měkẹ̌koạ dal᷊angehẹ̌ si Siạ e ual᷊ingu pěnanarakangu sasěmba su manga ansedẹ̌ baugu manga mahang duata[86] ringangu měnutung kamania su manga pananěmbaěnge.

⁴Su tempong hěbi i sire mạkoạ sol᷊ong manga liang dingangu kubul᷊ẹ̌ mẹ̌deạu mẹ̌dorong manga těgu su manga himukudu taumata nate. I sire kuminạ gẹ̌sim bawi ringangu něnginung sawong kinạ ipẹ̌pělli.

⁵I sire nẹ̌bera u, ’Dakọko pakarau, abe pěnenggehẹ̌ si kami batụu i kami e kai susi ringangu nahae wọu i kamene!’ Iạ e tawe makakědang makasilo lulun sire! Dal᷊angehẹ̌-Ku e miěbạ i sire e mẹ̌sul᷊ungu putung tawẹ běke rem bọu napurạ.

⁶Hukumang si sire e seng nawohẹ su těngo-Ku. Memben těngadẹ̌, Iạ e sarung tawe matanạ marěmasẹ̌. Iạ e sarung měmal᷊isẹ̌ karal᷊akisʼi sire

⁷ual᷊ingu rosan sire ringangu rosang manga i upung i sire. I sire něhinakang si Siạ dingangu něnutung kamania waugu manga mahang duata su tampạ u pananěmbaěng su manga wongkone. Iạ e sarung měmal᷊isẹ̌ si sire ipẹ̌bewẹeweng kakanoạ i sire su tempo nal᷊iu.”

⁸MAWU e něhengetang, ”Buang anggorẹ̌ apam bědang piạ akene e tawe nirěmmẹ, kaiso kawe kinoạ akẹ u anggorẹ̌. Kerene lai bansa-Ku tawe sarung Takụ ipakawinasa kěbị, batụu su tal᷊oaran sire e wědam piạ u měmẹ̌munara waugu Iạ.

⁹Kal᷊awọu tau Israel wọu hěnton Yehuda e sarung Takụ al᷊amateng, dingangu pal᷊ahiten sire e sarung měnaghuang ěntana wawul᷊urang-Ku. Taumata apang pinile-Ku kụ měmẹ̌munara waugu Iạ e sarung mẹ̌tanạ paị sene.

¹⁰ Umatẹ̌-Ku e sarung maněmba si Siạ; domba ringangu sapin sire e sarung mahungkaěng děmpugẹ̌ su Wal᷊an Saron dingangu Wal᷊ang Akhor.

¹¹Kaiso wal᷊inewe kerene pal᷊edu l᷊iman taumata kụ měněntang u Iạ e, kụ tawẹ pandungange su Sion, wukidẹ̌-Ku susi e,[87] mạněmbang laidopẹ̌ si Gad děduang Meni, manga mahang duatang kal᷊auntu ringangu pal᷊edu wiahẹ̌.

¹²I kamene kěbị e sarung mate kere sasěmban tatingkai. U, piạ e Iạ kụkui e, i kamene tawe simimbahẹ̌, dingangu piạ Iạ e kapẹ̌bẹ̌bisarane, i kamene tawe rumaringihẹ̌. I kamene e něngalembong puluang dumokạ si Siạ dingangu mẹ̌koạ dal᷊akisẹ̌ e.

¹³U tuhụ dal᷊enge ute taumata apang měmpěněmba si Siạ e sarung kumaěng, arawe i kamene tangu kal᷊unusang. I sire sarung měmpanginung arawe i kamene ute měngkarou. I sire sarung mahul᷊uasẹ̌, arawe i kamene tangu makahombang kamamea.

¹⁴Arawe hinone tangu, i sire sarung mahul᷊uasẹ̌ dingangu mahul᷊iagẹ̌, arawe i kamene ute sarung mẹ̌pal᷊eheng sasangị.

¹⁵Taumata apang pinile-Ku e sarung mẹ̌pakẹ u arengu kere laane: ”Mal᷊owọko MAWU Limembong Karangetange měmate si kamene kere i sire!” Arawe taumata kụ mararingihẹ̌ si Siạ e sarung Takụ gělirang u arengu wuhu.

¹⁶Apan taumata su wanua ene e kụ mẹ̌dẹ̌dorong al᷊amatẹ̌ e, sarung mẹ̌dorong al᷊amateng u Ruata kụ masatia. Apan taumata kụ mapulu mẹ̌salu e sarung mẹ̌salu su arengu Ruata kụ satia. Batụu sunsara nạung kal᷊imona e seng nailang kinawul᷊enang.”

¹⁷ MAWU e něhengetang, ”Iạ e sarung mapakariading langị buhu ringangu dunia e wuhu. Kal᷊awọu apan nariadi kal᷊imona e sarung ipakawul᷊e ringangu semben tawe lai hinong tahěndungang.

¹⁸Pakal᷊uasẹ̌ko ringangu pahul᷊iagẹ̌ko waugu sarang marěngụ-děngụ, ual᷊ingu apan Takụ koateng. Iạ e mapakariading Yerusalem buhu napenẹ u ral᷊uasẹ̌, dingangu tumanạ e měmpahul᷊uasẹ̌.

¹⁹ Iạ e sẹ̌saku sarung lumuasẹ̌ baugu Yerusalem, dingangu lụliagẹ̌ ual᷊ingu tumanạ e. Su soa ene sen tawẹ lai sasangị, dingangu sen tawẹ kakahiorọ u mẹ̌dorong tul᷊ung.

²⁰Manga anạ i sire e tawẹ u nate ren darodọ, dingangu taumata ghaghuwạ e sarung midating u umburẹ̌ manandụ. Taumata kụ umbure mahasụ su taunge sarung i koạ kere mangudạ, dingangu apan nate kal᷊imonang ene e tangu ikoạ kere kinahinoěngu hukumang-Ku.

²¹Taumata e sarung měmětị bal᷊e ringangu matanạ; arawe taumata wal᷊ine e tawẹ u matanạ sene. I sire sarung mẹ̌suang su waelu anggorẹ̌ e ringangu makateěng akẹ u anggorẹ̌ e; arawe taumata wal᷊ine e tạ u měmpěnginung ene. Umatẹ̌-Ku e sarung manandụ umbure kere manga kalu, ringangu reng makateěng ual᷊ingu saghedʼi sire e.

²³Kal᷊awọu apang kẹ̌koateng i sire e sarung mangual᷊i, ringangu manga anạ i sire e tawe sarung mate měngkai sěngkělěndị u, kụ i sire ringangu manga pal᷊ahiten sire e sarung Takụ al᷊amateng baugu sarang marěngụ-děngụ.

²⁴Kal᷊imonang sire e ren tawe nẹ̌dẹ̌dorong, Iạ e sumimbang u; těntal᷊ang i sire e ren tawe nạsuen doane, Iạ e seng dimaẹ kakal᷊iomaneng i sire e.

²⁵ Dal᷊ugẹ̌ dingangu anạ u domba lawọbe kụkaěng děmpugẹ̌; singa e kụ kaěng dahami e kere sapi, ringangu těmpu e semben tawe lai makasilakạ su kaguwạ u wongko-Ku e susi, sen tawẹ u lai makarugi arau měmpẹ̌koạ dal᷊akisẹ̌ e.”