Read Sangir YESAYA 7 Bible Online

YESAYA 7 - Sangir bible

YESAYA 7

¹ Datu i Ahas e kai ahusi Yotam dingangu pulung i Uzia. Piạ i sie nẹ̌parenta Yehuda e naběsẹ e pẹ̌sasekẹ. I Rezin datun Siria e, ringangu i Pekah ahusi Remalya ratung Israel, riměnta něnekẹ Yerusalem. Kaiso i sire tawe nakapul᷊aho soa ene.

²Piạ e ratung Yehuda nakaringihẹ̌ u wuntuangu Siria seng nakasuẹ̌ su wanuang Israel kere sěmbuntuang, i sie ringangu wansane apạ e natakụ, hakịu i sire nahungkende mẹ̌sul᷊ungu kakaluang nịkakiọ u anging.

³MAWU e něhengetang si Yesaya, ”Bawako anạ u i Syear Yasyub[8] kụ dakọko pẹ̌sombangu Ratu i Ahas. I kau sarung mẹ̌sombang i sie su ul᷊ung talagạ, su tampạ i sire měngangunsạ měmpěngunsạ.

⁴Paul᷊ịko su ratu u i sie harusẹ̌ pakarariahi kaiso měngkate pakaudupẹ̌. I sie tawahal᷊uasu matakụ arau mẹ̌bingọ. Dal᷊angehu Ratu i Pekah ringangu Ratu i Rezin dingangu sordadone tau Siria e tawe limembong makasilakạ bọu kanutung darua tụtipu.

⁵Siria seng nẹ̌tatamba ringangu Israel ore lai ratune.

⁶I sire mapulu měngalo Yehuda ringangu měmpěmatakụ apan tumanạ e tadeạu měmpěnumběka si sire, bọu e měhengke ahusʼi Tabeel makoạ datu.

⁷Arawe Iạ, MAWU e mělahẹ̌ ene e sarung tawe mariadi,

⁸ual᷊ingu Siria e tawe něngalembong katoghase wọu Damsyik niupunangu soane, ringangu Damsyik tawe limembong katoghase wọu Ratu i Rezin. Arawe su ral᷊ungu tempo 65 su taunge Israel sarung mawawěka kụ tawe mẹ̌daragẹ̌ kere wansa sěmbaụ.

⁹Israel tawe limembong katoghase wọu Samaria, niupunangu soa e ringangu Samaria e tawe limembong katoghase bọu Ratu i Pekah. Kereu i kamene tawe těnga-těngadẹ̌ mangimang si Siạ e, nal᷊ahẹu i kamene tawe mauwuhẹ̌.”

¹⁰MAWU e něhabaru tatanata wal᷊ine si Ahas:

¹¹”Pẹ̌dorongke tadeạu MAWU Ruatanu e měgěllịu tatialane sěmbaụ si kamene, měnsang bọu wanuan tau nate sual᷊unge wawa arau wọu l᷊angị su wowone.”

¹²I Ahas simimbang u, ”Iạ e mạdiri mẹ̌dorong tatiala. Iạ e tawe mapulu měnal᷊ukạ MAWU.”

¹³Bọu e Nabi Yesaya nẹ̌bera, ”Mạeng kerene, raringihẹ̌ko ei hěnton Datu i Daud! Kai tawe masukụ i kamene měmanikạ pẹ̌sasabaru taumata, hakịu i kamene měmanikạ pẹ̌sasabaru Ruataku e lai?

¹⁴ Ini e, MAWU sẹ̌sane sarung mẹ̌gěllịu tatiala si kamene: Sěngkatau mahuala e[9] sarung mẹ̌bawa kapapia kụ měhěndingu sěngkatau ahusẹ̌ kụ sarung isěbạ e si Imanuel.[10]

¹⁵Su tempong i sie seng botonge kasariane mědeạu makaputusẹ̌ hala e, tangu wanua ene e sarung masorogạ.[11]

¹⁶U kal᷊amonang tempo ene e marěnta, banua rarua kụ pẹ̌parentaěngu mararatu ikẹ̌katakụ u ene e sarung iwala tạ l᷊ohone.

¹⁷MAWU e sarung maparěntan datung Asyur, wọu e i kau ringangu kạguwạu walagu ore lai kawanuanu sarung mapenẹ u kasasěsẹ limembong katědụ e wọu apan nạung seng kẹ̌kahombangeng i kamene dokeng bọu kawawěkang kararatuangu Israel dingangu Yehuda e.

¹⁸Su tempo ene MAWU e sarung mẹ̌kui tau Misirẹ̌ dingangu tau Asyur, mase wansa rarua ene e ruměnta kere ghopol᷊angu lango ringangu kanumpeheng kụ němpẹ̌dahěmbung su manga wal᷊ane matěndihẹ̌ dingangu su manga wěllạu himang. I sire sarung měhěmbung apang gahundunge mal᷊ahoro ringangu suapạewen tampạ u rěmpugẹ̌.

²⁰MAWU e sarung měnewa ratung Asyur waugu mapakariading Israel kere sěngkatau tahakul᷊ụ kụ měngul᷊ụ utạ e pakasue ringangu rukụ u awạ.

²¹Su tempo ene, kereu pẹ̌sěngkatau e měhiking sapi kawuhuang dingangu kambing kụ kětạeng tahạ dua,

²²kụ susun sapi ene wotonge mětiudẹ̌ si sire apan lěmbene su wanua ene. Těngadẹ̌ bue, i sire sarung měnginung susu ringangu madu.

²³Su tempo ene manga waelu anggorẹ̌ e sěmbaụ-sěmbaụ e nisuangengu anggorẹ̌ sěhiwu su puěnge kụ arẹ̌gane roitẹ̌ sal᷊aka sěhiwu su kal᷊ěpane, sarung tuwoěngu ghahundungu sumpinị.

²⁴Taumata kụ makoạ sol᷊ong pai e harusẹ̌ mẹ̌bawa naěnakeng dingangu horom papitị e, u kasěllahu wanua ene e napenẹ u ghahundungu sumpinị.

²⁵Dingangu wawul᷊urange kụ tiniạ lẹ̌hal᷊ẹ̌kang mase suangeng, ute mal᷊aing mạpenẹ u sumpinị, hakịu taumata e tal᷊oěng sarang ene. Ěntana ene kětạeng piạ gunane kere tampạ u pẹ̌deakeng děmpugẹ̌ baugu sapi ringangu domba.”