Read Sangir YESAYA 8 Bible Online

YESAYA 8 - Sangir bible

YESAYA 8

¹MAWU něhengetang si siạ, ”Pěngal᷊ạko batu lei ghẹ̌guwạ sěmbaụ, bọu ene wohekeng hurupe pakal᷊ětạ:[12] ’Pẹ̌papapul᷊aho Marial᷊u, Pělahampasẹ̌ Masahawụ.’[13]

²Pẹ̌kuiko sahidi ruang katau kapangumbalaěng, kụ Imang Uria rẹ̌duang Zakharia, anạ i Yeberekhya.”

³Ta nararěnnạ wọu ene kawingku e piạ kapapia. Piạ e anạ i kandua e piněhěnding, MAWU e něhengetang si siạ, ”Sěbạko i sie ’Pẹ̌papapul᷊ahọ Marial᷊u, Pělahampasẹ̌ Masahawụ.’

⁴Batụu těntal᷊ang dariọ ene tanạsaria kahěngang waugu mẹ̌berang, ’Amang’ arau ’Inang’, kasěllahu kakakalạ u Damsyik dingangu kal᷊awọu apal᷊iwụ u Samaria pul᷊ahọ e sarung huwoěng sol᷊ong anun datung Asyur.”

⁵MAWU e něhengetang lai si siạ,

⁶angkuěngʼE, ”Bansa ini e tawe něnarimạ u akẹ mal᷊enehẹ̌ e wọu lelangu Sal᷊ụ u Syiloah,[14] kụ mal᷊uasẹ̌[15] dingangu Ratu i Rezin dingangu Ratu i Pekah.

⁷Ual᷊ingu ene Iạ e kai MAWU, sarung maparěntang datung Asyur dingangu kal᷊awọu sordadone waugu ipěnekẹ Yehuda. I sire sarung tumol᷊ọ kere Sal᷊ụ u Efrat kụ mẹ̌boang dingangu mělěba limiu manga tigal᷊ụ e.

⁸I sire sarung měngěmụ Yehuda kere lěba sarang lehẹ karangẹ e ringangu makaelọ ewe kěbị.” Duata e maněntanudẹ̌ si kitẹ![16] Papanide nawingkahẹ̌ měngẹ̌ngěllung banuang kitẹ.

⁹Pẹ̌komol᷊ẹ̌ manimbe piạ gaghane, ei patikụ bansa! Daringihẹ̌ko ei manga pondol᷊u dunia! Pẹ̌dariahiko pẹ̌sekẹ, manimbe ringangu sahene piạ gaghane, ore pěmpẹ̌dariahị e, kaiso piạbe ghaghane!

¹⁰Pěmpehingidẹ̌ko apa-apa manimbe patikụ e sarung tawe mariadi kụ pěngal᷊ạ e putusang, manimbe tawẹ gunane kěbị e, u Mawu Ruata e maněntanudẹ̌ si kami.

¹¹Iạ e pinẹ̌kawasaěngu MAWU ringangu nionggotangu laingate tadeạu kumbahang tumol᷊e ral᷊eng kụ niral᷊engangu wansa ene. AngkuěngʼE,

¹² ”Kumbahang mangěnnau kai komplotang u apang lẹ̌ěnang i sire komplotang, dingangu kumbahang matakụ u apang ikẹ̌katakụ i sire.

¹³Pětahěndung u Iạ, MAWU Limembong Kawasa e kai susi. Kětạeng Iạ hinong i katakụ u.

¹⁴ Ual᷊ingu Iạ kai tumanịu susi, ute Iạ e nakoạ batu katatanggaěng baugu kawanuang Yehuda ringangu Israel, dingangu sedẹ piněnedẹ tumanạu Yerusalem.

¹⁵Mal᷊awọ taumata sarung manawo ringangu mitangga kụ mal᷊esẹ. I sire sarung mataho su ral᷊ungu sedẹ.”

¹⁶I kamene manga muritẹ̌ku harusẹ̌ měndesọ dingangu mẹ̌padul᷊i kal᷊awọu tatanata nionggọu Ruata e si siạ.

¹⁷ MAWU e seng nẹ̌kěmbunim batangenge wọu hěnton Yakub, umatʼE, kaiso iạ e mangimang dingangu mẹ̌lẹ̌harapẹ̌ si Sie.

¹⁸ Seng ini e iạ dingangu manga rariọ nionggọu MAWU e si siạ. MAWU Limembong Kawasa e mẹ̌pẹ̌parenta su Wongkon Sion, něndolohi kami nakoạ tatiala waugu umatu Israel.

¹⁹Arawe taumata e sarung měndolohi kamene pẹ̌dorong laahạ bọu manga tahahopa kụ měmpẹ̌sěsasiang dingangu tụtal᷊imoadẹ̌. I sire ene e sarung mẹ̌berau, ”Bal᷊inewe i kitẹ e hinong mẹ̌dorong laahạ bọu manga himukudu taumata nate e baugu pandungangu taumata wiahẹ̌ e?”

²⁰Simbangeko kere ini, ”Daringihẹ̌ko těntirom MAWU e! Taumata kụ tawe mẹ̌bera tuhụ těntiro ene e, tawẹ apa pělaharape.”[17]

²¹Taumata apan soe ringangu lunusẹ̌ e sarung mědẹ̌dal᷊iring su wanua ene. Ual᷊ingu kẹ̌kal᷊unusang, i sire e měngkate měmpẹ̌bawal᷊uang hakịu měngane ratu ringangu Ruatan sire e. Baewe sol᷊ong batuhu sude i sire měmpěmanda, taraị

²²arau tanaẹ, i sire tawe makasilo manga apa sul᷊iung kasasěsẹ dingangu kararěndung ore lai kasasul᷊akọ mělẹ̌lakubẹ̌ e. I sire e sarung irěmmẹ su tampạ marěndung ene.

²³Kaiso wal᷊inewe sarang karěngụe wanua ene makahombang kasasěsẹ. Banua kụ pẹ̌tẹ̌tanakengu manga hěnton Zebulon dingangu i Naftali e wọu nạung tẹ̌tatinganeng tawẹ mangal᷊ene kahiam MAWU e. Kaiso su tempo ramahi e, i Sie sarung měngonggọ u kal᷊aadatẹ̌ su kasěllahu wanua wọu Laudẹ̌ Tal᷊oara sol᷊on daki sarang sěmběkan Sal᷊ụ u Yordan, mịdatingu l᷊ai Galilea pẹ̌tẹ̌tanakengu tau raghị.