Read Sangir YESAYA 66 Bible Online

YESAYA 66 - Sangir bible

YESAYA 66

¹ MAWU e něhengetang, ”Langị e kai kal᷊aianeng-Ku, ringangu dunia e kai tatahidaěngu laedẹ̌-Ku. Kụ kai wal᷊e ghahị e sude iwangungu waugu Iạ, dingangu kai tampạ apa koatengu katatanakeng-Ku?

² Alang patikụ e kai koạ u l᷊ima-Ku e, ringangu kěbị ene e kinoạ. Arawe ikẹ̌karalọ-Ku e ute kai taumata naunge masanạ, kụ mẹ̌sẹ̌sasěsilu manga rosane, kụ mạtakụ dingangu matuhụ si Siạ e.

³Arawe wansa ene e mẹ̌kẹ̌koạewe kapulun sire; i sire e mal᷊uasẹ̌ měmpẹ̌kal᷊iomaneng kụ tiahane makadarěnting. Si sire e tawẹ pẹ̌dal᷊aedang e: měnarakangu sapi esẹ dingangu měnarakangu taumata, měnarakangu anạ u domba ringangu měmamědi lehẹ u asu; maněmbang gandung dingangu měnarakangu raham bawi, něnutung kamania ringangu mạněmba tul᷊ada.

⁴Ual᷊ingu ene Iạ e mal᷊aing sarung mẹ̌koạewe tuhụ kapulu-Ku, ringangu mapakaěnsạ u haghing hombang si sire kụ kẹ̌katakụ i sire e. U su piạ Iạ e kụkui, tawẹ němpẹ̌simbahẹ̌; su tempong Iạ kạbisarane tawẹ u rumararingihẹ̌. I sire limembong puluang dumokạ si Siạ kụ nẹ̌koạ dal᷊akisẹ̌ e.”

⁵Daringihẹ̌ko apang niwerang MAWU, ei kamene kụ mạtakụ dingangu matuhụ si Sie, ”Ual᷊ingu i kamene e satia si Siạ, ene su tal᷊oarang bansanu apam měmpẹ̌bẹ̌binsị i kamene, ringangu mạdiri mẹ̌dal᷊ahapị i kamene. I sire měmpělẹ̌langehẹ̌ si kamene kụ kapẹ̌bẹ̌berane, ’Balạekere MAWU e apěnodẹ u kawawantugʼE, tadeạu i kami e makasilo ral᷊uasu.’ Kaiso i sire hala e makahombang meane.

⁶Daringihẹ̌ko! Piạ tingihẹ̌ gụgal᷊edụ su soa; piạ tingihẹ̌ bọu Wal᷊e-Ku; kai ene tingihẹ̌-Ku kụ kạpěmal᷊ise sědụ.

⁷ Soa kụ susi e mẹ̌sul᷊ungu sěngkatau marehokang mělẹ̌hěnding kal᷊imonang deng měbẹ̌bawiul᷊ugu kal᷊iki; kụ měhěndingu anạ esẹ kal᷊imonang makapěndang sakị u měhěnding.

⁸I sai wọu nạung nakaringihẹ̌ hal᷊ẹ̌ kerene? I sai nạung bọu nakasilo luhudu karariadi kerene? Kaiso tau Israel seng piněhěnding su tempon Sion nanětạ nakapěndang tědụ u měngal᷊iki.

⁹Kumbahang měngěnna u Iạ mẹ̌bawa umatẹ̌-Ku e sarang tempong pělahěnding dingangu tawe ipakawala i sire ipěhěnding.” Kerene wue angkuěng u MAWU.

¹⁰Pahul᷊uasẹ̌ko sěngkapahul᷊uasẹ̌ dingangu Yerusalem, ei kěbị taumata apang měkẹ̌karalọ i sie. I kamene apang lụlahunsusa ual᷊ingu i sie e, orasẹ̌ ini ute wotonge mahul᷊uasẹ̌.

¹¹I kamene e sarungbe makateěng kapiang biahe, mẹ̌sul᷊ungu sěngkatau rariọ kadodọ sụsusu si ninange.

¹²U MAWU e něhengetang, ”I kamene sarung Takụ gěllirangu kapiang biahẹ̌ kere sal᷊ụ lụelehẹ̌; kakakalạ u apam bansa e sarung ipakahumpạ u anunu, kere sal᷊ụ kụ měngkai lụelọ. I kamene měngkawe mẹ̌sul᷊ungu rariọ apạsusu ringangu sẹ̌sarul᷊uang i ninange, mẹ̌sul᷊ungu sẹ̌sahimolokang su hiwane.

¹³Iạ e sarung měhiborẹ̌ si kamene su Yerusalem, mẹ̌sul᷊ungu sěngkatau i ninang mělẹ̌hiborẹ̌ anạ e.

¹⁴Nakasilo ene, i kamene sarung mahul᷊uasẹ̌, dingangu makoạ matoghasẹ̌ dingangu mahuweka mẹ̌sul᷊ungu rěmpugẹ̌ melong. Tangu manga ěllang-Ku e sarung makapěndang kawasa-Ku ringangu manga sekẹ-Ku e sarung makapěndang dal᷊angehẹ̌-Ku.”

¹⁵Kahěngang, MAWU e sarung duměnta ringangu putung; i Sie sarung sumake kareta-Ne kere rělang, baugu mapasěbang u ral᷊angehʼE, ringangu měhěkadẹ̌ maihạ-ihạ.

¹⁶Batụu patikụ taumata kụ nikaěbakeng piạ sal᷊ane sarung hukunangu putung dingangu peda, ringangu mal᷊awọ lai hukumang u papate.

¹⁷MAWU e něhengetang, ”Patikụ taumata kụ napakasusim batangenge baugu mẹ̌buindo makoạ sol᷊ong manga sasuang baugu manga mahang duata[88] kụ mẹ̌kaliomaneng si sire, sarung maghěngging sěngkakaghěngging dingangu taumata kụ kiminạ gẹ̌siʼm bawi ringangu wal᷊awo ringangu kaěng bal᷊ine kụ makadarěnting.

¹⁸Iạ masingkạ[89] u tiněnna ringangu kakanoạ i sire. Iạ diměnta[90] waugu měnampung kal᷊awọu taumata wọu patikụ bansa. Su tempo ene i sire měmpẹ̌tampung, kụ i sire sarung makasilo kawasa-Ku.

¹⁹Iạ sarung měměllọu tatiala sěmbaụ su tal᷊oaran sire. Sěmbahageang kadodọ bọu tal᷊oaran sire e Takụ ipakasal᷊amatẹ̌. I sire sarung Takụ i rolohẹ̌ sol᷊ong patikụ bansa su wanua mararau kụ bědang tawe nakạdingihẹ̌ mạanung Iạ arau makạsilo kawantugẹ̌ dingangu kawasa-Ku: sol᷊ong Spanyol, Libia,[91] ringangu i Lidia ringangu apan tahapitị pelesa, sol᷊ong Tubal dingangu Yunani. I sire sarung měhabaru kasěllahẹ̌-Ku su tal᷊oaram manga wansa.

²⁰Ene bọu kal᷊awọu wanua ene i sire sarung měbawa kapia manga anạ u sěngkataung kamene wansa sěmbaụ kere poroseěng baugu Iạ. I sire sarung měmpẹ̌bawa si sire ene sol᷊ong bukidẹ̌-Ku susi e[92] su Yerusalem dingangu kạsakene kawal᷊o, kalide ringangu onta ore lai kareta ringangu roda, kerẹewe tundun tau Israel mẹ̌bawa sol᷊ong Bal᷊em MAWU sasěmba gandung su loyange wurěsi.

²¹Sěnggạ bọu tal᷊oaran sire sarung Takụ koateng imang dingangu tau Lewi.

²² Kere langị buhu ringangu wanua wuhu sarung mẹ̌daragẹ̌ ual᷊ingu kawasa-Ku, kerene lai hitenu ringangu arengu sarung kạtatanạ kerene.

²³Suapaʼm Bul᷊ang Buhu ringangu apang ěllong Sabatẹ̌ e kal᷊awọu taumata e sarung duměnta baugu maněmba si Siạ su Yerusalem.

²⁴ Su tempong nẹ̌buạ, i sire sarung makasilo maietu taumata kụ seng němpẹ̌pahuwungkadẹ̌ si Siạ. Ul᷊idẹ̌ kụ kimina bangken sire e sarung be tawe mate, ringangu putung kụ něnutung si sire e tawe sarung mapurạ, sembaụ pěmamandaěng kụ makạgaghěnggang baugu kěbị taumata.”